पेनाल्टी सुटआउटमा ३-२ गोल अन्तरले वडा १६ को टीम विजेता : वडा नं. ५ को टोली उपविजेता

काठमाडौँ । मुकुन्द रिजाल स्मृति वडास्तरीय फुटबल प्रतियोगितामा आयोजक वडा नंं १६ को टीम विजेता बनेको छ । लैनचौर खेल मैदानमा आज वडा नं. ५ को टीमसँग भएको फाइनल खेलमा पेनाल्टी सुट आउटमा ३-२ गोल अन्तरले आयोजक टीम विजेता र वडा नं. ५ को टीम उपविजेता बनेको हो । 

प्रतियोगिताको समापन अवसरमा वडाध्यक्ष रोजिना श्रेष्ठले, विजेता टीमलाई २ लाख रुपियाँ, उपविजेता टीमलाई १ लाख रुपियाँ नगदसहित ट्रफी, मेडल र प्रमाण पत्र प्रदान गर्नुभयो । समापन अवसरमा वडा नं. ५ का नितेश महर्जनलाई उत्कृष्ट किपरका रुपमा ट्रफी प्रदान गरियो ।

वडा नं. १६ का रविन्द्र निरौला उत्कृष्ट खेलाडी र वडा नं. ३ का ४ गोल गर्ने खेलाडी प्रज्वल भट्टलाई हाइ स्कोरर खेलाडीका रुपमा जनही १० हजार रुपियाँसहित ट्रफी, मेडल र प्रमाण पत्र प्रदान गरियो । जेठ १० गते सुरु भएको प्रतिस्पर्धामा वडा नं. २, ३, ५, ९, १०, ११, १३, १४, १६, १९, २३, २५ र २६ गरी १३ वटा टीम सहभागी थिए । 

कार्यक्रम समापन अवसरमा बोल्दै वडाध्यक्ष श्रेष्ठले, यस वर्षका जेनजी आन्दोलन, त्यसपछिको निर्वाचनजस्ता घटनाका कारण समयमा प्रतियोगिता सञ्चालन गर्न नसकिएको बताउँदै आगामी वर्ष हिउँद महिनामा प्रतियोगितालाई निरन्तरता दिइने बताउनुभयो ।