वि.सं.: २०८३, मंसिर २ बुधबार
इ.स.: 2026 November 18,WEDNESDAY
वि.सं.: २०८३, मंसिर २ बुधबार
कार्यवाहक प्रमुख डंगोल र चाइना पिपुल्स एसोसिएसन फर फ्रेन्डसिप विथ फरेन कन्ट्रिजका अध्यक्ष वानमिङबीच शिष्टाचार भेट
काठमाडौँ । नेपालको राजधानी सहर काठमाडौँ र चीनको राजधानी सहर बेइजिङ् बिच भगिनी सम्बन्ध स्थापनामा जोड दिँदै काठमाडौँ महानगरपालिकाका कार्यवाहक प्रमुख सुनिता डंगोलले, नेपाल र चीन दुई देश बिचको कुटनीतिक सम्बन्ध, सहर तथा नागरिक स्तरको सम्बन्ध दिगो रहेको बताउनुभएको छ । आज डंगोलको बैठक कक्षमा शिष्टाचार भेटका लागि आउनु भएका चाइना पिपुल्स एसोसिएसन फर फ्रेन्डसिप विथ फरेन कन्ट्रिजका अध्यक्ष याङ वानमिङसँग कुराकानी गर्ने क्रममा उहाँले काठमाडौँसँग चीनका सियान, नाञ्जिन, ल्हासालगायत सहरहरुसँगको भगिनी सम्बन्ध र आयामका विषयमा कुरा गर्दै राजधानी सहरका बिचमा भगिनी सम्बन्धमा जोड दिनुभएको हो ।
उहाँको प्रस्तावमा अध्यक्ष वानमिङले दुई देशका राजधानी सहरका बिचमा भगिनी सम्बन्ध स्थापना गर्ने विषय सकारात्मक रहेको बताउनुभयो । अध्यक्ष वानमिङले कार्यवाहक प्रमुख डंगोललाई आउँदो डिसेम्बर महिनाको ९ देखि ११ तारिखसम्म चीनको ग्वाञ्जाउमा आयोजना हुने ग्लोबल मेयर्स फोरममा सहभागी हुन निमन्त्रणा गर्दै बेइजिङ र काठमाडौँको भगिनी सम्बन्धले नेपाल र चीन बिचको सम्बन्धमा नयाँ आयाम प्रदान गर्ने बताउनुभयो ।
त्यस क्रममा कार्यवाहक प्रमुख डंगोलले, भगिनी सम्बन्धलाई कागजमा सीमित नराखी नागरिक स्तरमा ज्ञान, सिप, प्रविधि, क्षमता बढाउने, संस्कृतिको आदानप्रदान, व्यापार व्यवसायको प्रवर्धन, पर्यटन लगायत उद्योगको विकासमा काम गर्नमा जोड दिनुभयो । ‘२०७२ सालको भूकम्पले पु¥याएको क्षति व्यवस्थापन गर्न, सन् २०१९ मा फैलिएको विश्वव्यापी महामारी नियन्त्रण र व्यवस्थापन गर्न, २०८३ को रसुवा भोटेकोशी बाढीजन्य विपदको व्यवस्थापन गर्न चीनबाट भएको सहयोगको प्रशंशा गर्दै कार्यवाहक प्रमुख डंगोलले, काठमाडौँ महानगरपालिकाले सञ्चालन गर्ने विश्वविद्यालयमा चीनबाट बौद्ध शिक्षा अध्ययन गर्ने विद्यार्थीका लागि उपयुक्त गन्तव्य बन्न सक्ने बताउनुभयो ।
मानव सभ्यताको विकासका क्रममा कला, व्यापार लगायत क्षेत्रबाट जोडिएको सम्बन्ध आधुनिक विकास र समृद्धिको यात्रामा सँगसँगै हुने उहाँको विश्वाश थियो । जलवायु परिवर्तनका विश्वव्यापी असर न्यूनीकरण जस्ता साझा समस्या समाधानमा समान धारणा निर्माण गर्दै अगाडि बढ्नु पर्नेमा उहाँको जोड थियो ।
