मापदण्ड विपरीतका २ वटा अस्पतालमा ताला

काठमाडौँ । दर्ता नै नगरी सञ्चालनमा रहेका काठमाडौँ महानगरपालिकाका २ वटा अस्पतालमा आज काठमाडौँ महानगरपालिकाले ताला लगाएको छ । दर्ता नगरी सञ्चालनमा रहेको वडा ६ बौद्धको चाइनिज पिपुल्स अस्पताल र वडा ३२ काटेश्वरमा रहेको सहयात्री अस्पतालमा जनस्वास्थ्य विभागले ताला लगाएको हो । 

स्वास्थ्य जस्तो संवेदनशील सेवा प्रदान गर्ने ठाउँ दर्ता नै नभएको पाइएपछि बन्द गराएका हौँ । जनस्वास्थ्य विभागका प्रमुख रामप्रसाद पौडेल भन्नुहुन्छ, ‘मानिसको बाँच्न पाउने अधिकारसँग जोडिएको क्षेत्र हो । यसमा हुने सानातिना त्रुटी र लापर्वाहीले मानिसको मृत्यु हुन सक्छ । गलत औषधिको प्रयोगले जीवन अझ अस्वस्थ्य हुन्छ । दर्ता नै नगरी सञ्चालन हुने स्वास्थ्य संस्था न सरकारप्रति जिम्मेवार छन्, न नागरिकप्रति । यसकारण हामीले बन्द गराएका हौँ ।’

महानगरले ताला लगाउँदा जम्मा भएका स्थानीयहरु निगरानी बढाएर नियम विपरीतका सबै स्वास्थ्य संस्थालाई बन्द गराउनु पर्ने, औषधिलाई सहज र पहुँचयुक्त बनाउनु पर्ने प्रतिक्रिया दिइरहेका थिए । 

दुवै अस्पताल १५/१५ शय्याका हुन् । चाइनिज पिपुल्स अस्पतालमा अक्युपङ्चर र पाइल्सको उपचारका लागि मानिसहरु आउने गरेका थिए । विभागका प्रमुख पौडेलका अनुसार सहयात्रीमा गर्भपतन सेवा दिने गरिएको थियो । 

विभागले लक्षित बर्गलाई उपलब्ध गराउनु पर्ने सेवाको नियमित निगरानी र अनुगमन गरिरहेको छ ।  

तस्विर : कृष्ण कट्टेल