‘एक वडा, एक नमूना उद्यम’ अन्तर्गत सिप विकास तालिमको अनुगमन : प्रशिक्षार्थीहरुको व्यवसायिक आचरणमा उपप्रमुख डंगोलको जोड

काठमाडौँ । काठमाडौँ महानगरपालिकाका उपप्रमुख एवं अनुगमन समितिका संयोजक सुनिता डंगोलले आज वडा नम्बर १९, २७ र २७ मा पुगेर सिप विकास तालिमको अनुगमन गर्नुभएको छ । एक वडा एक नमूना उद्यम कार्यक्रमअन्तर्गत यस वर्ष थप भएका ८ वटा वडामध्ये यी ३ वटा वडामा उहाँले अनुगमन गर्नुभएको हो । अनुगमनका क्रममा सम्बन्धित वडाका अध्यक्ष, वडा सदस्यहरु, सामाजिक विकास विभागका प्रमुखसहित अधिकारीहरु सहभागी हुनुहुन्थ्यो । 

अनुगमनका क्रममा उपप्रमुख डंगोलले, तालिम लिइरहेका प्रशिक्षार्थीहरुमा व्यवसायिक आचरण खोज्नुभएको थियो । ‘तालिम सिकेपछि आय आर्जन बढ्न सकोस् । यसले घरायसी काममा सहयोग हुन सकोस् । सकेसम्म परिवार सञ्चालनमा सहयोग होस् । कमसे कम आफ्ना लागि आवश्यक पर्ने खर्च कसैसँग माग्नु नपरोस् । यसका लागि सिकेको सिपबाट आय आर्जन हुने उत्पादन गर्नुपर्छ ।’ डंगोलले भन्नुभयो, ‘तालिम सबै लिने, काम कुनै नगर्ने हो भने तालिम लिनुको अर्थ रहँदैन । यसकारण तालिमलाई आत्म निर्भरताका लागि उपयोग गर्न सक्नुहोस् ।’

‘सामान उत्पादन गर्न जानेपछि बजारीकरणको सिप आवश्यक पर्छ । यसका लागि पहिले तपाईँहरु बजारका लागि पर्याप्त सामान उत्पादन गर्न सक्ने हुनुपर्छ । सामान गुणस्तरीय हुनुपर्छ । यसपछि हामी बजारीकरणमा सहयोग गर्छौँ ।’ 
 
अनुगमनका क्रममा वडा नम्बर १९ का अध्यक्ष राजेशकुमार श्रेष्ठले, तालिम लाभदायी भएको बताउनुभयो । यस्तै वडा नम्बर २५ का अध्यक्ष राजेश डंगोलले, मौलिकताको जगेर्ना गर्दै आयमूलक काम गर्न सकिने भएपछि प्रशिक्षार्थीहरुमा खुशी देखिएको धारणा राख्नुभयो । 

वडा नम्बर १९ मा नेवारी पोशाक बनाउने प्रशिक्षण चलिरहेको छ । यहाँ दौरा सुरुवाल, चौबन्दी चोलो, ब्लाउज, कुर्था सुरुवाल सिलाउने प्रशिक्षण भएको छ । यसमा १९ जना प्रशिक्षार्थीले तालिम लिइरहनुभएको छ । यस्तै वडा नम्बर २५ मा डम्बरकुमारी ढाकाका कपडा उत्पादन गर्ने सिप विकास तालिम चलिरहेको छ । यसमा चोलो, खास्टो, व्लाउज, कुर्था, मोबाइल राख्ने पर्स, बालबालिकाका ब्ल्याङ्केट तयार गरिरहनु भएको छ । यसमा २३ जना प्रशिक्षार्थीले तालिम लिइरहनुभएको छ । 

वडा नम्बर २७ मा माटोको मखुन्डो बनाउन तालिम चलिरहेको छ । प्रशिक्षार्थीहरु १९ जना हुनुहुन्छ । उहाँहरुले धरहरा, गणेश, कुमारी, वुद्धको मूर्ति बनाइरहनुभएको छ ।  

एक वडा एक नमूना कार्यक्रमअन्तर्गत यस वर्ष थपिएका वडा नम्बर ११, १९, २०, २३, २५, २८, २८ र ३१ गरी ८ वटा वडामा सिप विकास तालिम चलिरहेको छ । यस्तै वडा नम्बर ३, ४ र २२ स्तरउन्नति सिप विकास तालिम सञ्चालन भइरहेको सामाजिक विकास विभागका प्रमुख समीक्षा निरौलाले जानकारी दिनुभयो । गएको वर्ष १५ वटा वडामा एक वडा एक उद्यम कार्यक्रम थालिएका थिए । यस वर्ष ८ वटा थपिएपछि २३ वटा वडामा कार्यक्रम सञ्चालन हुनेछ । 

यससँगै गरीवी निवारणका लागि लघु उद्यम विकास कार्यक्रमअन्तर्गत पनि तालिम चलिरहेका छन् । कार्यक्रमका वरिष्ठ उद्यम विकास सहजकर्ता देवकी घिमिरेका अनुसार वडा नम्बर १० मा कुकिङ्, हस्तकला र अचार बनाउने तालिम सम्पन्न भएको छ । वडा नम्बर १४ मा अल्लोको झोला र मकैको खोस्टाबाट सामान बनाउने स्तरउन्नति तालिम चलिरहेका छन् ।