स्वास्थ्य र शिक्षालाई सेवामुलक बनाइनेछ : यी प्राथमिक क्षेत्र हुन् — प्रमुख शाह 

काठमाडौँ । काठमाडौँ महानगरका प्रमुख बालेन्द्र शाह (बालेन) ले स्वास्थ्य र शिक्षा क्षेत्र व्यापारिक नभइ सेवामुलक हुनुपर्ने बताउनुभएको छ । आज छत्रपाटी निःशुल्क चिकित्सालयको अवलोकनपछि बोल्दै प्रमुख शाहले यस्तो धारणा राख्नुभएको हो । ‘स्वास्थ्य र शिक्षा मेरो प्राथमिक भिजन एजेन्डा हो । सामुदायिक अस्पताल र सामुदायिक विद्यालयहरुको गुणस्तर बढाउन हामी यही आर्थिक बर्षदेखि काम थालनी गर्नेछौँ । महानगरका आफ्नै वार्ड क्लिनिकहरुको सेवालाई स्तरीय बनाउँदै लानेछौँ । सामुदायिक अस्पतालहरुसँग सहकार्य गर्ने तथा  आफै अस्पताल सञ्चालन गर्ने विषयमा हामी थप छलफल गर्नेछौँ । सामुदायिक विद्यालयको खेल मैदान व्यवस्थापन, सरसफाइ र शिक्षकहरुको तालिमका लागि काम गर्नेछौँ ।’  

अस्पताल अवलोकनपछि आफूले सरसफाइ राम्रो पाएको, कम शुल्कमा सेवा राम्रो दिएको अनुभूति गरेको प्रमुख शाहको भनाइ थियो । नयाँ भवन बनेपछि पार्किङ्को समस्या कम उहाँको विश्वाश थियो । 

अस्पताल अवलोकनका क्रममा उहाँले भौतिक पूर्वाधार र सेवाको अवस्था हेर्नुभएको थियो । 

त्यस क्रममा वडाध्यक्ष नविन मानन्धरले, निःशुल्क सेवाका लागि खोलिएको अस्पतालले मागअनुसार धेरै सेवा दिनु पर्ने भएकोले पूर्ण निःशुल्क उपचारलाई निरन्तरता दिन कठिन भएको परिस्थिति औल्याउनुभयो । ‘विपन्नहरुलाई अझै पनि उपचार निःशुल्क छ । अन्यलाई पनि सेवा शुःक सहुलियत छ ।’ मानन्धरले प्रमुख शाहसँग वडाको अपेक्षा राख्दै भन्नुभयो, ‘विपन्नहरुको निःशुल्क उपचारलाई निरन्तरता दिन १ करोड रुपैयाँको अक्षयकोष स्थापना गरौँ ।’