परम्परागत गुठीगहनालाई हेर्ने महानगरको दृष्टि समान छ - प्रमुख शाह

काठमाडौँ । काठमाडौँ महानगरका प्रमुख बालेन्द्र शाह (बालेन) ले धार्मिक तथा सांस्कृतिक समुदायलाई जातका आधारमा भेदभाव नगरिने बताउनु भएको छ । आज नेपाल खड्गी सेवा समितिको ज्ञापन पत्र बुझ्दै उहाँले यस्तो बताउनु भएको हो । महानगरको सभा कक्षमा समितिका अध्यक्ष अन्जिता खड्गीले प्रमुख शाहलाई ६ बुँदे ज्ञापन पत्र बुझाउनु भएको थियो । त्यस क्रममा प्रमुख शाहले भन्नुभयो, 'बाजागाजा, भाषा, संस्कृति र्सम्पदा बचाउने नीतिअन्तर्गत हामी काम गरिरहेका छौँ । म आफैँ पनि विभिन्न बाजा बजाउँछु । बाजागाजा, कला र कलाकार बचाउन मेरो प्रयास सधैँ रहनेछ ।' 

जात्रा, पर्व तथा सामाजिक गतिविधिका लागि दिइने अनुदानका बिषयमा कुरा गर्दै उहाँले भन्नुभयो, 'यसका लागि हामी प्रणाली बनाउँछौँ । जुन प्रणालीलाई ब्यक्ति परिवर्तनले फरक नपरोस् ।' 

त्यस क्रममा बोल्दै उपप्रमुख सुनिता डंगोलले भन्नुभयो, 'नेवार समुदायभित्रको सांस्कृतिक विविधता काठमाडौँको सौन्दर्य हो । पहिचान हो । यसलाई जोगाउन महानगरले सबै गुठी गहनालाई समान व्यवहार गर्छ ।' उहाँले त्यस क्रममा सामाजिक सद्भाव बचाउन सबै पक्षबाट सहयोगको अपेक्षा गर्नुभयो । हरेक समुदायलाई हामी समान दृष्टिले हेर्छौँ । सबैको महत्वलाई मनन गरेर कार्यक्रमहरुका सन्दर्भमा आन्तरिक छलफल गर्छौँ । 

गएको बर्ष विविध कारणले गुठीहरुले प्राप्त गर्न नसकेको सहयोग महानगरले आर्थिक बर्ष २०७९/०८० मा उपलब्ध गराउनेछ । महानगरका प्रमुख प्रशासकीय अधिकृत लोकनाथ पौड्यालले प्रतिबद्धता ब्यक्त गर्नुभयो । 

बर्षौँदेखि समुदायले चलाउँदै आएका गुठीगहना, जात्रा तथा पर्व बचाउन महानगर सहयोग थप्दै जानुपर्ने समितिका संरक्षक मनोज नेवा:खड्गीको भनाई थियो ।

नेवार समुदाय आपसमा मिलेर बसेका छन् । जात्रा पर्वका कामहरु आपसमा बाँडिएका हुन्छन् । समितिका अध्यक्ष खड्गीले भन्नुभयो, 'महानगरले सबैलाई समान सहयोग गर्‍यो भने मात्र परम्परा धानिन्छ । नत्र परम्पराका अङ्गहरु छुट्दै जान्छन् । त्यो अवस्थालाई महानगरले बचाउनु पर्छ ।'

खड्गी समुदायका ३२ वटा  गुठी र नाय खिँ बाजा खलका थकाली र गुरुहरुको प्रतिनिधित्व थियो ।

तस्विर : बिनय शाक्य