‘विद्यार्थीहरुलाई औपचारिक शिक्षासँगै प्राविधिक ज्ञान र व्यावहारिक सिप तथा आचरण विकास गराउने प्रयासमा छौँ’ - प्रवक्ता मानन्धर 

काठमाडौँ । बालबालिकाहरुलाई औपचारिक शिक्षासँगै प्राविधिक र व्यावहारिक सिप तथा आचरण विकासमा काम गरिरहेको बताउँदै काठमाडौँ महानगरपालिकाका प्रवक्ता नविन मानन्धरले, अहिले पढाइमा राम्रो अंक ल्याएसँगै परिवारलाई सम्मान गर्न जान्ने नागरिक उत्पादन गर्नु पर्ने बेला आएको धारणा राख्नुभएको छ । वडा नं. १७ भित्रबाट गएको वर्ष एसईई उत्तीर्ण गरेका विद्यार्थीहरुलाई शैक्षिक प्रोत्साहनका वडाले आयोजना गरेको सम्मान कार्यक्रममा विद्यार्थीहरुलाई सम्मानित गर्दै उहाँले यस्तो बताउनुभएको हो । 

‘औपचारिक शिक्षामा अब्बल हुनु राम्रो हो । यससँगै घर व्यवहारका कुरा पनि सिकेको हुनुपर्छ । परिवारमा रहनुभएका आमाबुबा, दाजुभाइ, दिदीवहिनीलाई सम्मान गर्ने हुनुपर्छ । व्यक्तिगत स्वतन्त्रताभन्दा पारिवारिक समृद्धिमा रमाउने हुनुपर्छ ।’ उहाँले भन्नुभयो, ‘यसका लागि हामी काम गरिरहेका छौँ ।’

सम्मान कार्यक्रममा ४ जीपीए प्राप्त गर्ने २ जनासहित ३७ जना विद्यार्थीलाई चाँदीजडित तक्मासहित प्रमाण पत्रबाट सम्मान गरिएको थियो । यस्तै सेवा प्रारम्भ गरेदेखि निवृत्त हुञ्जेल वडामै रहेर काम गर्नुभएकी कार्यालय सहयोगी गीता के. सी. लाई पनि सम्मान गरिएको थियो । 

वडा १७ भित्र शान्ति शिक्षा मन्दिर मा. वि., कन्या मा. वि., बाल विकास आधारभूत विद्यालय र राष्ट्रिय आधारभूत विद्यालय गरी ४ वटा सामुदायिक विद्यालय छन् । यस्तै १७ वटा संस्थागत विद्यालय छन् । 

प्रवक्ता मानन्धरले कार्यक्रममा सामुदायिक शैक्षिक गुणस्तर सुधारका लागि कक्षा ८ देखि १० सम्मका विद्यार्थीहरुको नतिजा सुधारका लागि अतिरिक्त अंग्रेजी कक्षाहरु सञ्चालन गरिएको बताउनुभयो । ‘भाषालाई औपचारिक प्रयोगका लागि मात्र सिकाएर हुँदैन । यसको प्रयोग सामान्य जनजीवनमा पनि गरिनुपर्छ । यसका लागि थप अंग्रेजी कक्षाको व्यवस्था गरेका हौँ ।’ उहाँको भनाइ थियो । 

सम्मान कार्यक्रमका संयोजक एवं वडा सदस्य जितेन्द्र खड्गीले, वडाबाट सबै उमेर समूहका लागि छुट्टाछुट्टै कार्यक्रम सञ्चालन गरिएको र ती सबै कार्यक्रमको उद्देश्य सामाजिक सद्भाव र विकास रहेको बताउनुभयो । 

सम्मानपछि बोल्दै एसईई उत्तीर्ण विद्यार्थीहरु दृष्टि मानन्धर, पियुश श्रेष्ठ र निशंका रिजालले, वडाबाट प्राप्त गरेको सम्मानले शिक्षा र समाजप्रति समान दायित्व बोध गराएको धारणा राख्नुभयो । ‘विद्यालयमा पढ्दा औपचारिक ज्ञान पाएका थियौँ । वडाले कार्यक्रम आयोजना गरेर बोलाएपछि सामाजिक र पारिवारिक जिम्मेवारी बुझ्न पायौँ ।’ उहाँहरुको भनाइ थियो । 

कार्यक्रममा अभिभावकका तर्फबाट धारणा राख्दै प्रतिमा मानन्धरले, शैक्षिक क्रियाकलापमा हरेक समयका फरकफरक चुनौती रहेको बताउनुभयो । आफूले एसएलसी दिएको स्मरण गर्दै उहाँले भन्नुभयो, ‘एसएसी दिएपछि म डाक्टर बन्न चाहन्थेँ । बुबा इञ्जिनियर बनाउन चाहनुहुन्थ्यो । आखिर मैले आफ्नो इच्छा त्यागेर बुबाको इच्छा पूरा गर्न लागेँ । अहिले शिक्षामा अभिभावकले विद्यार्थीको कुरा बुझेको जस्तो लाग्छ । तर, व्यावहारिक ज्ञान घट्दै गएको छ ।’ त्यस्तै अभिभावक रञ्जिता बज्राचार्यले, वडाको सम्मानबाट विद्यार्थीहरु कर्तव्यप्रति थप जिम्मेवार भएको आफूले महसुस गरेको बताउनुभयो ।