७५ वर्ष उमेर नाघेका ४३७ जना वरिष्ठ ज्येष्ठ नागरिकलाई वडाबाट सम्मान 

काठमाडौँ । काठमाडौँ महानगरपालिकाको वडा नं. ३० ले ४३७ जना वरिष्ठ ज्येष्ठ नागरिकलाई सम्मान गरेको छ । आज नारायण चौरमा आयोजना गरिएको कार्यक्रममा महानगरपालिकाका उपप्रमुख सुनिता डंगोलले सम्मान पत्रबाट र वडाध्यक्ष दलबहादुर कार्कीले रुद्राक्षको मालाबाट सम्मान गर्नुभएको हो । सम्मान प्राप्त गर्नेहरुमध्ये ९८ वर्षिया महिला सबैभन्दा पाको उमेरको हुनुहुन्थ्यो । 

सम्मान कार्यक्रममा बोल्दै उपप्रमुख डंगोलले, वरिष्ठ ज्येष्ठ नागरिकको सक्रियताबाट आफू लक्ष्यप्रति थप प्रोत्साहित भएको उल्लेख गर्नुभयो । ‘अहिलेको सक्रियता हेरेर भन्न सकिन्छ, उहाँहरुले आफ्नो उर्जाशील उमेरमा सामाजिक, आर्थिक, शैक्षिक, प्राविधिकलगायत विभिन्न क्षेत्रको विकासका लागि अनुकरणीय काम गर्नुभएको छ । अहिले प्राप्त भएको सुख, सुविधा तथा विकासका लागि उहाँहरुको सक्रियताले ठुलो भूमिका खेलेको छ । यो पक्षलाई महानगरपालिकाले सम्मान गरिरहनेछ ।’

छुटेका दौतरी वडाले आयोजना गरेको कार्यक्रमले भेट गराउन सक्छ । यस क्षणले प्रदान गर्ने खुशीले उमेर अझ बढाउँछ । यो अभूतपूर्व अवसरमा आशीर्वाद लिन पाउनु म आफैँका लागि पनि महत्वपूर्ण अवसर हो । डंगोलको भनाइ थियो । 

सबै उमेर, वर्ग र समुदायलाई समान दृष्टिले व्यवहार गर्ने महानगरपालिकाको नीतिअनुरुप ज्येष्ठ नागरिकहरुलाई सम्मान गरिएको वडाध्यक्ष कार्कीले धारणा राख्नुभयो । ‘युवाहरुको व्यक्तित्व तथा नेतृत्व विकासका लागि ज्येष्ठ नागरिकबाट ज्ञान र सिप लिन आवश्यक छ ।’ वडाध्यक्ष कार्कीले भन्नुभयो, ‘वडा त्यस प्रकारको वातावरण बनाउन चाहन्छ ।’

वडा सचिव देवराज जोशीका अनुसार ७० वर्ष उमेर पूरा भएका ज्येष्ठ नागरिकलाई तीर्थाटन गराउने वडाको योजना छ । 

सम्मानपछि ज्येष्ठ नागरिकहरुले, आफ्ना लागि सोच्ने पनि कोही रहेछन् भन्ने महसुस भएको बताउँदै ज्येष्ठ नागरिकको योगदान सम्झना गर्नेहरुले देश बनाउन सक्ने धारणा सुनाउनुभयो । 

वडामा सामाजिक सुरक्षा भत्ता ४१२ जना ज्येष्ठ नागरिक हुनुहुन्छ । ६८ वर्ष उमेर पूरा हुनुभएका ज्येष्ठ नागरिकलाई सरकारले मासिक ४ हजार रुपैयाँ सामाजिक सुरक्षा भत्ता उपलब्ध गराउने गरेको छ । महानगरपालिकाले मासिक १ हजार रुपैयाँका दरले पोषण भत्ता उपलब्ध गराउँछ ।