नगर प्रहरी निरीक्षक नगरकोटीको निधन : आर्यघाटमा अन्त्येष्टि 

काठमाडौँ । काठमाडौँ महानगरपालिकाका नगर प्रहरी निरीक्षक बद्रीमान नगरकोटीको आज पशुपति आर्यघाटमा अन्त्येष्टि गरिएको छ । मिर्गौलामा समस्या देखिएपछि लामो समयदेखि डाइलासिस गराइरहनु भएका नगरकाटीको उपचारका क्रममा आज बिहान निधन भएको हो । 

उहाँलाई महानगरपालिकाका प्रमुख बालेन्द्र शाह (बालेन), प्रमुख प्रशासकीय अधिकृत सरोज गुरागाईँ, महानगर प्रहरी बलका प्रमुख राजुनाथ पाण्डेसहित अधिकारीहरुले आर्यघाटमा पुगेर अन्तिम श्रद्धाञ्जली दिनुभएको थियो । 

महानगर प्रहरी बलका अनुसार जेठ ११ गते घरमा लडेपछि नगरकोटीलाई उपचारका लागि पाटन अस्पताल लगिएको थियो । लडेर अचेत हुनुभएका नगरकोटी चेतमा नआइ परलोक हुनुभएको हो ।  

२०३० साल मंसिर ९ गते जन्मनुभएका नगरकोटीको आज निधन भएको हो । उहाँ २०५० साल भदौ १४ गते नगर प्रहरी सहायक निरीक्षक पदबाट महानगरपालिकाको सेवामा प्रवेश गर्नुभएको थियो ।