तालिमबाट प्राप्त हुने व्यक्तित्वबाट आत्मनिर्भरता बढाउनुपर्छ - प्रवक्ता, मानन्धर

काठमाडौँ । काठमाडौँ महानगरपालिकाका प्रवक्ता नविन मानन्धरले, तालिमबाट प्राप्त व्यक्तित्वलाई आत्मनिर्भरता बढाउन प्रयोग गर्नु पर्ने बताउनुभएको छ । वडाले सेल्फ मेकअप (श्रृङ्गार) का लागि प्रदान गरेको तालिम समापन गर्दै उहाँले, मुहार र मुहारबाट प्रकट हुने व्यक्तित्वको मूल्य अतुलनीय हुने बताउँदै यस कलाले पारिवारिक तथा सामाजिक सम्बन्धलाई आत्मीय बनाउने धारणा राख्नुभयो । 

सामाजिक विकासका लागि वडाका योजना सुनाउँदै उहाँले भन्नुभयो, ‘हामी महिलाहरुका लागि मोटरसाइकल तालिम प्रदान गर्दैछौँ । यसका लागि ९० जनाको आवेदन आइसकेको छ । फोहर वर्गीकरणमार्फत घर र वातावरणीय स्वच्छता वृद्धि गर्ने, कार्यालयहरुमा काम गर्नका लागि प्रस्ताव लेखन, नृत्य लगायतका प्रशिक्षण सञ्चालन गर्दैछौँ ।’ यसरी प्रदान गरिने तालिमबाट व्यक्तिमा आत्मविश्वास बढाउने र सहरको सामाजिक विकासमा योगदान गर्ने हाम्रो लक्ष्य हो । उहाँको भनाइ थियो । 

त्यस क्रममा नेपाली कांग्रेसकी महिला नेतृ सिर्जना सिंहले, सौन्दर्य कला भएका महिला स्वदेश तथा विदेश जहाँ पनि आत्मनिर्भर हुन सक्ने धारणा राख्दै प्राप्त सिपको प्रयोग र स्तरोन्नतिमा ध्यान दिनुपर्ने बताउनुभयो । 

तालिमका संयोजक एवं वडा सदस्य कमला महर्जनले, तालिम लिएकाहरुले पार्लर खोलेर व्यवसाय नगरे पनि आफ्नो पार्लरको खर्च बचाए भने पनि पारिवारिक खर्चमा योगदान पुग्ने धारणा राख्नुभयो । उहाँका अनुसार सौन्दर्य कला हो, उत्ताउलोपन होइन । वडा सदस्य कविता दास भन्नुहुन्छ, सन्तुलित सामाजिक विकासका लागि महिला लक्षित कार्यक्रमले नतिजा प्रदान गरिरहेका छन् । समतामूलक समाजका लागि यो महत्वपूर्ण उपलब्धी हो । 

प्रशिक्षक अनिता महर्जनले, प्रशिक्षार्थीहरुका व्यवहारमा परिवर्तन आएकोले तालिम प्रभावकारी भएको प्रतिक्रिया दिनुभयो । उहाँका अनुसार ७ दिनको तालिममा श्रृङ्गारका लागि आवश्यक पर्ने सामानहरुको चिनारी र प्रयोग गर्ने तरिका, सिम्पल मेक अप, पार्टी मेकअप, स्मोकी आइ मेकअप, हाफ कट क्रिज मेकअप, वेहुली मेकअपका सैद्धान्तिक ज्ञान प्रदान गर्दै अभ्यास गराइएको थियो । एकजना महिला आफू र आफ्ना परिवारका लागि मेक अप गर्दा मासिक २ हजार रुपैयाँदेखि ५ हजार रुपैयाँसम्म बचत हुन सक्ने प्रशिक्षकहरुको भनाइ छ ।

जेमिनी युनिसेक्स सलोन एण्ड मेकअप स्टूडियोको प्राविधिक सहयोगमा २ चरणमा२ चरणमा वडाले सञ्चालन गरेको तालिममा ४० जनाले प्रशिक्षण लिनुभएको छ । पहिलो चरणको तालिम बैशाख ७ गतेदेखि र दोस्रो चरणको तालिम त्यही महिनाको १९ गतेदेखि सुरु गरिएको थियो ।