कर्मचारी स्तरीय हाजिरी जवाफ प्रतियोगिता सुरु 

काठमाडौँ । आजदेखि काठमाडौँ महानगरमा कर्मचारी स्तरीय हाजिरी जवाफ प्रतियोगिता सुरु भएको छ । २८ औँ महानगर दिवसका सप्ताहव्यापी कार्यक्रम अन्तर्गत प्रतियोगिता आयोजना गरिएको हो । दर्ता भएका १० टोलीमध्ये पहिलो ५ टोली विच आज प्रतिस्पर्धा भएको हो । महानगरका प्रमुख प्रशासकीय अधिकृत बसन्त अधिकारीले पहिलो प्रश्न सोधेर प्रतिस्पर्धाको शुभारम्भ गर्नुभएको थियो ।   

चारुमती समूहले पहिलो स्थान र काष्ठमण्डप समूहले दोस्रो स्थान प्राप्त गरेर छनौट चरण पार गरेका छन् । यी टोलीले अन्तिम प्रतिस्पर्धामा भाग लिन पाउनेछन् । आउँदो आइतबार आयोजना हुने पहिलो चरणको दोस्रो राउन्डमा पहिलो र दोस्रो हुनेसँग यी समूहको अन्तिम प्रतिस्पर्धा हुनेछ । आजको प्रतियोगिताबाट आर्यतारा, सुन्धारा र स्वयम्भू टोली बाहिरिएका छन् ।  

प्रतियोगिताको जनरल राउन्डमा हरेक टोलीलाई १० वटा प्रश्न सोधिएको थियो । यसमा प्रत्येक पहिलो सही उत्तरका लागि १० अङ्क र पास भएर आएको प्रश्नको सही उत्तरका लागि ५ अङ्क दिइएको थियो । च्वाइस रायन्डमा हरेक टोलीलाई ३ वटा प्रश्न सोधिएको थियो । यस राउन्डमा सही उत्तरका लागि १० अङ्क र गलत उत्तरका लागि नेगेटिभ मार्किङ् गरिएको थियो । 

मानव संशाधन विकास महाशाखा प्रमुख गंगाधर गौत्तमको नेतृत्वमा राजस्व विभागका उपनिर्देशक प्रवीण प्याकुरेल र खरिद एकाईका इञ्जिनियर सहायक निर्देशक कुन्दन श्रेष्ठले हाजिरी प्रतियोगिता सञ्चालन गर्नुभएको थियो ।  

आइतबार प्रथम चरणको दोस्रो प्रतियोगिता हुनेछ । यो चरण उपप्रमुखले सुरु गर्ने कार्यक्रम रहेको छ ।