खोप छुटेका बालबालिका पत्ता लगाउन काठमाडौँ महानगरपालिका घरधुरी सर्वेक्षण गर्दै

काठमाडौँ । नियमित खोप लगाउन छुटेका बालबालिका पत्ता लगाउन काठमाडौँ महानगरपालिकाले बैशाख २४ गतेदेखि ३० गतेसम्म घरधुरी सर्वेक्षण गर्ने भएको छ । स्वास्थ्य विभागका महाशाखा प्रमुख सजिना महर्जनका अनुसार पूर्ण खोप सुनिश्चितता र प्रमाणीकरण गर्न, पूर्ण खोप घोषणा सुनिश्चितता निर्देशिका बमोजिम खोप लगाउन छुटेका बालबालिका खोजी गर्न लागिएको हो । यो खोजीबाट १६ महिनादेखि ५९ महिना उमेर समूहका बालबालिकाहरुमा खोपको अवस्था पहिचान गरिनेछ । ५ बर्ष उमेर समूहका बालबालिकाको जनसंख्याको आधारमा स्वास्थ्यकर्मी र महिला स्वास्थ्य स्वयंसेविका परिचालन गरेर खोजी तथा सर्वेक्षण कार्य हुनेछ । यसबेला भेटिएका बालबालिकालाई बैशाख ३१ गते बोलाएर खोप दिने व्यवस्था मिलाइनेछ ।

राष्ट्रिय खोप तालिका अनुसार बृहत खोज र खोप अभियान अन्तर्गत नियमित खोप लगाउनु पर्ने र यसअघि छुटेका बालबालिकालाई भोलि अर्थात् बैशाख १५ गते शुक्रबार पनि खोप दिइनेछ । महाशाखा प्रमुख महर्जनका अनुसार तालिकाअनुसार नियमित खोप लगाउनु पर्ने वा छुटेका सबै बालबालिकाका लागि महानगरपालिका अन्तर्गतका सबै स्वास्थ्य संस्थाबाट खोप दिइनेछ । यसको सबै तयारी पूरा भइसकेको छ ।

नेपालमा बैशाख महिनालाई खोप महिनाको रुपमा मनाउने गरिएको छ । काठमाडौँ महानगरपालिकाले खोप महिनाको रुपमा मनाउन विभिन्न क्रियाकलापहरु सञ्चालन गरिरहेको छ ।

पहिलो खोप बच्चा जन्मिने वित्तिकै बिसीजी खोप लगाइन्छ । दोस्रो खोप ६ हप्तामा रोटा, पोलियो, पीसीभी, डीपीटी, हेब बी—हिब खोप दिइन्छ । तेस्रो खोप जन्मेको १० महिनामा दिइन्छ । यसमा ६ महिनामा दिइएको खोपको दोस्रो मात्रा दिइन्छ । चौधौँ हप्तामा चौथो खोप दिइन्छ । यसमा पोलियो, एफआइपीभी, डीपीटी र हेब वी—हिब खोप लगाइन्छ । ९ महिनामा पाँचौँ खोप लगाइन्छ । यसमा एफआइपीभी, पीसीभी र रुवेला दादुरा खोप लगाइन्छ । १२ महिनामा छैटौँ पटक खोप दिइन्छ । यस पटक दिइने खोप जापानीज इन्सेफालाइटिस हो । १५ महिनामा सातौँ खोप दिइन्छ । यो खोप रुवेला दादुराको दोस्रो मात्रा हो । यसैबेला टाइफाइडको खोप पनि लगाइन्छ ।