पीएल सिंह मेमोरियल टी-२० कपको आजको खेलमा काठमाडौँ र ललितपुर महानगरपालिका विजयी

काठमाडौँ । त्रि. वि. क्रिकेट मैदानमा जारी प्रथम पीएल सिंह मेमोरियल टी-२० कप क्रिकेट प्रतियोगिताअन्तर्गत आज सम्पन्न चौथो खेलमा काठमाडौँ महानगरपालिका र पाँचौ खेलमा ललितपुर महानगरपालिका विजयी भएका छन । काठमाडौँ महानगरपालिकाले वीरगञ्ज महानगरपालिकालाई र ललितपुर महानगरपालिकाले भरतपुर महानगरपालिकालाई पराजित गरेका हुन् ।

आजको पहिलो खेलमा काठमाडौँ महानगरपालिकाले वीरगञ्ज महानगरपालिकामाथि ६ विकेटको सहज जित दर्ता गरेको छ । 

खेलमा वीरगञ्ज महानगरपालिकाले टस जितेर पहिले ब्याटिङ गर्ने निर्णय गरेको थियो । वर्षाका कारण १५ ओभरमा छोट्याइएको उक्त खेलमा वीरगञ्जले निर्धारित ओभरमा ८ विकेट गुमाउँदै १११ रनको योगफल तयार पारेको थियो । वीरगञ्जका लागि अर्निको प्रसाद यादवले २६ बलमा सर्वाधिक २९ रन जोड्नुभयो । रूपेश कुमार सिंहले २० बलमा अविजित २६ रन तथा अनिल कुमार साहले २२ रनको योगदान दिनुभयो । 

बलिङतर्फ काठमाडौँका नितेश कुमारले उत्कृष्ट प्रदर्शन गर्दै ३ ओभरमा १२ रन खर्चेर ३ विकेट लिनुभयो ।

११२ रनको लक्ष्य पछ्याएको काठमाडौँ महानगरपालिकाले १२ ओभरमै मात्र ४ विकेट गुमाएर लक्ष्य भेट्टायो । काठमाडौँका लागि रिञ्जिन लामाले २४ बलमा ४४ रनको आक्रामक इनिङ खेल्नुभयो । त्यस्तै, सोनु देवकोटाले १८ बलमा ३४ रन र इसान पाण्डेले २१ रन बनाउनुभयो । बलिङ र ब्याटिङ दुवैमा उत्कृष्ट प्रदर्शन गरेका काठमाडौंका सोनु देवकोटा खेलको ‘प्लेयर अफ दि म्याच’ घोषित हुनुभयो ।

आजै सम्पन्न दोस्रो खेलमा ललितपुर महानगरपालिकाले भरतपुर महानगरपालिकालाई ४ विकेटले पराजित गर्दै रोमाञ्चक जित निकालेको हो । 

खेलमा टस जितेर पहिले ब्याटिङ रोजेको भरतपुर महानगरपालिकाले निर्धारित २० ओभरमा ७ विकेट गुमाउँदै १७६ रनको बलियो योगफल खडा गरेको थियो । भरतपुरका लागि सुर्यान्शु कोइरालाले ३२ बलमा ५२ रनको अर्धशतकीय इनिङ खेल्नुभयो । शुभ कंसाकारले २१ रन र गौतम केसीले १८ रन बनाउनुभयो । ललितपुरका बलर गणेश गौतमले ४ ओभरमा २२ रन दिँदै ३ विकेट तथा बिधान खतिवडाले २ विकेट लिनुभयो ।

१७७ रनको चुनौतीपूर्ण लक्ष्य पछ्याएको ललितपुर महानगरपालिकाले ५ बल बाँकी छँदै १९.१ ओभरमा ६ विकेट गुमाएर रोमाञ्चक जित दर्ता गर्‍यो । ललितपुरको जितमा मध्य क्रमका ब्याटर विपिन आचार्यले उत्कृष्ट प्रदर्शन गर्दै ५३ बलमा अविजित ८२ रनको म्याच विनिङ इनिङ खेल्नुभयो । उहाँलाई सक्रिय प्रताप कार्कीले १७ बलमा अविजित ३९ रन बनाएर बलियो साथ दिनुभयो । त्यस्तै सचिन लेखकले ३३ रनको योगदान दिनुभयो । भरतपुरका बलर शुभ कंसाकारले ३ विकेट लिए पनि टोलीलाई जित दिलाउन सक्नुभएन । ललितपुरका विपिन आचार्य खेलको ‘प्लेयर अफ दि म्याच’ चुनिनुभयो ।

भोलि विहान ९ बजे पोखरा महानगरपालिकाका विरुद्ध काठमाडौँ महानगरपालिका र दिउँसो १ बजे पोखरा महानगरपालिका विरुद्ध विराटनगर महानगरपालिका बिच खेल हुँदैछ । 

काठमाडौँ महानगरपालिकाले आयोजना गरेको अन्तर महानगर टी-२० खेल आन्तरिक प्रतियोगितामध्ये सबैभन्दा धेरै पुरस्कार भएको खेल हो । यसका विजेताले ११ लाख रुपियाँ र उपविजेता टीमले ५ लाख रुपियाँ नगदसहित पुरस्कार प्राप्त गर्नेछ । यस्तै वेष्ट बलर, वेष्ट वाट्स म्यान, प्लेयर अफ द टुर्नामेन्टलाई नगदसहित पुरस्कृत गरिनेछ । 

यस वर्षको प्रतियोगितामा काठमाडौँ, ललितपुर, पोखरा, भरतपुर, विराटनगर र वीरगञ्ज गरी ६ वटा महानगरपालिकाबाट राष्ट्रिय खेलाडीसहितको टोली प्रतिस्पर्धामा हुनुहुन्छ । नेपाल सिनियर, नेपाल ए को सिनियर टीमबाट खेलेका, नेपाल अन्डर नाइन्टीन र अन्डर सिक्सटीनबाट खेलेका खेलाडीहरुले प्रतियोगितामा भाग लिएका छन् ।