पूर्व उपप्रधानपञ्च डंगोलको निधन : आइतबार काठमाडौँ महानगरपालिकामा शोक विदा

काठमाडौँ । तत्कालीन काठमाडौँ नगर पञ्चायतका उपप्रधानपञ्च तीर्थराम डंगोलको निधनमा काठमाडौँ महानगरपालिकाले आइतबार शोक विदा दिने भएको छ । आज प्रशासन विभागले सूचना जारी गर्दै शोक विदा सम्बन्धी जानकारी दिएको हो ।  

उहाँको २०८२ वैशाख १२ गते शुक्रबारका दिन निधन भएको  हो । उहाँको निधनमा महानगरपालिकाले गहिरो दुःख र परिवारमा समवेदना प्रकट गरेको छ । 

वि. सं. २००४ साल माघ २९ गते जन्मनुभएका डंगोल लामो समयदेखि पिसाव थैलीको क्यान्सरसँग जुधिरहनुभएको थियो । उहाँको उपचारमा सम्लग्न स्वास्थ्यकर्मीका अनुसार मिर्गौलामा एकैपटक समस्या बढेर डाइलाइसिस गराउनु परेको थियो । हप्तामा २ दिन गराउनु पर्ने डाइलाइसिस गएको विहीबार मात्र पनि गरिएको थियो । 

काठमाडौँ पञ्चायतका लागि २०४३ सालमा भएको निर्वाचनमा उहाँले प्रजातन्त्रबादीका तर्फबाट उम्मेदवारी दिएर विजय हासिल गर्नुभएको थियो ।

उपप्रधानपञ्चका रुपमा उहाँले सहर निर्माण, सहरी व्यवस्थापन र प्रवर्धन तथा सामाजिक सेवामार्फत रुपान्तरणमा पुर्‍याउनुभएको योगदानको सम्मान गर्दै महानगरपालिकाले शोक विदा दिएको हो । यस दिन अत्यावश्यक सेवाबाहेक महानगरपालिका र मातहतका कार्यालयहरुमा शोक विदा रहनेछ । 

स्वर्गीय डंगोलको पार्थिव सरीरमा महानगरपालिकाका उपप्रमुख सुनिता डंगोल, प्रवक्ता नविन मानन्धर, विषयगत समितिका संयोजक तथा जनप्रतिनिधिहरुले पुष्पगुच्छा अर्पण गर्नुभएको थियो । उहाँको आज टेकुमा अत्येष्टि गरिएको छ ।