विश्वकपका उपविजेता नेपाली नेत्रहीन महिला क्रिकेट टोलीलाई काठमाडौँ महानगरपालिकाबाट नगदसहित सम्मान

काठमाडौँ । फस्ट विमेन्स टीट्वान्टी वर्ल्डकप क्रिकेट फर द ब्लाइन्ड २०२५ मा उपविजेता बनेको नेपाली टोलीलाई काठमाडौँ महानगरपालिकाले आज नगदसहित सम्मान गरेको छ । क्रिकेट एशोसिएसन फर द व्लाइन्ड इन इन्डियाले आयोजना गरेको वर्ल्डकपमा नेत्रहीन महिला क्रिकेट टोलीले भाग लिएको थियो । वर्ल्डकप गएको कार्तिक २४ गतेदेखि मंसिर ७ गतेसम्म भारत र श्रीलंकामा आयोजना भएको थियो । वर्ल्डकपका उपविजेता टीमलाई महानगरपालिकाका प्रमुख बालेन्द्र शाह (बालेन)ले सम्मान गर्नुभएको हो । खेलाडीहरुले जनही १ लाख रुपियाँ र व्यवस्थापकले जनही ५० हजार रुपियाँ प्राप्त गर्ने गरी प्रमुख शाहले, नेत्रहीन क्रिकेट संघ नेपाललाई एकमुष्ट १८ लाख ५० हजार रुपियाँ प्रदान गर्नुभएको थियो । 

खेलाडीहरुको सम्मान तथा प्रोत्साहनका लागि आयोजना गरिएको कार्यक्रममा प्रमुख प्रशासकीय अधिकृत सरोज गुरागाईँ, प्रवक्ता नविन मानन्धर, सामाजिक विकास समितिका संयोजक रामकुमार के. सी., समितिका सदस्यहरु, कार्यपालिका सदस्यसहित क्रिकेट टोली, प्रशिक्षक र व्यवस्थापक सहभागी हुनुहुन्थ्यो ।

कार्यक्रममा बोल्दै सामाजिक समितिका संयोजक के. सी. ले नेत्रहीन महिला क्रिकेट टोलीलाई आगामी प्रतिस्पर्धाका लागि आवश्यक पर्ने व्यवस्थापकीय सहयोग महानगरपालिकाले उपलब्ध गराउने बताउनुभयो । ‘क्रिकेट खेलमा जितका लागि खेलाडीहरुमा जत्तिकै दर्शकहरुमा पनि इमोसन हुन्छ । यसकारण खेलले खेलाडीसँगै दर्शकहरुलाई समान रुपमा बाँधेको हुन्छ । सबैलाई जोड्ने यो खेलको विकासका लागि हामी नियमित काम गर्नेछौँ ।’ के. सी. को भनाइ थियो ।

‘आज प्राप्त गरेको सम्मान सरकारका तर्फबाट पाएको पहिलो सम्मान हो । यसकारण यो सम्मानको मूल्य नगद वा जिन्सी वस्तुसँग तुलना हुँदैन ।’ टीम क्याप्टेन गीता पौडेलले भन्नुभयो, ‘हाम्रा लागि खेल अभ्यास गर्ने मैदानको खाँचो छ । काठमाडौँ महानगरपालिकाले हाम्रा लागि त्यो पूर्वाधार उपलब्ध गराउँछ भन्ने विश्वाश गरेका छौँ ।’ कार्यक्रममा टोली नेता पवन घिमिरेले भन्नुभयो, ‘खेलाडीहरुलाई बोलाएर गरिएको यो कार्यक्रम सम्मान मात्र होइन । खेलाडीहरुलाई प्रदान गरिएको पहिचान र हौसला पनि हो । यो अमूल्य छ । अबको हाम्रो अपेक्षा भनेको महानगरपालिकाले पारा स्पोर्टस एकेडेमी बनाउँछ भन्ने हो ।’ 

उपविजेता टोलीमा कप्तान गीता पौडेल र उपकप्तान विनिता पुन हुनुहुन्छ । टोलीमा सुस्मा तामाङ्, पुनमकुमारी चौधरी, लक्ष्मी लामा, प्रतिभा राई, इसरामाया लुङ्गेली, दिल्लीसरा धमला, सरिता घिमिरे, मनकेसी चौधरी, विनिता सोमाइ, कान्ती चौधरी, बिमला राई, सुजिता थापा, एञ्जिला ढकाल र सुनिता भुजेल हुनुहुन्छ । 

खेलका प्रशिक्षक पुरनसिंह खत्री, सहप्रशिक्षक नहेन्द्र निरौला, व्यवस्थापक भगवती भट्टराई बराल, सहव्यवस्थापक भावना के. सी. र टोली नेता पवन घिमिरे हुनुहुन्छ ।