वडा नम्बर ४ः कर तिर्नेलाई कागतीको बिरुवा, हरियाली र आर्थिक लाभको दोहोरो फाइदा

काठमाडौं - काठमाडौं महानगरपालिका वडा नम्बर ४ ले करदातालाई प्रोत्साहन गर्न तेस्रो वर्षको अभियानअन्तर्गत कागतीको बिरुवा वितरण शुरू गरेको छ । यो कार्यक्रमले कर तिर्ने संस्कृतिलाई प्रोत्साहन गर्दै पर्यावरण संरक्षण र आर्थिक लाभलाई जोड दिएको वडाले जनाएको छ । 

वडा अध्यक्ष दिनेश महर्जनका अनुसार, यो अभियान कर तिर्ने सेवाग्राहीहरूलाई लक्षित छ । कार्यक्रमले प्लास्टिक न्यूनीकरण, फोहोर व्यवस्थापन र हरियाली प्रवर्द्धनलाई प्राथमिकता दिएको छ । पहिलो वर्ष (२०८०) मा प्लास्टिक झोलाको सट्टा कपडाको झोला वितरण गरिएको थियो भने दोस्रो वर्ष (२०८१) मा फोहोरबाट बनेको अर्गानिक मल वितरण गरिएको थियो । यस वर्ष, वडाले ७  हजार ८१६ करदातालाई कागतीको बिरुवा वितरण गर्ने लक्ष्य राखेको छ, जसमध्ये हालसम्म २३ सय १० भन्दा बढीलाई बिरुवा वितरण भइसकेको छ ।  

यो आर्थिक वर्षमा वडाले ६ करोड ८४ लाख ८३ हजार रुपैयाँ राजस्व सङ्कलन गरेको छ । प्रत्येक करदातालाई एउटा कागतीको बिरुवा प्रदान गरिने अध्यक्ष महर्जनले जानकारी दिनुभयो । जसले वार्षिक एक बोटबाट एक हजारभन्दा बढी आम्दानी दिन सक्ने उहाँले बताउनुभयो । वडा अध्यक्ष महर्जनले भन्नुभयो, “यो कागतीको बिरुवाले हरियाली बढाउनुका साथै घरायसी खर्चमा समेत बचत गर्छ । कागतीको राम्रो हेरचाह पुर्र्याएमा एउटा बोटले वर्षमा १००/१५० वटा भन्दा धेरै कागती फलाउँछ, जसको बजार मूल्य १० रुपैयाँ प्रति फल हुँदा राम्रो आम्दानी हुन्छ।”