आधारभूत तह कक्षा ८ को अन्तिम परीक्षाको अङ्क इमिस प्रणालीमा प्रविष्टि सुरु : आउँदो हप्तामा नतिजा प्रकाशन गर्ने तयारी 

काठमाडौँ । काठमाडौँ महानगरपालिकाको शिक्षा विभागले आधारभूत तह कक्षा ८ को अन्तिम परीक्षामा विद्यार्थीहरुले प्राप्त गरेको अङ्क एकीकृत शैक्षिक सूचना व्यवस्थापन प्रणाली (इमिस) मा प्रविष्टि गराउने काम थालेको छ । स्रोत केन्द्रहरुले उत्तरपुस्तिका डिकोडिङ् गरेर विभागमा पठाउन थालेपछि आजदेखि अङ्क प्रविष्टि थालिएको शिक्षा अधिकृत इन्द्रप्रसाद दाहालले जानकारी दिनुभयो । विभागले आउँदो हप्ता नतिजा प्रकाशन गर्ने तयारी गरेको छ ।   

अहिलेसम्म गरिएका कामका बारेमा जानकारी दिँदै उहाँले भन्नुभयो, ‘परीक्षा सम्पन्न भएकै दिनमा उत्तर पुस्तिका स्रोत केन्द्रमा ल्याएर कोडिङ् गरियो । कोडिङ् गरिएका उत्तरपुस्तिका रोष्टरमा भएका शिक्षकहरुले स्रोत केन्द्रमै बसेर परीक्षण गर्नुभयो । परीक्षण भएका उत्तरपुस्तिकाहरुलाई डिकोडिङ् गरियो । यसरी डिकोडिङ् गरिएका उत्तरपुस्तिका विभागमा प्राप्त भएपछि हामीले प्रणालीमा अङ्क भर्न थालेका हौँ ।’

नतिजा प्रकाशन योजनाका विषयमा दाहाल भन्नुहुन्छ, ‘३ दिनभित्र अङ्क प्रविष्टि सकिन्छ । आजको चौथो दिन प्रणालीमा भरिएका अङ्क र उत्तर पुस्तिकामा प्राप्त गरेको अङ्क रुजु गर्छौँ । यसपछि नतिजा प्रकाशन गर्छौँ ।’

महानगरभित्रका सामुदायिकतर्फ धार्मिक र वैकल्पिक विद्यालय समेत गरी ९६ र संस्थागततर्फ ४०८ वटा गरी जम्मा ५०४ विद्यालयका १८ हजार २९४ जना विद्यार्थी परीक्षामा सहभागी भएका थिए । यसमा सामुदायिक विद्यालयबाट ५ हजार १७४ जना र संस्थागत विद्यालयबाट १३ हजार १२० जना विद्यार्थी छन् । लिङ्गका आधारमा हेर्दा ८ हजार १४५ जना छात्रा र १० हजार १४९ जना छात्र छन् । यसमा ५ वटा संस्थागत विद्यालयमा अध्ययन गर्ने १० जना विदेशी विद्यार्थीहरु पनि समावेश छन् । 

जगन्नाथ माध्यमिक विद्यालय र बन्दी विकास आधारभूत विद्यालय गरी २ वटा विद्यालय भद्रगोल जेलभित्र छन् । यी विद्यालयबाट यस वर्ष क्रमशः २० जना र १२ जना गरी ३२ जना विद्यार्थी परीक्षामा सहभागी हुनुपर्नेमा जेलका १ जना विद्यार्थी कैदमुक्त भएपछि ३१ जना विद्यार्थी सहभागी भए । केन्द्रीय बहिरा माध्यमिक विद्यालयबाट २७ जना विद्यार्थी परीक्षामा सहभागी भएका छन् । 

परीक्षालाई विश्वसनीय, व्यवस्थित र प्रभावकारी बनाउन यस वर्षदेखि परीक्षा केन्द्र अध्ययन गरिरहेको विद्यालयबाट बाहिरका ५६ वटा केन्द्रबाट परीक्षा सञ्चालन गरिएको थियो । 

केन्द्रीय वहिरा माध्यमिक विद्यालय र कारागारभित्रका विद्यालयहरुमा अध्ययनरत विद्यार्थीलाई आफ्नै विद्यालयबाट परीक्षा लिइएको थियो । विद्यार्थीको विशेष अवस्थालाई ध्यानमा यस्तो व्यवस्था गरिएको हो । यस्तै अटिजम, बौद्धिक अपाङ्गता, डाउन सिन्ड्रोम लगायत अवस्था भएका विशेष प्रकृतिका विद्यार्थीहरुले परीक्षा केन्द्रबाटै परीक्षा िदएका थिए ।