सिप मेलाका थप ६ जना प्रशिक्षार्थीलाई थि गोबाट 'अन द जब ट्रेनिङ्' : मासिक पारिश्रमिक १८ हजार रुपैयाँ 

काठमाडौँ । सिप मेला २०८१ बाट अटोमोबाइल्स विधामा सिप सिकेका ५ जना प्रशिक्षार्थीहरुलाई थिगोले ‘अन द जब ट्रेनिङ्’ उपलब्ध गराउने भएको छ । यसका लागि थिगोले १० जना उम्मेदवार अन्तर्वार्ताका लागि छोटो सूचीमा राखेको थियो । उहाँहरुबाट ६ जना ओजेटीका लागि छनोट हुनुभएको हो । ट्रेनिङ्का लागि  छनोट हुनुभएका प्रशिक्षार्थीले मासिक १८ हजार रुपैयाँ पारिश्रमिकसहित प्रशिक्षण प्राप्त गर्नुहुनेछ । यसका लागि आज काठमाडौँ महानगरपालिका, चाँगु नारायण फाउन्डेसन र थिगोका बिच सम्झौता भएको छ । सम्झौतामा महानगरपालिकाको सामाजिक विकास विकासका प्रमुख समीक्षा निरौला, फाउन्डेसनका अध्यक्ष मनिराज खत्री र थिगोका तर्फबाट प्रमुख कार्यकारी अधिकृत सौरभ श्रेष्ठले हस्ताक्षर गर्नुभयो । यो सम्झौता आगामी ६ महिनाका लागि हो । प्रशिक्षणमा जानेहरुले बैशाख १६ गतेदेखि काम थालनी गर्नुहुनेछ । 

मेलाबाट अटोमोबाइल्स विधामा स्नातक भएका १ सय जना प्रशिक्षार्थीहरूमध्ये २० जना प्रशिक्षार्थीहरूले आफ्नै प्रयासबाट रोजगार पाएका छन् । ३ जना स्वरोजगार भएका छन् । अन–दि–जब तालिममा रुचि राख्ने ५१ जना हुनुहुन्थ्यो । उहाँहरुलाई व्यक्तिगत विवरण (सिभी) लेखन कार्यशाला आयोजना गरेर व्यक्तिगत विवरण तयार गर्न, व्यक्तित्व विकास गर्न र अन्तर्वार्तामा प्रस्तुत हुने शैलीका विषयमा प्रशिक्षण प्रदान गरियो । यो कार्यशालामा सहभागी भएका ३० जना प्रशिक्षार्थीहरूका व्यक्तिगत विवरण वि.वाइ.डी., सिजी मोटर्स, हुन्डाइ (लक्ष्मी ग्रुप), भि.जी, मोटर्स, सिप्रदी (टाटा मोटर्स), दीपल अटोमोबाइल्स, सयाकार ट्रेडिङ् इन्टरप्राइजेज र थी गो (दिगो) सहित २८ वटा कम्पनीमा पठाइएको छ । प्रशिक्षार्थीको व्यक्तिगत विवरण पठाइएका कम्पनीहरु यसप्रकारको प्रशिक्षणका लागि तयार छन् । 

अन द जब ट्रेनिङ् सञ्चालनमा काम गर्ने साझेदारका रुपमा महानगरपालिकाले चाँगुनारायण फाउन्डेसनसँग सम्झौता गरेको छ । प्रशिक्षार्थी छनोट गर्ने र आधारभूत तालिम प्रदान काम दुवै पक्षको सहभागितामा हुनेछ । महानगरपालिकाले तालिमको प्रभावकारिताका लागि निरीक्षण गर्ने, आपसी संवाद र मूल्याङ्कन गर्नेछ । फाउन्डेसनले महानगरपालिकासँगको सहकार्यमा प्रशिक्षार्थी छनोट गर्ने, छानिएका प्रशिक्षार्थीहरुलाई मासिक ९ हजार रुपैयाँ पारिश्रमिक उपलब्ध गराउनेछ । बाँकी पारिश्रमिक थिगोले उपलब्ध गराउनेछ । फाउन्डेसनले तालिमको प्रतिवेदन तयार पारेर महानगरपालिकालाई उपलब्ध गराउनेछ ।

यसअघि सिजी मोटर्ससँग सम्झौता गरेर १० जनालाई पठाइएको थियो । उहाँहरुमध्ये वैदेशि रोजगारीको अवसर, पारिवारिकसहित विभिन्न कारण देखाएर ५ जना प्रशिक्षार्थी प्रशिक्षणमा जानुभएन । अहिले सिजीमा ५ जनाले अन–द–जव–ट्रेनिङ् गरिरहनुभएको छ । उहाँहरुले २०८१ चैत २४ गतेदेखि प्रशिक्षण लिन सुरु गर्नुभएको हो । सिजीले २० जनालाई अन्तर्वार्तामा बोलाइएको थियो । अन्तर्वार्ता दिएकामध्ये १० जनालाई ट्रेनिङ्का लागि बोलाइएको थियो । 

