नगर सभाका लागि विभागहरुले तयारी थाल्नू — प्रमुख प्रशासकीय अधिकृत अधिकारी

काठमाडौँ । काठमाडौँ महानगरपालिकाका प्रमुख प्रशासकीय अधिकृत बसन्त अधिकारीले विभागका प्रमुखहरुलाई पुसमा हुने नगर सभाको बैठकको तयारी थाल्नु आग्रह गर्नुभएको छ । आज बालाजु उद्यानस्थित भवनमा रहेको सभा कक्षमा बसेको सिनियर म्यानेजमेन्ट टीम (विभागीय प्रमुख) को बैठकमा उहाँले भन्नुभयो, ‘पुसको १५ गतेसम्म पनि थालनी नभएका कार्यक्रम संशोधन गरेर कार्यान्वयन हुने क्षेत्रमा लैजानुपर्छ । प्रमुखबाट यस प्रकारको निर्देशन भएको छ । विभागका कार्यक्रम कार्यान्वयनको अवस्था हेरेर तयारी गर्नुहोला ।’

यातायात व्यवस्थापनका लागि बजार, सेवा क्षेत्र, शैक्षिक क्षेत्रलगायतको समय तोक्ने, कार्यालय सञ्चालन तथा सेवा प्रवाहलाई छिटो बनाउनेलगायत विषयमा छलफल भएको थियो । 

यस्तै वेरुजु समपरीक्षण, भोटाहिटीको सव वे व्यवस्थापन, कार्यालय सहयोगी, सरसफाइ कर्मचारी र अग्नि नियन्त्रक करार सेवामा लिने, दरबार मार्गमा पार्किङ् व्यवस्थापन लगायत विषयमा छलफल भएको थियो ।