‘फोटोग्राफी’ तथा ‘फोटो भिडियो पत्रकारिता’ तालिम सम्पन्न : प्रशिक्षार्थी रोजगार वा स्वरोजगारका लागि योग्य भएको विश्वाश

काठमाडौँ । काठमाडौँमा ‘फोटोग्राफी’ तथा ‘फोटो भिडियो पत्रकारिता’ सम्बन्धी १ महिने तालिम सम्पन्न भएको छ । काठमाडौँ महानगरपालिकाले ‘रोजगारी र आय वृद्धि, काठमाडौँको समृद्धि’ र ‘रचनात्मक सहर’ कार्यक्रम अन्तर्गत चलचित्र विकास वोर्डसँगको सहकार्यमा सञ्चालन गरेको तालिममा ३५ जना प्रशिक्षार्थी सहभागी हुनुहुन्थ्यो । तालिम सञ्चालन गर्न गएको बैशाख १५ गते बोर्ड र महानगरपालिकाको सामाजिक विकास विभाग बिच सम्झौता भएको थियो । 

तालिम समापन अवसरमा काठमाडौँ महानगरपालिकाका कार्यवाहक प्रमुख सुनिता डंगोल र चलचित्र विकास बोर्डका अध्यक्ष दिनेशराज दाहाल (डि. सी.) ले, चलचित्र क्षेत्रका पहिलो स्टिल फोटो पत्रकार मञ्जु श्रेष्ठ र स्टिल फोटोबाट पोष्टर सिर्जना गर्ने सर्जक सुन्दर श्रेष्ठलाई जनही ३५ हजार नगदसहित सम्मान गर्नुभयो । यस्तै प्रशिक्षकलाई प्रशंशा पत्र र प्रशिक्षार्थीलाई प्रमाण पत्र प्रदान गर्नुभयो ।  

त्यस अवसरमा बोल्दै महानगरपालिकाका कार्यवाहक प्रमुख डंगोलले, तालिममा सहभागीहरुको प्रशिक्षण सकिएको र व्यावसायिक यात्रा सुरु भएको बताउँदै प्राप्त ज्ञान तथा सिपलाई स्वरोजगार र रोजगारसँग जोडेर आय आर्जन गर्नुपर्ने बताउनुभयो । ‘हामीले प्रदान गर्ने तालिम सोखका लागि होइन । यसबाट व्यक्तिको आय आर्जनमा टेवा पुगोस् भन्ने हो ।’ उहाँले प्रशिक्षार्थीहरुसँगको अपेक्षा सुनाउँदै भन्नुभयो, ‘काठमाडौँमा धेरै राम्रा ठाउँ छन् । त्यस ठाउँमा पुग्ने सबैलाई, ती राम्रा ठाउँहरु तस्विरमा उतार्ने विन्दु थाहा हुँदैन । अब तपाईँहरुले त्यस्ता ठाउँ हामीलाई शिफारिस गरिदिनोस् । हामी ती ठाउँहरुलाई तस्विर खिच्ने स्थानका रुपमा संकेत चिन्हबाट पहिचान दिन्छौँ । यसबाट आगन्तुकहरुलाई राम्रा ठाउँको तस्विर प्राप्त गर्ने अवसर हुनेछ । यो तपाईँहरुलाई काठमाडौँ महानगरपालिकाले दिएको गृहकार्य हो ।’

काठमाडौँ महानगरपालिकाले रचनात्मक सहर कार्यक्रम अन्तर्गत सञ्चालन गरेका कार्यक्रमहरु दिगो प्रभाव राख्ने खालका छन् । यो तालिम पनि यसैको एउटा श्रृङ्खला हो । कार्यक्रममा बोर्डका अध्यक्ष डि. सी. ले भन्नुभयो, ‘महानगरपालिकाले अगाडि बढाएका चलचित्र क्षेत्रसँग सम्बन्धित कार्यक्रममा वोर्ड एकै ठाउँमा हुनेछ ।’

प्रशिक्षक राजभाइ सुवालले, फोटोग्राफी र भिडियोग्राफी निरन्तर अध्ययन गरिरहनु पर्ने विषय भएको बताउँदै, असल कामको प्रारम्भ भएको प्रतिक्रिया दिनुभयो । त्यस्तै प्रशिक्षार्थी, पुष्पा बुढा क्षत्रीले, तालिमबाट प्राविधिक विषय सिकेसँगै आत्मविश्वाश पनि कमाएको बताउनुभयो । 

कार्यक्रममा काठमाडौँको पहिचानका मानकहरु डवली, चोक र ननीहरु जस्ता स्मारक, गायन, वादन, संगीत, खानपान जस्ता पक्षको प्रवर्धनका लागि काठमाडौँ महानगरपालिकाले चलचित्र विधालाई माध्यमका रुपमा उपयोग गर्ने र यसमा पेशाकर्मी र समुदाय बाट सहयोग प्राप्त हुने विषयलाई महत्वका साथ चर्चा गरिएको थियो ।