क्षितिज, सिन्दिरा, राजीव र पदमकृष्ण वडाध्यक्ष कप अल नेपाल बुद्धिचाल टुर्नामेन्टका विधागत विजेता

काठमाडौँ । क्षितिज भण्डारी, सिन्दिरा जोशी, राजीब कार्की र पदमकृष्ण श्रेष्ठ वडाध्यक्ष कप अल नेपाल चेस फिडे र्‍यापिड रेटिङ्का विभिन्न विधामा विजेता बन्नुभएको छ । काठमाडौँ महानगरपालिका वडा नं. २८ को आयोजना र थापाथली पार्क चेस क्लवको सहआयोजनामा बागबजारस्थित सहिद शुक्र माध्यमिक विद्यालयमा आयोजना भएको २ दिने ‘पहिलो वडाध्यक्ष कप, अल नेपाल, फिडे र्‍यापिड रेटिङ् चेस टुर्नामेन्ट २०८३’ को विधागत विजेता बन्नुभएको हो । भण्डारीले रेटिङ् १९०० माथि (क्याटागोरी ए)मा, जोशीले महिला खुलामा, कार्की रेटिङ १७०० देखि १८९९ (क्याटागोरी सी)मा र श्रेष्ठ १७०० मुनि र अनरेटेडमा बिजेता बन्नुभएको हो । 

टुर्नामेन्टको ए क्याटागोरीमा शुशिल चौधरी र कमल श्रेष्ठ, खुला महिलामा राधिका पौडेल र कुसुम घिसिङ्, सी क्याटागोरीमा महेन्द्रकुमार साम्बाहाम्फे र सन्देश श्रेष्ठ र डी क्याटागोरीमा विनय थापा र सुदिन नेपालले क्रमशः दोस्रो र तेस्रो स्थान हासिल गर्नुभयो । 

टुर्नामेन्टको समापन अवसरमा वडाध्यक्ष भाइराम खड्गीले विजेतालाई नगद १० हजार रुपियाँ, उपविजेतालाई ७ हजार रुपियाँ र तेस्रो स्थान प्राप्त गर्नेलाई ५ हजार रुपियाँ नगदसहित पुरस्कृत गर्नुभयो । त्यस अवसरमा १० वर्ष मुनिको उमेर समूहमा शुभाषिनी श्रेष्ठलाई महिलातर्फ र प्रसुन मल्ललाई पुरुषतर्फ, १२ वर्ष मुनिको उमेर समूहमा ओजस्वी श्रेष्ठलाई महिलातर्फ र वचन सिलवाललाई पुरुषतर्फ, १४ वर्ष मुनिको उमेर समूहमा शुभेच्छा घिमिरेलाई महिलातर्फ र प्रतीक ढुङ्गेललाई पुरुषतर्फ उत्कृष्ट खेलाडीका रुपमा पुरस्कृत गरियो । यस्तै सुहानी सिंहलाई महिलातर्फ र रिजन अवाछालाई पुरुषतर्फ अनरेटेड उत्कृष्ट खेलाडीका रुपमा पुरस्कृत गरियो । 

वेस्ट इलो २००० मा सुभानदीप थापा र वेस्ट इलो १८०० सयमा आदर्श रिजाल पुरस्कृत हुनुभयो । 

वडा नं. २८ ले आयोजना गरेको च्यायिम्पयनसिपमा ताप्लेजुङ्, पाँचथर, चितवन, सर्लाही, दोलखा, संखुवासभा, कञ्चनपुर, पर्सासहित विभिन्न जिल्लाबाट ९४ जना खेलाडी सहभागी हुनुहुन्थ्यो । 

टुर्नामेन्ट समापन र पुरस्कार वितरण समारोहमा बोल्दै वडाध्यक्ष भाइराम खड्गीले, खेलाडीहरुको उत्साह र सहभागिताबाट कार्यक्रम आयोजनालाई निरन्तरता दिन आफू प्रोत्साहित भएको बताउनुभयो । ‘वडाले आयोजना गरेका युवा लक्षित कार्यक्रममा सहभागिता राम्रो हुने गरेको छ । चेस खेलमा अझ राम्रो सहभागिता पाएँ ।’ उहाँले प्रतिक्रिया दिनुभयो । 

चेसमा चाल जानेर मात्र हुँदैन । रणनीति पनि जान्नुपर्छ । यो सिपले जित्न मात्र होइन । जीवन जिउने सिप र अनुशासन पनि सिकाउँछ । कार्यक्रमका निर्देशक इन्द्रकुमार बस्नेतले भन्नुभयो, ‘हामीले खेलका लागि टुर्नामेन्ट मात्र आयोजना गरेका होइनौँ । चेसलाई समुदाय स्तरमा विस्तार गरेर नयाँ आयाम सिर्जना गर्न चाहन्छौँ ।’

कार्यक्रममा थापाथली पार्क चेस क्लबका अध्यक्ष सानुराम बज्राचार्यले, चेस खेल खेलाउन सञ्चालन हुने एकेडेमीहरु व्यावसायिकताभन्दा माथि उठेर खेल विकास गराउने उद्देश्यबाट प्रेरित हुनु पर्ने आवश्यकता औँल्याउनुभयो । यस्तै बुद्धिचालका पूर्व नेपाल च्याम्पियन नविन तण्डुकारले वितेका ४० वर्षको तुलना गर्दा यस वर्ष धेरै नै प्रतियोगिता सञ्चालन भएकोले आफूलाई खुशी लागेको बताउनुभयो । यसरी नै टुर्नामेन्ट सञ्चालन गर्ने हो भने बुद्धिचाल खेलको विकासले फड्को मार्नेछ । उहाँको अपेक्षा थियो । 

चेस अर्थात् बुद्धिचाल खेलको लोकप्रियताको कुरा गर्दै कार्यक्रममा आर्बिटर ज्ञानेन्द्र खाइजूले भन्नुभयो, ‘विश्वमा सबैभन्दा धेरै आयोजना हुने टुर्नामेन्ट चेस नै हो । यससँगै धेरै छापिने पुस्तकमध्ये चेस सम्बन्धी छपाई दोस्रोमा पर्छ ।’