काठमाडौँ । काठमाडौँ महानगरपालिकाको नगर सभा ११ औँ अधिवेशन आजबाट सकिएको छ । असार ५ गतेबाट सुरु भएको अधिवेशनमा महानगरका प्रमुख बालेन्द्र शाह (बालेन) ले आर्थिक बर्ष २०७९/०८० का लागि वार्षिक नीति तथा कार्यक्रम पेश गर्नुभएको थियो । यो प्रस्ताव असार ८ गते बसेको सभाको दोस्रो बैठकले सर्वसम्मत पारित गरेको थियो । 

असार १० गते सम्पन्न सभाको तेस्रो बैठकमा उपप्रमुख सुनिता डंगोलले आर्थिक बर्ष २०७९/०८० का लागि २५ अर्व ४१ करोड ९६ लाख ९६ हजार रुपैयाँको अनुमानित बजेट पेश गर्नुभएको थियो । त्यसै बैठकमा सभाका अध्यक्ष एवं महानगरका प्रमुख शाहले आर्थिक विधेयक र उपप्रमुख डंगोलले विनियोजन विधेयक पेश गर्नुभएको थियो । यसरी पेश गरिएको बजेट तथा कार्यक्रममाथि असार १७, २२ र आज (२४) गते बसेको बैठकमा छलफल भएको थियो । छलफलका क्रममा उठेका सुझावलाई समेटेर आजको बैठकले आर्थिक बर्ष २०७९/०८० को बजेट तथा कार्यक्रम र विनियोजन विधेयक सर्वसम्मत पारित ग¥यो । सभा पेश भएको आर्थिक विधेयक असार १७ गते बसेको चौथो बैठकबाट पारित भएको थियो । 

यसरी पारित भएको नीति, बजेट तथा कार्यक्रमले आगामी बर्षमा महानगरका गतिविधिहरु थप संस्थागत हुँदै जाने बैठकका अध्यक्ष एवं महानगरका प्रमुख शाहले विश्वाश व्यक्त गर्नुभयो । ‘सभामा पेश भएका सबै प्रस्तावहरु माथि सौहाद्र छलफल भयो । सर्वसम्मत पारित भयो । बजेट, नीति तथा कार्यक्रमसहित विभिन्न नीतिगत र कानुनी व्यवस्था सम्बन्धी निर्णय भयो ।’ प्रमुख शाहको भनाइ छ । 

बैठकको सहभागिता र छलफल सकारात्मक र उर्जा दिने खालको रह्यो । अधिवेशनका विषयमा संक्षिप्त प्रतिक्रिया दिँदै उपप्रमुख एवं बैठकका उपाध्यक्ष सुनिता डंगोलले भन्नुभयो, ‘मागका रुपमा आएका विषय लिखित रुपमा आएका छन् । यसले संस्थागत आचरणलाई टेवा पु¥याउँछ ।’

आज न्यायिक समितिका सदस्यहरुको पद तथा गोपनीयताको शपथ सम्पन्न भएको छ । आज नै सम्पन्न भएको निर्वाचनबाट वडा २९ का अध्यक्ष कुश ढकाल र वडा ११ की महिला सदस्य आशा श्रेष्ठ रौनियार निर्विरोध निर्वाचित हुनुभएको छ । उहाँहरुलाई महानगरका प्रमुख शाहले पद तथा गोपनीयताको शपथ गराउनुभएको थियो । त्यसैगरी निर्वाचन अधिकृत दिपक अधिकारीले न्यायिक समितिको सदस्यमा निर्वाचित भएको प्रमाण पत्र प्रदान गर्नुभएको थियो । 

नेपालको संविधानको धारा २१७ मा स्थानीय विवादको समाधान गर्न ३ सदस्यीय न्यायिक समितिको व्यवस्था गरेको छ । जसमध्ये उपप्रमुख संयोजक हुने र बाँकी २ जना नगर सभा सदस्यमध्येबाट निर्वाचित हुने व्यवस्था छ ।  
अधिवेशनको पाँचौ अधिवेशनबाट महानगरका निर्देशक दिपक अधिकारीलाई निर्वाचन अधिकृत तोकेको थियो । 

आज भवन मापदण्ड २०७५ मा केही संशोधन गरिएको छ । महानगरमा पार्किङ्का लागि छुट्टै नीति नभएकोले पार्किङ्लाई व्यवस्थापनलाई सहज बनाउन गर्न मापदण्डमा केही संशोधन गरिएको हो । मापदण्डअनुसार बहुतले पार्किङ्को फ्लोर एरिया रेसियो (फार) लाई ४ कायम गरिएको छ । सेडव्याक छोडेर बाँकी सबै जमिनमा निर्माण कार्य गर्न पाइनेछ । मेकानिकल र स्टिल स्ट्रक्चरमा थप १ फार उपलब्ध हुनेछ । यो मापदण्ड स्मारक क्षेत्रमा भने लागु हुनेछैन । संशोधनअनुसार महानगर आफैँले चार किल्ला तोकेर सम्पदा क्षेत्र बनाउन सक्ने त्यसका लागि छुट्टै मापदण्ड बनाउन सक्ने व्यवस्था गरेको छ ।  

३ वटा समिति गठन 

आजको बैठकले नगर सभाअन्तर्गत लेखा, विधायन र विकास तथा सुशासन गरी ३ वटा समिति गठन गरेको छ । समितिका पदाधिकारी यसअनुसार हुनुहुन्छ । 

लेखा समिति 

गायत्री पुडासैनी, वडा नं. ६     — संयोजक  
रेसल श्रेष्ठ, वडा नं. २०         — सदस्य
सतिश तण्डुकार, वडा नं. १०     — सदस्य
हीरादेवी पोरखेल, वडा नं. २१     — सदस्य
शर्मिला परियार, वडा नं. ३    — सदस्य

विधायन समिति 

रुपा थापा, वडा नं. ७        — संयोजक
नानीहेरा डंगोल, वडा नं. १२    — सदस्य
प्रवेश श्रेष्ठ, वडा नं. २६         — सदस्य
हुमादेवी आचार्य, वडा नं. ३१    — सदस्य    
पुष्प महर्जन, वडा नं. १६        — सदस्य

विकास तथा सुशासन समिति

सिर्जना भेटवाल, वडा नं. ९    — संयोजक
न्हुच्छेदेवी महर्जन, वडा न. २१    — सदस्य 
रेणुकमल शाही, वडा नं. १९    — सदस्य
जितेन्द्र खड्गी, वडा नं. १७    — सदस्य
अप्सरा खत्री, वडा नं. १५        — सदस्य 

यी समितिहरुको सदस्य सचिवका रुपमा सम्बन्धित विभागका प्रमुखहरुले गर्नुहुनेछ ।