वडा १७ बाट नागरिक विद्युतीय सुशासन सेवा प्रारम्भ 

काठमाडौँ । काठमाडौँ महानगरपालिकाको वडा नं. १७ बाट नागरिक विद्युतीय सुशासन सेवाअन्तर्गत एकीकृत प्रणाली प्रारम्भ भएको छ । वडाध्यक्ष एवं महानगरका प्रवक्ता नविन मानन्धरले डिजिटल सिग्नेचरको टोकन प्रयोग गर्दै सेवा शुभारम्भ गर्नुभएको हो ।  सेवालाई अन्य वडामा क्रमशः विस्तार गर्दै लगिनेछ । 

सेवा थालनीपछि प्रवक्ता मानन्धरले भन्नुभयो, ‘हाम्रो लक्ष्य पेपरलेस हुँदै फेसलेस गभर्नान्ससम्मको हो । प्रारम्भमा परम्परागत प्रणाली र प्रविधिलाई सँगै सञ्चालन गरिनेछ । जुन दिनबाट पूर्ण रुपमा विद्युतीय सेवा सञ्चालन गर्न सकिन्छ त्यो दिनबाट कागजको प्रयोग बन्द हुनेछ ।’ 

‘वडा कार्यालय महानगरका होइनन्, यी जनताका कार्यालय हुन् । यहाँबाट प्रवाह हुने सेवालाई जनताले आफ्नै हो भनेर महसुस गराउने हाम्रो प्रयास हो ।’ प्रवक्ता मानन्धरले भन्नुभयो, ‘विद्युतीय शासनका लागि युवा पहिलो प्रयोगकर्ता बन्छन् । यसलाई बढाउँदै लगेर सबैको पहुँचमा पु¥याउने लक्ष्य छ ।’

प्रणाली सञ्चालनका लागि विकासकर्ताका विज्ञहरुले सहयोग गर्नेछन् । वडाले नियुक्त गरेका वडास्तरीय परामर्शदाताले वडाध्यक्ष, वडा सचिव र सेवासँग सम्बन्धित कर्मचारीहरुलाई सहजीकरण गर्नेछन् । 

प्रणालीमा इ—शिफारिस, दर्ता चलानी सेवा छन् । सेवाग्राहीले काठमाडौँ महानगरपालिकाको मोवाइल एप्लिकेसन केएमसी एपबाट आफ्ना विवरण भरेपछि ती तथ्याङ्क तथा सूचना वडा सचिवकोमा पुग्छन् । त्यहाँबाट प्रक्रिया सुरु हुन्छ । यसको प्रमाणीकरणका लागि वडा सचिवहरुलाई डिजिटल हस्ताक्षर टोकन दिइसकिएको छ । 

एकीकृत विद्युतीय शासन प्रणालीका विकासकर्ता स्मार्ट पालिकाका निर्देशक मनोज भट्टराईकाअनुसार वडा तहबाट प्रवाह गर्नु पर्ने ८८ प्रकारका सेवामध्ये ४५ प्रकारका शिफारिस सेवालाई प्रणालीमा प्रविष्ट गराइसकिएको छ । यसलाई वडाबाट आफैँले सेवा थप गर्न सकिने बनाइएको छ ।