भेटका क्रममा अध्यक्ष वानमिङले, काठमाडौँको संस्कृति र सांस्कृतिक वैभवबाट आफू प्रभावित भएको बताउँदै राजधानी सहर व्यवस्थापकीय दृष्टिले राम्रो भएको उल्लेख गर्नुभयो । ‘स्थानीय रैथाने समुदायको प्रतिनिधित्व गर्दै युवा महिला नेतृले काठमाडौँ नेतृत्व गर्नु राजनीतिमा पनि उदाहरणीय कुरा हो ।’ उहाँले भन्नुभयो, ‘कला, संस्कृति तथा पर्यटन लगायत क्षेत्रबाट काठमाडौँसँग जनस्तरको सम्बन्ध विकासको सम्भावना छ । यसका लागि हामी इच्छुक छौँ ।’
भेटका क्रममा सहरी हरित अर्थतन्त्र, रचनात्मक उद्योगको विकास र प्रवर्धन लगायत बिषयमा कुराकानी भएको थियो ।
भेटका क्रममा काठमाडौँ महानगरपालिकाका प्रमुख प्रशासकीय अधिकृत मुक्तिराम अर्याल, नेपालका लागि चीनका राजदूत झाङ माओमिङ, महानगरपालिका र दूताबासका अधिकारी तथा प्रतिनिधि मण्डलका सदस्यहरु सहभागी हुनुहुन्थ्यो ।
महानगरपालिकाको अन्तर्राष्ट्रिय सम्बन्ध सचिवालयका प्रमुख गंगाधर गौत्तमका अनुसार काठमाडौँसँग चीनका ७ वटा नगरसँग भगिनी सम्बन्ध छ । १९७० जनवरी १ तारिखका दिन सियान नगरसँग भगिनी सम्बन्ध स्थापना पत्रमा हस्ताक्षर भएपछि चीनका सहरसँग भगिनी सम्बन्ध सुरु भएको हो । यसपछि सन् २०११ अगष्ट २७ तारिखमा ल्हासासँग, सन् २०१६ को मे ११ तारिक लाञ्चोउ नगरसँग, यही बर्षको डिसेम्बर ९ तारिख छेन्दु नगरसँग, सन् २०१९ अक्टोबर १३ तारिखमा नाञ्जिन नगरसँग, सन् २०२१ मार्च २५ तारिख सेञ्जेन नगरसँग, यही बर्षको सेप्टेम्बर ९ तारिक जिञ्झाउ नगरसँग भगिनी सम्बन्ध स्थापनामा हस्ताक्षर भएको हो ।
काठमाडौँ महानगरसँग भगिनी सम्बन्ध भएका धेरै सहर हुने देशहरुमा चीन पहिलो हो । चीनपछि संयुक्त राज्य अमेरिका दोस्रो हो । यसका बोल्डर, फेडरिकबर्ग, युजिन र रोचेष्टर नगरसँग भगिनी सम्बन्ध छ ।
यसैगरी जापानको मात्सुमोतो, दक्षिण कोरियाको सिउल, वेलारुसको मिन्स्क, भारतको वाराणसी र स्पेनको मेड्रिड सहरसँग भगिनी सम्बन्ध छ ।




निशुल्क उपचार सहजिकरण सेवा
फोहरमैला व्यवस्थापन प्रणाली
पार्किङ्ग व्यवस्थापन प्रणाली
Intern आवेदन प्रणाली
KMC Mobile App
इजलास व्यवस्थापन प्रणाली
विद्युतीय नक्शा पास प्रणाली
बिपद् सूचना ब्यवस्थापन प्रणाली
सहकारी व्यवस्थापन प्रणाली
बोलपत्र आवहन प्रणाली
घटना दर्ता नागरिक सेवा
राजश्व भुक्तानी प्रणाली
KMC Smart Toilet
Metro Mart
KMC Parking App