सिप मेला अवलोकन पछि नगर प्रमुखहरुको प्रतिक्रिया 'मेला एकीकृत र समष्टिगत लाग्यो'

काठमाडौँ । काठमाडौँ महानगरपालिकाले टुँडिखेलमा सञ्चालन गरेको सिप मेला एकीकृत भएको महसुस गर्‍यौँ । मेलाको अवलोकन गर्न आउनुभएका हलेसी तुवाचुङ् नगरपालिकाका प्रमुख बिमला राई र दिक्तेल रुपाकोट मझुवागढी नगरपालिकाका प्रमुख तीर्थराज भट्टराईले प्रतिक्रिया दिनुभएको छ । यी पालिकाहरु कोशी प्रदेशको खोटाङ् जिल्लामा पर्छन् । 

‘काठमाडौँले मेला आयोजना गरेर उदाहरण स्थापित गरेको छ । यसलाई संघ र प्रदेश सरकारले नीति योजना तथा कार्यक्रममा समावेश गरेर हरेक पालिकामा प्रवर्धन गर्नुपर्छ । यसले युवाहरुले आफ्नै ठाउँमा केही गर्नु पर्छ भन्ने सपना देख्छन् । मानव पुँजी पलायन हुनबाट रोक्न यो काम अहिले अति जरुरी छ ।’ उहाँहरुले यसको विकास र विस्तारका लागि संघ र प्रदेश सरकारबाट अपेक्षा राख्नुभयो । 

‘तालिम सकिए पनि कार्यक्रम नियमित हुनु मेलाको सबैभन्दा सवल पक्ष लाग्यो । अन द जब ट्रेनिङ्मा जानेका लागि न्युनतम पारिश्रमिक उपलब्ध गराउन चाँगुनारायण फाउन्डेसनसँग सहकार्य गरेर साझेदारीमा काम गर्नु अर्को सिकाइ योग्य अभ्यास लाग्यो ।’ उहाँहरुले प्रतिक्रिया दिनुभयो ।

तालिम सञ्चालन विधि, प्रशिक्षणको पाठ्यक्रम, पाठ्य सामग्री र प्रयोगात्मक सिपका विषयमा तालिम संयोजक देवेन्द्र के. सी. ले जानकारी गराउनुभएको थियो ।  

जेठ ७ गतेदेखि सुरु भएको मेलामा १० क्षेत्रका ३७ पेशासँग सम्बन्धित तालिम चलिरहेका छन् । हरेक दिन ३ सिफ्टमा प्रशिक्षण चल्छन् ।