Logo
  • वि.सं.: २०८३, कात्तिक ३० सोमबार

  • इ.स.: 2026 November 16,MONDAY

  • वि.सं.: २०८३, कात्तिक ३० सोमबार

  • उदाउँदो सूर्यलाई अर्घ्य दिँदै छठ समापन : हिजो अस्ताउँदो सूर्यलाई अर्घ्य दिन राष्ट्रपति पौडेल गौरीघाटमा र कार्यवाहक प्रमुख डंगोल कमलपोखरीमा

    काठमाडौँमा छठको भव्यता थपिँदो

    काठमाडौँ । आज सूर्योदय कालमा उदाउँदा सूर्यदेवलाई अर्घ्य दिएपछि ४ दिने छठ पर्व सम्पन्न भएको छ । गाईको दूध, फूल र जलले अर्घ्य दिएपछि छठ सम्पन्न हुने धार्मिक विधि छ । हिजो अस्ताउँदो सूर्यलाई अर्घ्य दिएर ब्रतालुहरु नदी, पोखरी तथा तालको किनारामा जाग्राम बसेका थिए । काठमाडौँको गौरीघाटमा पुगेर राष्ट्रपति रामचन्द्र पौडेलले अस्ताउँदो सूर्यलाई अर्घ्य दिनुभएको थियो । यस्तै काठमाडौँ महानगरपालिकाका कार्यवाहक प्रमुख सुनिता डंगोलले, कमलपोखरी पुगेर अस्ताउँदो सूर्यलाई अर्घ्य दिनुभएको थियो । 

    नेपाल पञ्चाङ्ग निर्णायक विकास समितिले स्वीकृति दिएका पात्रोमा आज बिहान ६ बजेर १९ मिनेटमा सूर्याेदय हुने उल्लेख छ । सूर्यको दर्शन गर्दा भक्तहरु लुगासहित कम्मरसम्मको पानीमा डुबेर सूर्य दर्शन गर्ने विधि छ । यसरी सूर्योदय हुनुअघि कम्मरमुनिको भाग पानीमा डुबाएर सूर्यको प्रतीक्षा गरिन्छ । छठ समापनपछि आज छठ घाटमा प्रसाद वितरण गरिन्छ ।

    पृथ्वीमा भएका जीवको सञ्चालन तथा संरक्षण जल र सूर्यबाट भएका विश्वाश गरेर नदीलाई माता, सूर्यलाई सम्पूर्ण शक्तिको स्रोतका रुपमा श्रद्धा गरिन्छ । कार्तिक शुक्ल पक्षमा सूर्यको पूजा गर्नाले मनोकाङ्क्षा पूरा भई इच्छाएको फल प्राप्त हुने धार्मिक विश्वास छ । सूर्यषष्ठी समेत भनिने कार्तिक शुक्ल षष्ठीमा सूर्यको पूजाआराधना गर्ने चलन छ । 

    यस अवसरमा सूर्य पूजा र दर्शन गरी विवाहिता महिला, पुरुषले पति, पत्नीको दीर्घायु एवम् अविवाहिताले सुयोग्य वर, वधु प्राप्ति र मनले चिताएको फल पूरा हुने कामना गर्छन् । सन्तान प्राप्तिको कामना गर्ने दम्पत्तिको संख्या पनि उल्लेख्य पाइन्छ ।   

    कार्तिक शुक्ल चतुर्थीदेखि सप्तमीसम्म मनाइने सूर्यदेवको आराधना, उपासना र पूजाको पर्व शुक्रबारदेखि सुरु भएको हो । चतुर्थीमा स्नान गरी चोखो खाएर बसिन्छ । यस दिनबाट छठ पर्व नसकिएसम्म व्रतालुले माछा, मासु, लसुन, कोदो, फापर, मुसुरो, आदि खानेकुरा खाँदैनन् ।    
      
    मनोकाङ्क्षा पूरा हुने विश्वासमा विशेषगरी महिलाले छठमा कठोर व्रत गर्ने गर्छन् । विशेषगरी तराईमा मनाइने मिथिला संस्कृतिमा आधारित छठ पर्व वि.सं. २०४६ पछि काठमाडौँलगायत पहाडी क्षेत्रमा समेत मनाउन थालिएको हो । विसं २०६३ सालदेखि काठमाडौँको थापाथली, गौरीघाट र रानीपोखरीमा पनि विशेष महत्वका साथ मनाउन थालियो । विसं २०७२ वैशाख १२ गतेको भूकम्पपछि रानीपोखरीमा भने छठ हुन छोडेको छ । पछिल्लो समय कमलपोखरीमा भने भव्य रुपमा छठ हुन थालेको छ ।

    काठमाडौँका बोक्सीदह, बागमती दोभान, टङ्केश्वर, बल्खुस्थित कुमारी क्लब क्षेत्र, कुलेश्वर भलिबल ग्राउन्ड र रामघाट लगायत स्थान छठ पूजाका प्रमुख स्थलका रूपमा विकास हुँदै गएका छन् । बालाजु बाइसधारा र वंशीघाटलगायत स्थानमा पनि पर्वका अवसरमा पूजा स्थल निर्माण तथा व्यवस्थापन गरिँदै आएको छ । 

    यसरी सञ्चालन हुने छठमा महानगरपालिकाले भिड व्यवस्थापन गर्ने, दर्शन र पूजालाई व्यवस्थित गर्ने, बिरामी र अशसक्तका लागि सम्भावित आकस्मिक सेवा र व्यवस्थापनको काम गर्ने जस्ता काम गरिरहेको छ । यससँगै घर पुग्न समस्या भएका श्रद्धालु तथा ब्रतालुहरुलाई घरमै लगिदिने, पानी, स्वास्थ्य सेवा लगायत सुविधा पनि उपलब्ध गराउने गरिएको छ । 

  • प्रकाशित मिति सोमबार ३० कात्तिक २०८३ ०८:१४ AM