‘हेरचाह’लाई ‘नमूना सेवा’का रुपमा प्रारम्भ गर्ने योजनामा रहेको उपप्रमुख डंगोलको भनाइ

काठमाडौँ । ज्येष्ठ नागरिक, अपाङ्गता भएका व्यक्ति, गर्भवती भएका महिला लगायत व्यक्तिका लागि विशेष हेरचाह र रेखदेख चाहिएको छ । सुत्केरीपछि जागिरमा फर्किनु पर्ने महिलाहरुका लागि परामर्श चाहिएको छ । यो आवश्यकता पूरा गर्न काठमाडौँ महानगरपालिकाले भित्री सहरी क्षेत्रमा एउटा र बाहिरी सहरमा एउटा ‘नमूना हेरचाह सेवा केन्द्र’ सञ्चालन गर्ने योजना बनाएको छ । केन्द्रका विषयमा जानकारी दिँदै काठमाडौँ महानगरपालिकाका उपप्रमुख सुनिता डंगोलले भन्नुभयो, ‘यसप्रकारको सेवा नयाँ हो । नयाँ काम गर्दा यसका प्रभाव मूल्याङ्कन गर्दै जानुपर्छ । प्रारम्भ गरिएका केन्द्रहरुको प्रभावकारिताका आधारमा सेवा थप गर्ने वा नगर्ने निर्णय गर्न हुनेछ ।’

उहाँले आज यूएन वुमनका प्रतिनिधिहरुसँग हेरचाह सेवाका विषयमा कुराकानी गर्दै यस्तो जानकारी दिनुभएको हो ।   

विश्वमा तीव्र सहरीकरण हुँदै गएपछि सामाजिक संरचना परिवर्तन भएका छन् । यसकारण परिवारको साथ आवश्यक पर्ने समयमा व्यक्तिहरु एक्लै बन्न थालेका छन् । यसले सिर्जना गर्ने सामाजिक समस्या बढ्न नदिन हेरचाह र रेखदेखसँग सम्बन्धित सेवाको आवश्यकता बढ्दै गएको छ । हेरचाह र रेखदेखसँग सम्बन्धित कामसँग महिलाहरुको अवस्था र समस्या जोडिने भएकोले यो सेवासँग महिला अधिकार, सशक्तिकरण, दक्षता अभिवृद्धि जस्ता कार्यक्रम जोडिन्छन् । यस्तै रोजगार र आयआर्जनसँग पनि जोडिन्छ । यसप्रति हामी उत्तरदायी भएर काम गरिरहेका छौँ । डंगोलले बताउनुभयो । 

छलफलमा सहरीकरणले सिर्जना गरेको अवस्थासँगै विद्यमान लैङ्गिक समता र समानताको अवस्था, सोच र यसको रुपान्तरणका सवाल पनि छलफलमा उठाइएका थिए । 

हेरचाह र रेखदेखमा निजी तथा सामुदायिक संघसंस्थाहरुको दायित्व, लगानी र भूमिका, केयर  इकोनोमी (हेरचाह अर्थतन्त्र) देखि केयर सिस्टम (हेरचाह प्रणाली) सम्मको चक्रमा केयर इन्टरप्रेनरसिप (हेरचाह उद्यमशीलता) नमूना कार्यक्रमबाट प्राप्त पृष्ठपोषणका आधारमा अगाडि बढाउन सकिने सम्भावना छलफलमा उठेको थियो ।