पीएल सिंह मेमोरियल टी २० कपमा भरतपुरद्वारा वीरगञ्ज ७४ रनले र पोखराद्वारा विराटनगर ९ विकेटले पराजित 

काठमाडौँ । त्रि. वि. क्रिकेट मैदानमा जारीपीएल सिंह मेमोरियल टी२० कप क्रिकेट प्रतियोगिता अन्तर्गत आज सम्पन्न खेलहरूमा भरतपुर महानगरपालिका र पोखरा महानगरपालिकाले सहज जित दर्ता गरेका छन् । आज २ वटा खेल भएका थिए । पहिलो खेलमा भरतपुरद्वारा वीरगञ्ज ७४ रनले पराजित भयो भने दोस्रो खेलमा पोखराद्वारा विराटनगर ९ विकेटले पराजित भयो । 

प्रतियोगिताको दोस्रो खेलमा भरतपुर महानगरपालिकाले वीरगञ्ज महानगरपालिकामाथि ७४ रनको फराकिलो जित निकाल्यो । टस जितेर पहिले ब्याटिङ रोजेको भरतपुरले निर्धारित २० ओभरमा ८ विकेट गुमाउँदै १६७ रनको बलियो योगफल खडा गरेको थियो । भरतपुरका लागि तल्लो क्रममा आएका गौतम केसीले आक्रामक ब्याटिङ गर्दै मात्र २२ बलमा ४ चौका र ३ छक्कासहित अविजित ४३ रन जोड्नुभयो । यस्तै ओपनर पवन थापाले ३१ रन, रोशन झाले २१ रन र प्रतीक श्रेष्ठले १७ रनको योगदान दिनुभयो । वीरगञ्जका तर्फबाट बलिङमा विशाल पटेल र पवन सर्राफले समान २-२ विकेट लिए भने आशिक बैठा र रञ्जित कुमारले १-१ विकेट हात पार्नुभयो ।

१६८ रनको ठूलो लक्ष्य पछ्याएको वीरगञ्ज महानगरपालिका भरतपुरको कसिलो बलिङ र उत्कृष्ट फिल्डिङ सामु टिक्न सकेन । वीरगञ्ज १७.३ ओभरमा मात्र ९३ रनमा अलआउट हुन पुग्यो । वीरगञ्जका लागि सन्तोष कार्कीले २४, मयन यादवले १८, अरनिको प्रसाद यादवले १७ र विशाल पटेलले १० रन बनाउनु बाहेक अन्य ब्याटरबाट दोहोरो अंक प्राप्त हुन सकेन । वीरगञ्जलाई सस्तैमा समेट्न भरतपुरका सुभाष खत्रीले ४ ओभरमा २८ रन खर्चेर ३ विकेट लिनुभयो । त्यस्तै प्रतीक श्रेष्ठले २ र गौतम केसीले २ विकेट झार्नुभयो । ब्याटिङ र बलिङ दुवैमा उत्कृष्ट प्रदर्शन गर्नुभएका भरतपुरका गौतम केसी खेलको प्लेयर अफ दि म्याच’ घोषित हुनुभयो । 

आजै सम्पन्न तेस्रो खेलमा पोखरा महानगरपालिकाले विराटनगर महानगरपालिकालाई ९ विकेटको भारी अन्तरले पराजित गर्‍यो । खेलमा टस जितेर पहिले ब्याटिङ रोजेको विराटनगरले निर्धारित २० ओभरमा ९ विकेट गुमाउँदै ९९ रन मात्र बनाउन सक्यो । विराटनगरका लागि ओपनर क्रिश शर्माले ३३ बलमा अविजित ५१ रनको अर्धशतकीय पारी खेले पनि अन्य ब्याटर क्रिजमा जम्न सकेनन् । कृतिक कामतले १९ रन जोड्नु बाहेक टोलीका ७ खेलाडीले दोहोरो अंक समेत जोड्न सकेनन् । विराटनगरलाई सस्तोमा रोक्न पोखराका स्पिनर विपिन खत्रीले जादुमयी बलिङ गर्नुभयो । उहाँले ४ ओभरमा १ मेडनसहित मात्र २ रन खर्चेर ४ महत्वपूर्ण विकेट लिनुभयो । यस्तै सुवास भण्डारी र कृष्ण पौडेलले समान २-२ विकेट तथा सुदीप अर्यालले १ विकेट लिनुभयो ।

१०० रनको सामान्य लक्ष्य पछ्याएको पोखरा महानगरपालिकाले मा १०.४ ओभरमा १ विकेट गुमाउँदै ५६ बल बाँकी छँदै सहजै जित हासिल गर्‍यो । पोखराका लागि प्रारम्भिक ब्याटर दीपक डुम्रेले ३० बलमा ५ चौका र ४ छक्काको मद्दतले अविजित ५४ रनको अर्धशतकीय इनिङ खेल्नुभयो । त्यस्तै अर्जुन कुमालले ३१ बलमा अविजित ४२ रन बनाउनुभयो । ईश्वर क्षेत्री १ रनमा आउट हुनुभयो । विराटनगरका विपिन महतोले १ विकेट लिनु बाहेक अन्य बलर प्रभावहीन रहे । घातक बलिङ गरेका पोखराका विपिन खत्री खेलको ‘प्लेयर अफ दि म्याच’ चुनिनुभयो ।

आन्तरिक प्रतिस्पर्धामध्ये यो सर्वाधिक राशीको प्रतिस्पर्धा हो । यसका विजेताले ११ लाख रुपियाँ प्राप्त गर्नेछन् । यस्तै उपविजेताले ५ लाख रुपियाँ पाउनेछन् । यस्तै वेष्ट बलर, वेष्ट वाट्स म्यान, प्लेयर अफ द टुर्नामेन्टलाई नगदसहित पुरस्कृत गरिनेछ । 

यस वर्षको प्रतियोगितामा काठमाडौँ, ललितपुर, पोखरा, भरतपुर, विराटनगर र वीरगञ्ज गरी ६ वटा महानगरपालिकाबाट राष्ट्रिय खेलाडीसहितको टोली प्रतिस्पर्धामा हुनुहुन्छ । नेपाल सिनियर, नेपाल ए को सिनियर टीमबाट खेलेका, नेपाल अन्डर नाइन्टीन र अन्डर सिक्सटीनबाट खेलेका खेलाडीहरुले प्रतियोगितामा भाग लिनुभएको छ । 

भोलि विहान ९ बजे काठमाडौँ महानगरपालिकाका विरुद्ध वीरगञ्ज महानगरपालिका र दिउँसो १ बजे ललितपुर  महानगरपालिका विरुद्ध भरतपुर महानगरपालिकाका बिच खेल हुँदैछ ।