वि.सं.: २०८३, मंसिर १ मंगलबार
इ.स.: 2026 November 17,TUESDAY
वि.सं.: २०८३, मंसिर १ मंगलबार
नेपालका लागि जापानका राजदूत मायदाबाट काठमाडौँ महानगरपालिकाका कार्यवाहक प्रमुखलाई भेटेर निमन्त्रणा
काठमाडौँ । नेपालको काठमाडौँ र जापानका विभिन्न सहरमा बस्ने नागरिक स्तरमा आत्मीय सम्बन्ध रहेको बताउँदै काठमाडौँ महानगरपालिकाका कार्यवाहक प्रमुख सुनिता डंगोलले, यो सम्बन्धलाई आपसी ज्ञान, सिप र क्षमता आदानप्रदान तथा हस्तान्तरण गर्ने दिशामा उपयोग गर्दै लगिने बताउनुभएको छ । नेपाल र जापानका बिचमा कुटनीतिक सम्बन्ध स्थापना भएको ७० वर्ष पूरा भएको अवसरमा मंसिर ६ गते काठमाडौँको दरबारमार्गमा ‘संस्कृतिमार्फत ऐक्यवद्धता’ नारासहित आयोजना हुने नेपाल जापान महोत्सवको निमन्त्रणा दिन कार्यवाहक डंगोलको कार्यकक्षमा आउनुभएका नेपालका लागि जापानका राजदूत मायदा तोरुसँग कुरा गर्दै उहाँले यस्तो बताउनुभएको हो ।
‘मात्सुमोतो नगरसँग काठमाडौँको पुरानो सम्बन्ध छ । त्यस नगरका जनताले काठमाडौँका जनताका लागि खेलकुद पूर्वाधारका लागि सहयोग गरेका छन् । यस्तै युनेस्को क्रियटिभ सिटीज नेववर्कमार्फत यागामाता नगरसँग पनि जोडिएका छौँ ।’ डंगोलले भन्नुभयो, ‘हामीले कार्तिक महिनामा सम्पन्न गरेको काठमाडौँ फिल्म फेस्टिभलमा यागामाता युनेस्को फिल्म सिटी सर्टस्को परिचयात्मक प्रदर्शन सम्पन्न गरेका छौँ । नागरिक स्तरको यो सम्बन्धले दुई देशबीचको कुटनीतिक सम्बन्धलाई दिगो बनाउँदै लानेछ ।’
त्यस अवसरमा राजदूत तोरुले, नेपाल जापान महोत्सवले दुई देशको सांस्कृतिक पहिचान र कलालाई आपसमा जोड्ने अपेक्षा गरेको बताउनुभयो । उहाँले काठमाडौँमा आफूले देखेको परिवर्तनको कुरा सुनाउँदै भन्नुभयो, ‘वसन्तपुरका मठ मन्दिर तथा स्मारक क्षेत्रमा मौलिक स्वरुपमा राखिएका बत्तीले सम्पदाको उचाइ बढाएको महसुस भएको छ ।’
भेटका क्रममा स्थानीय व्यापार, व्यवसाय र महोत्सवको सम्बन्ध, कला, साहित्य र सिर्जना, महोत्सवको व्यवस्थापन, सरसफाइ र स्वच्छता लगायत विषयमा कुराकानी भएको थियो । कुराकानीका क्रममा महानगरपालिकाका प्रमुख प्रशासकीय अधिकृत मुक्तिराम अर्याल, नेपाल जापान फेस्टिभल कमिटीका अध्यक्ष सौरभ ज्योतीसहित अधिकारीहरु सहभागी हुनुहुन्थ्यो ।
यो महोत्सव नेपाल जापान महोत्सब २०२६ कार्यकारी समितिको आयोजनामा हुन लागेको हो । यसले नेपाली र जापानी संगीत र कलालाई जनस्तरमा स्थापित गराउँदै मित्रता र ऐक्यवद्धतालाई प्रवर्धन गर्ने अपेक्षा गरिएको छ । जापानको प्रख्यात ब्याण्ड गोडाइगो र नेपाली मौलिक जातजाति तथा भाषाभाषीका नृत्य तथा खेलहरु महोत्सवका आकर्षण हुनेछन् ।
गोडाइगोले सन् १९८० मा काठमाडौँको रंगशालामा कन्सर्ट गरेको थियो । त्यसको ४६ वर्षपछि सन् २०२६ मा यो ब्याण्ड नेपाल आउन लागेको हो ।


निशुल्क उपचार सहजिकरण सेवा
फोहरमैला व्यवस्थापन प्रणाली
पार्किङ्ग व्यवस्थापन प्रणाली
Intern आवेदन प्रणाली
KMC Mobile App
इजलास व्यवस्थापन प्रणाली
विद्युतीय नक्शा पास प्रणाली
बिपद् सूचना ब्यवस्थापन प्रणाली
सहकारी व्यवस्थापन प्रणाली
बोलपत्र आवहन प्रणाली
घटना दर्ता नागरिक सेवा
राजश्व भुक्तानी प्रणाली
KMC Smart Toilet
Metro Mart
KMC Parking App