तालिम अवधिमा प्रशिक्षार्थीले ४ वटा ल्यापटप र ४ वटा डेक्सटप चल्ने बनाए, ७ वटामा फेर्नु पर्ने सामान पत्ता लगाए

काठमाडौँ । शारीरिक अपाङ्गता भएका प्रशिक्षार्थीहरुले तालिम लिँदा लिँदै ४ वटा ल्यापटप र ४ वटा डेक्सटप मर्मत गरेर चल्ने बनाउनुभयो । काठमाडौँ महानगरपालिकाको सामाजिक विकास विभागले शारीरिक अपाङ्गता भएका व्यक्तिहरुका लागि सञ्चालन गरेको ६० दिने कम्प्युटर हार्डवेयर चिप लेवल तालिमका प्रशिक्षार्थीहरुले यो नतिजा दिनुभएको हो । थप ७ वटा कम्प्युटरको फल्ट फाइन्डिङ् (समस्या पत्ता लगाउनु) भएको छ । यसका लागि सामान फेर्नु पर्ने भएकोले कुन सामान फेर्ने हो । टिपोट गरेर कम्प्युटरमा टाँस गर्नुभएको छ । सहायक प्रशिक्षक दुर्गामान तामाङ्का अनुसार विग्रिएका ३० वटा कम्प्युटरमध्ये ८ वटा मर्मत भए । सामान फेरेपछि थप ७ वटा कम्प्युटर चलाउन सकिने हुन्छन् । आइतबार तालिमको समापन अवसरमा आयोजना गरिएको कार्यक्रममा प्रशिक्षण अवधिको नतिजाका बारेमा उहाँले जानकारी गराउनुभएको हो । तालिम २०८२ वैशाख ३ गतेदेखि सुरु भएको थियो । 

तालिममा मदर बोर्ड रिपेयर, डीसी पावर, व्याट्री चार्जिङ् सक्र्युट, पावर, पावर टेस्ट गर्ने प्वाइन्ट, एडप्टर र चार्जिङ्, चार्जमा हुन सक्ने समस्या, वोर्ड परीक्षण गर्ने उपकरण, विभिन्न प्रकारका कम्प्युटरको रिपेयर फ्लो, रिकभरी, हाइसाइड लो साइड टेस्टिङ्, ल्यापटप एसेम्ब्लिङ्, फाइनल रिभिजनजस्ता चरणका सैद्धान्तिक ज्ञान दिँदै अभ्यास गराइएको थियो । 

तालिम समापन गर्दै कार्यपालिका सदस्यहरु ललिता खड्गीले, सहयोग पाए सहज जीवनयापनका लागि म केही गर्न सक्छु भन्नेहरुका लागि महानगरपालिकाले सहयोग उपलब्ध गराउँदै आएको बताउनुभयो । यस्तै कार्यपालिका सदस्य महेश नेपालीले, समतामूलक समाज निर्माणका लागि महानगरपालिकासँग भएको स्रोतलाई उच्चतम उपयोग गरिरहेको उल्लेख गर्नुभयो । कसैले लघुताभाष गर्नुनपरोस्, कुनै प्रकारको अपाङ्गता भएका कारण क्षमता उपयोगमा अवरोध नहोस् भनेर महानगरपालिकाले सामाजिक क्षेत्रका काम गरिरहेको उहाँको भनाइ थियो । 

शारीरिक अपाङ्गता भएर आफूलाई कमजोर महसुस गर्नै पर्दैन । कार्यपालिका सदस्य मैयाँलक्ष्मी महर्जनले, केन्द्रसँगै वडावडाहरुबाट कार्यक्रम सञ्चालन गरेर सबैलाई समान पहुँच प्रदान गर्ने प्रयास भइरहेको बताउनुभयो । 

प्रशिक्षार्थीहरुमा बढेको आत्मविश्वाश र तालिम अवधिमै नतिजा प्रदर्शन भएको देखेर विभागले गरेको काम सही मार्गमा भएको अनुभूति भएको छ । कार्यक्रममा सामाजिक विकास विभागका प्रमुख समीक्षा निरौलाले धारणा राख्नुभयो । 

कार्यक्रममा प्रशिक्षार्थीहरुले तालिमबाट आफूहरु आत्मनिर्भरताको बाटोमा पुगेको धारणा राख्नुभयो । प्रशिक्षार्थीहरु १० जनामध्ये २ जना स्वरोजगारमा हुनुहुन्छ । उहाँहरु भन्नुहुन्छ, ‘अब कुनै पनि डेस्कटप र ल्यापटप बनाउन आनाकानी गर्नै पर्दैन । सबै बनाउन सकिन्छ । तालिमले अनुहारमा आत्मविश्वाश दिने रहेछ । यो आत्मविश्वाश देखेर ग्राहकहरुले कामका लागि सजिलै पत्याउनु हुँदो रहेछ ।’ उहाँहरुको अनुभव छ । 
तालिम संयोजक भवानी कपालीका अनुसार यो तेस्रो वर्षको कार्यक्रम हो । गएको वर्ष कम्प्युटरको प्रिन्टरसहितका सामग्री मर्मत गर्न सिकाइएको थियो । 

तालिमका लागि सहकार्य गरेको संस्था अपाङ्गता सिप विकास तथा प्रतिस्थापन केन्द्रका महासचिव लक्ष्मीदास मघैयाका अनुसार तालिम अब जब हब खोलेर प्रशिक्षित सबै जनशक्तिलाई रोजगारमा आवद्ध गरिनेछ । यसपछि तालिम लिएका कसैले पनि वेरोजगार बस्नु पर्दैन ।