गुनासो प्राप्त गर्ने सम्पर्क अधिकारीहरुविच सुनुवाई व्यवस्थापन बारे छलफल 

काठमाडौँ । काठमाडौँ महानगरपालिकाको कल सेन्टर (गुनासो व्यवस्थापन तथा सोधपुछ) मा आएका गुनासो सुनुवाईसँग सम्बन्धित अनुभवमा आधारित अन्तरक्रिया सम्पन्न भएको छ । सूचना प्रविधि विभागले आज कल सेन्टरबाट गएका गुनासा सुन्ने विभागका सम्पर्क अधिकारीहरुसँग यस प्रकारको अन्तरक्रिया गरेको हो । 

जनताका गुनासा सुन्नका लागि तथा आएका समस्या समाधान गर्नका लागि स्रोत र जनशक्तिको तत्काल परिचालन गर्नुपर्ने हुन्छ । स्रोत परिचालनका लागि खरिद र वित्तिय कानुनका केही सीमाहरु छन् । सम्पर्क अधिकारीहरुले, निर्माण सेवा, खाद्य तथा पेय पदार्थको प्राविधिक परीक्षणका गर्न प्रयोगशाला र प्राविधिक जनशक्ति, कानुन कारवाहीका लागि कानुन विभागसँगको तत्काल सहकार्य तथा प्रहरी परिचालनका लागि दिगो संयन्त्र निर्माणमा जोड दिनुभएको छ । 

नागरिकबाट आएका गुनासालाई फस्र्यौट गर्ने गरेका छौँ । यसलाई दिगो र प्रभावकारी बनाउन आन्तरिक क्षमता बढाउने दिशामा काम गरिरहेका छौँ । अन्तरक्रियामा सूचना प्रविधि विभागका प्रमुख नमराज ढकालले धारणा राख्नुभयो । 

यस अघि अधिकारीहरुलाई गुनासो हेर्ने, सुन्ने तथा काम भएपछि समापन टिप्पणी (क्लोजिङ् स्टेटमेन्ट) विवरण अद्यावधिक गर्ने तालिम गराइएको थियो । 

महानगरको सेवा, महानगरका  वडा, विभाग, आयोजना तथा एकाईसँग सम्बन्धित सोधपुछ तथा गुनासा, महानगरीय सेवा तथा सुविधा वितरणसँग सम्बन्धित काम तथा महानगरसँग भएका अपेक्षा सम्बन्धि गुनासा तथा सोधखोजका लागि यो प्रणाली स्थापना गरिएको हो । यस प्रणालीमा एकै पटक १५ जनाको गुनासो सुन्न सकिन्छ । अहिले यो सेवा कार्यालय समयमा मात्र प्रदान गरिएको छ । त्यसपछि फोन गर्ने व्यक्तिले प्राप्त निर्देशनअनुसार ५ अङ्क थिचेपछि रेकर्ड हुने व्यवस्था गरिएको छ । यो रेकर्ड भोलिपल्ट केन्द्रका कर्मचारीले सुनेर सम्बोधन गर्ने गरेका छन् । 

सेन्टरमा स्वास्थ्यका समस्या सुनेर तत्काल समाधान गर्न ११८० हटलाइन सञ्चालनमा छ । यसमा स्वास्थ्यकर्मीले गुनासो तथा समस्याको समाधान गर्ने गरेका छन् ।