प्रशिक्षार्थीले तयार पारेका बेकरीको स्वाद लिँदै क्योकोले भन्नुभयो, ‘म मेलाको प्रशंसक हूँ’

काठमाडौँ । नेपालका लागि संयुक्त राष्ट्र संघीय विकास कार्यक्रम (युएनडीपी)का आवासीय प्रतिनिधि क्योको योकोसुकाले, काठमाडौँ महानगरपालिकाले आयोजना गरेको सिप मेलाको आफू प्रशंसक रहेको बताउनुभएको छ । बिहीबार मेलाको अवलोकनका क्रममा प्रशिक्षार्थीले तयार पारेको बेकरी चाख्दै उहाँले यस्तो प्रतिक्रिया दिनुभएको हो । ‘मेलाले प्रशिक्षण मात्र प्रदान गरेको छैन । यसले रोजगार र स्वरोजगारको सम्भावना पनि देखाउँछ । यो मेलाको सवल पक्ष हो ।’ उहाँले भन्नुभयो, ‘समय अनुसारका सिप र सिपयुक्त जनशक्तिले रोजगार पाउने ठाउँ, रोजगार दिने व्यक्ति एकै ठाउँमा भेटिने खालको प्रयत्न अनुकरणीय छ ।’ 

त्यस क्रममा सहरी योजना आयोगका उपाध्यक्ष एवं मेला निर्देशक समितिका संयोजक डा. सुमननरसिंह राजभण्डारीले, सिप प्रदान गर्ने र रोजगार प्रदान गर्ने संघसंस्थाहरुसँग सहकार्य गरेर दिगो नतिजा प्राप्त गर्ने संयन्त्र विकास भइरहेको जानकारी गराउनुभयो । 

आवासीय प्रतिनिधिलाई तालिम संयोजक देवेन्द्र के. सी. ले कक्षाहरुका विषयमा स्थलगत जानकारी गराउनुभएको थियो । 

पूर्व राज्यमन्त्री कार्कीले सुझाव – सिकाइ विस्तार गर्नु पर्छ 

नेपाल सरकारका पूर्व स्वास्थ्य राज्यमन्त्री डा. तोषिमा कार्कीले काठमाडौँको अभ्यास अन्य पालिकामा पनि विस्तार गर्नु पर्ने बताउनुभएको छ । विहीबार सिप मेलाको अवलोकन गर्दै उहाँले यस्तो प्रतिक्रिया दिनुभएको हो । सिप प्रदान भएपछि व्यक्तिको आय बढ्ने भएकोले यसको लाभ घरघरमा पुग्ने उहाँको भनाइ थियो । 

अवलोकनका क्रममा उहाँले प्रशिक्षक र प्रशिक्षार्थीहरुसँग तालिमका बारेमा जानकारी लिनुभएको थियो । यस्तै होटल म्यानेजमेन्ट पेशाका प्रशिक्षार्थीले तयार पार्नु भएका खानेकुरा चाखेर व्यावसायिक सम्भावना रहेको बताउनुभयो ।