सामुदायिक विद्यालयहरुलाई वडा २६ बाट कम्प्युटर ल्याब प्रदान 

काठमाडौँ । काठमाडौँ महानगरपालिकाको वडा नम्बर २६ ले शान्ति विद्यागृह माध्यमिक विद्यालय, लैनचौर र लोकहित आधारभूत विद्यालय, ठमेललाई कम्प्युटर ल्याब निर्माण गरिदिएको छ । यी विद्यालयहरुमा क्रमशः ३२ वटा र १० वटा कम्प्युटरसहितको ल्याब निर्माण गरेपछि शुक्रबार वडाध्यक्ष एवं महानगरपालिकाको सुशासन समितिका संयोजक ख्यामराज तिवारीले हस्तान्तरण गर्नुभयो । यसका लागि वडाले ४० लाख रुपियाँ विनियोजन गरेको थियो ।  सार्वजनिक खरिद प्रक्रियाबाट करबाहेक २७ लाख ७६ हजार २ सय रुपैयाँ कम्प्युटर खरिद गरेर ल्याव स्थापना गरिएको हो । वडाले शान्ति विद्या गृहलाई गएको वर्ष ६५ इञ्चका २० वटा डिजिटल बोर्ड हस्तान्तरण गरेको थियो । सार्वजनिक खरिद प्रक्रियाबाट ती बोर्डहरु ४३ लाख ५९ हजार ५४० रुपियाँमा प्राप्त भएका थिए । 

ल्याब हस्तान्तरण गर्दै वडाध्यक्ष तिवारीले भन्नुभयो, ‘सामुदायिक विद्यालयहरुको नतिजा सुधारका लागि हामीले पूर्वाधार, सामान तथा उपकरण र प्रविधिमा लगानी बढाएका छौँ । शान्ति विद्या गृहमा भवन निर्माणमा वडाले खरिद प्रक्रिया अगाडि बढाएको छ । हामीले गरेका लगानी नतिजा सुधारका लागि हो । विद्यालयहरुले यो सहयोगलाई  नतिजाबाट प्रत्याभूति गराउनुपर्छ ।’ 

शैक्षिक गुणस्तर विकासका लागि वडाले विद्यालयहरुमा ल्याएका कार्यक्रम सकारात्मक छन् । पूर्व वडाध्यक्ष वर्षाराम भण्डारीले भन्नुभयो, ‘वडाका कार्यक्रमले भविष्यका आवश्यकतालाई समेत सम्बोधन गर्न क्षमता राख्छन् भन्ने मेरो बुझाइ हो ।’ वडाका सचिव केदार रिमालले परिवर्तित स्थानीय आवश्यकता र विश्व परिवेश हेरेर प्रतिस्पर्धी जनशक्ति उत्पादनका लागि लगानी वडाले लगानी गरेको हो । 

विद्यागृहका प्रधानाध्यापक विष्णुप्रसाद ढकालले ल्याबका सामान बुझिसकेपछि शिक्षण सिकाइका लागि प्राप्त स्रोतको अधिकतम उपयोग गरिने प्रतिवद्धता व्यक्त गर्नुभयो ।