शैक्षिक विकासका लागि शिक्षक तालिम सञ्चालन गर्दै काठमाडौँ महानगरपालिका : सामुदायिक र संस्थागत दुवैतर्फबाट ४ हजार ८० जना सहभागी गराउने लक्ष्य 

काठमाडौँ । शैक्षिक गुणस्तर विकास र नतिजा सुधारका लागि काठमाडौँ महानगरपालिकाले विद्यालयका शिक्षकहरुका लागि विभिन्न विधाका तालिम आयोजना गर्न लागेको छ । ४ हजार ८० जना शिक्षकलाई लक्षित कोटा मानेर तालिम सञ्चालन तयारी गरिएको छ । यसमा ७ वटा क्षेत्र राखिएका छन् । वैशाख ८ गते सुरु हुने तालिम विधागत रुपमा त्यसपछिका विभिन्न मितिमा सुरु हुनेछन् । जेठ ८ गते सबै तालिम सकिनेछन् । 

आवेदन दिन तलको क्यु आर स्क्यान गरेर विवरण पठाउनुहोस् । 

यसरी सञ्चालन हुने तालिममा सहभागी हुन शिक्षकहरुले अनलाइनबाट आवेदन दिनुपर्नेछ । सामुदायिक र संस्थागत दुवै प्रकारका विद्यालयमा अध्यापन गर्ने शिक्षकले आवेदन दिन पाउनेछन् । आवेदन दिने अन्तिम मिति बैशाख २ गते हो ।  

महानगरपालिकाले अहिलेसम्म विभिन्न तह र विधामा गरी करिब २ हजार शिक्षकलाई क्षमता तालिम प्रदान गरिसकेको छ । यसअघिका ४ चरणमा सम्पन्न तालिममध्ये माध्यमिक तहमा गणित, विज्ञान, सामाजिक, नेपाली, अंग्रेजी, अर्थशास्त्र विषय अध्यापन गर्ने शिक्षकहरुलाई विषयगत तालिम, प्रारम्भिक बाल विकास केन्द्र सञ्चालन तथा व्यवस्थापन सम्बन्धी सहजकर्ता तालिम, एकीकृत सिकाइ र मूल्याङ्कनमा आधारित तालिम, विद्यालयमा आधारित निरन्तर रुपान्तरणमुखी शिक्षक क्षमता अभिवृद्धि, स्टिममा आधारित सिकाइ पद्धति तालिम भएका छन् ।  

यो लिङ्क क्लिक गरेर आवेदन दिन सकिन्छ । https://tinyurl.com/kvwp8dze 

यसपटकका तालिम वैशाख ८ गतेदेखि तालिम सुरु हुनेछन् । यसमा कक्षा ४ देखि १० सम्मका शिक्षकहरुका लागि एकीकृत सिकाइ, आन्तरिक मूल्याङ्कन नतिजा सुधारका लागि बैशाख १२ गते सम्म सञ्चालन हुनेछ । यही समूहका लागि वैशाख १३ गतेदेखि १५ गतेसम्म प्रश्नपत्र निर्माण तथा विश्लेषण तालिम हुनेछ । तालिमका लक्षित सहभागी शिक्षक क्रमशः ५४० जना र १,२९० जना हो । यही समूहका शिक्षकका लागि सिकाइमा सूचना प्रविधिको सम्बन्धी तालिम वैशाख १६ गतेदेखि सुरु हुनेछ । ४ दिने यो तालिममा ४५० जना शिक्षकलाई सहभागी गराउने लक्ष्य छ । 

कक्षा १ देखि कक्षा ३ सम्मका शिक्षकका लागि एकीकृत पाठ्यक्रम र प्रारम्भिक बाल विकास तथा शिक्षाका सहजकर्ताका लागि वैशाख ८ गते सुरु हुने तालिम वैशाख २८ गतेसम्म सञ्चालन हुनेछ । यी दुवै शीर्षकका हरेक तालिममा ४८०÷४८० जना शिक्षकलाई सहभागी गराउने लक्ष्य छ । 

कक्षा ४ देखि ८ सम्मका शिक्षकहरुका लागि (बुक फ्री फ्राइडे) सिर्जनात्मक सिकाइ सम्बन्धी तालिम बैशाख २१ गते प्रारम्भ हुनेछ । ३ सय जना शिक्षकलाई सहभागी गराउने लक्ष्य राखिएको यो तालिम जेठ ४ गते सकिनेछ । यही समूहका शिक्षकहरुलाई वृत्ति मार्गनिर्देशन तथा मनोसामाजिक परामर्श सम्बन्धी तालिम जेठ ४ गते सुरु भएर ८ गते समापन हुनेछ । यसमा ५४० जना शिक्षकलाई सहभागी गराउने लक्ष्य छ । 

निर्धारित कोटाभित्र आवेदन परेमा पहिलो आवेदकलाई पहिलो प्राथमिकतामा राखेर तालिम दिइने शिक्षा विभागले जनाएको छ । चैत २७ शिक्षा स्वास्थ्य समितिको वैठकले तालिममा सामुदायिक विद्यालयबाट ७० प्रतिशत र संस्थागत विद्यालयबाट ३० प्रतिशत शिक्षकलाई सहभागी गराउने निर्णय गरेको छ । संस्थागत विद्यालयतर्फका शिक्षकहरुमध्ये पनि महानगरपालिकाभित्रका स्थायी बसोबास गर्ने शिक्षकलाई प्राथमिकता दिइनेछ । यसपछि जुनसुकै क्षेत्रमा बसोबास गरे पनि महानगरपालिकाभित्रका विद्यालयमा अध्यापन गराउने शिक्षकहरुलाई तेस्रो प्राथमिकतामा राखिनेछ । 

यसप्रकारका तालिमलाई पूर्ण क्षमतामा सञ्चालन गर्ने महानगरपालिकाको योजना छ । यसरी प्रदान गरिएको तालिमबाट शिक्षकहरुमा विज्ञान, सूचना तथा प्रविधिको बढ्दो विकास र सामाजिक परिवेशको परिवर्तन सुहाउँदो व्यक्तित्व विकास हुने अपेक्षा राखिएको छ । यसले शिक्षण विधि र शिक्षण सिकाइमा प्रभावकारिता अभिवृद्धि हुनेछ ।

अनलाइन प्रणालीमा आधारित आवेदनबाट तालिमले शिक्षकहरुको वृत्ति विकासका लागि आधार बन्ने सहरी योजना आयोगका सहायक विज्ञ विवेक बास्तोलाले जानकारी दिनुभयो । यसबाट प्राप्त हुने तथ्याङ्कले, विद्यालयहरुमा सञ्तालन हुने विविध कार्यक्रमको लेखाजोखा गर्न, कार्यक्रम सञ्चालनको प्रभावकारिता पूर्वअनुमान गर्न आधार प्राप्त हुने वास्तोलाको भनाइ छ ।