छठका ब्रतालुका लागि कमलपोखरी तयार : ५ सय जनाको क्षमता, आउनेलाई सकेसम्म व्यवस्थापन गर्ने योजना

काठमाडौँ । काठमाडौँको कमलपोखरी छठका ब्रतालुका लागि तयार भएको छ । काठमाडौँ महानगरपालिका वडा नं. १ ले अग्रवाल भवनसँग सहकार्य गर्दै ब्रतालुहरुका लागि बस्ने स्थानको व्यवस्था गरेको हो । 

सरसफाइ, बत्तीको व्यवस्थापन, घाट व्यवस्थापन लगायत काम तयारी अवस्थामा रहेको वडाध्यक्ष भरतलाल श्रेष्ठले जानकारी दिनुभयो । ‘कमलपोखरी छठ पर्वको पर्याय जस्तै बनेको छ । ब्रतालुहरुलाई यो स्थान निःशुल्क उपलब्ध गराउने गरिएको छ । श्रद्धालुहरुको चाप छ । सकेसम्म आउने जत्तिलाई व्यवस्थापन गर्ने प्रयत्न गर्नेछौँ ।’ श्रेष्ठले बताउनुभयो ।  

कमलपोखरीमा छठ पर्वको तयारीका लागि वडाले विगत वर्षदेखि नै काम गरिरहेको छ । त्यसलाई यस वर्ष पनि निरन्तरता दिएका छौँ । वडासचिव सर्वज्ञराज पौडेलले तयारीका विषयमा जानकारी दिँदै भन्नुभयो, ‘पर्व सुरु हुनुअघि नै सरसफाइ गरेका छौँ । पर्वका समयमा सुन्दरता र सुरक्षामा विशेष ध्यान दिएका छौँ । ब्रत सकिएपछि विशेष सरसफाइ गर्नेछौँ ।’ पौडेलले जानकारी दिनुभयो । 

अग्रवाल भवनका प्रतिनिधि गजेन्द्र झाले, कमलपोखरीमा अहिलेको क्षमता ५ जना ब्रतालुको भए पनि स्थान ६ सय जनाका लागि स्थान व्यवस्थापनमा काम गरिरहेको बताउनुभयो । 

काठमाडौँ महानगरपालिकाले विगतका वर्षदेखि कमलपोखरी, गौरीघाट, बोक्सीदह, बागमती दोभान, टङ्केश्वर, बल्खुस्थित कुमारी क्लब क्षेत्र, कुलेश्वर भलिबल ग्राउन्ड र रामघाट लगायत स्थानलाई छठ पूजाका प्रमुख स्थलका रूपमा व्यवस्थापन गर्दै आएको छ । बालाजु बाइसधारा र वंशीघाटलगायत स्थानमा पनि पर्वका अवसरमा घाट निर्माण तथा व्यवस्थापन गरिँदै आएको छ । महानगर प्रहरी बलका प्रमुख विष्णुप्रसाद जोशी भन्नुहुन्छ, ‘ब्रतका दिन लाइन व्यवस्थापन गर्ने, बिरामी र अशसक्तका लागि सम्भावित आकस्मिक सेवा र व्यवस्थापनको काम गर्ने जस्ता कामका लागि हामी तयार छौँ । यसका लागि प्रहरी बल परिचालित हुनेछ ।’