तालिममा जानुअघि प्रशिक्षार्थीहरुले प्रतिवद्धता पत्रमा हस्ताक्षर गर्नुभएको छ । जसअनुसार उहाँहरु तोकिएको समयमा नियमित हाजिर हुनुपर्नेछ । उद्योगको नियम र आचरण पालना गर्नुपर्नेछ । सुपरभाइजरको निर्देशन पालना गर्नुपर्नेछ । आपतकालीन अवस्थाबाहेक अन्य समयमा विदामा बस्न वा गयल हुन पाइँदैन । विचमा तालिम छोड्न पाइँदैन । यदि स्वेच्छाले तालिम छाडेमा तालिमको खर्च व्यहारेर मात्र छोड्न पाइनेछ ।  

प्रतिवद्धता पत्रमा हस्ताक्षर गर्नुअघि उहाँहरुले, ओजेटीमा जाँदा एउटै मात्र काम गर्न लगाइन्छ । धेरै कुरा सिक्न पाइँदैन भन्ने गुनासो सुनेका छौँ । यसो हुँदा त हाम्रो क्षमता विकास हुन पाउँदैन । वास्तविकता के हो? भन्ने प्रश्न गर्नुभएको थियो । प्रश्नको जवाफमा थिगोका प्रतिनिधिले, उद्योगका व्यवहारिक अभ्यास सबै सिक्न, प्रयोग गर्न र अनुभव गर्ने अवसर प्रदान गरिने बताउनुभयो । यसको अर्थ ६ महिनाभित्रै विज्ञ भइन्छ भन्ने चाहिँ होइन । उहाँहरुले स्पष्ट पार्नुभयो ।  

फाउन्डेसनसँगको सहकार्यको समीक्षा
सामाजिक विकास विभागमा महानगरपालिकाले चाँगुनारायण फाउन्डेसनसँग थालेको सहकार्यका विषयमा समीक्षा भएको छ । सिपमेला २०८१ बाट प्रशिक्षण लिएका प्रशिक्षार्थीहरुलाई अन द जब ट्रेनिङ् प्रदान गर्न कम्पनी तथा उद्योगहरुसँग समन्वय गर्ने, प्रशिक्षार्थी छनोट गर्ने, प्रशिक्षार्थीहरुलाई मासिक ९ हजार रुपैयाँ पारिश्रमिक उपलब्ध गराउने काम फाउन्डेसनले गरिरहेको छ । सम्झौता भएपछि यस अघि सिजी मोटर्स र आज थिगोसँग सम्झौता गराउन फाउन्डेसनले काम गरेको हो । 

समीक्षामा मेलाबाट छोटो अवधिका लागि तालिम लिएकाहरुलाई नियमित गराउने योजना कस्ता हुन सक्लान्? क्षमता बढाउने तालिमको निरन्तरता सम्भव कसरी बनाउने? अन द जब ट्रेनिङ्मा गएकाहरुलाई रोजगारी क्षेत्रमा आवद्ध गराउन तथा स्वरोजगार बनाउने योजना

कार्यान्वयन लगायत विषयमा कुराकानी भएको थियो । 
समीक्षामा सामाजिक विकास विभाग, स्वीस एजेन्सी फर डिभलपमेन्ट एण्ड कोअपरेसन र फाउन्डेसनका प्रतिनिधिहरु सहभागी हुनुहुन्थ्यो । 

सिप मेला २०८१
महानगरपालिकाले गएको वर्ष विश्व श्रमिक दिवस २०८१ (वैशाख १९) को अवसर पारेर टुँडिखेलमा ‘सिप मेला २०८१’ आयोजना गरेको थियो । ‘स्वरोजगार’, ‘रोजगार’ र ‘अन द जब टे«निङ्’ उपलब्ध गराउने लक्ष्य राखिएको मेलामा तालिम लिनका लागि ६८ हजार ८६६ जनाको आवेदन दिनुभएको थियो । १० वटा विधाका ३० वटा पेशासँग सम्बन्धित तालिम कक्षा सञ्चालन भएका थिए । १५ दिन र ३० दिन अवधिका तालिमबाट २ हजार ७१५ जना प्रशिक्षार्थीले तालिम लिनुभएको छ ।  

तालिम सञ्चालनकै अवधिका निजी, उद्योग तथा वाणिज्य, शैक्षिक र सामाजिक क्षेत्र तथा दातृ निकायका प्रतिनिधिहरुसँग सिप मेलाबाट उत्पादन भएका सिपयुक्त जनशक्तिलाई रोजगारी उपलब्ध गराउने संयन्त्र निर्माणका लागि ‘नीति संवाद’, ‘अन्तरक्रिया’ र ‘रोजगार मेला’ आयोजना गरिएको थियो । २ दिन चलेको रोजगार मेलामा ७० भन्दा धेरै कम्पनी तथा संघसंस्थाका प्रतिनिधि आएर सिपयुक्त जनशक्तिसँग भेटेर कुरा गर्नुभएको थियो ।