एकल महिलाहरुलाई साथको अनुभूति दिलाउन वडाबाट सम्मान 

काठमाडौँ । काठमाडौँ महानगरपालिकाको वडा नंं. २९ ले एकल महिलाहरुलाई सम्मान गरेको छ । विहीबार एक औपचारिक कार्यक्रम आयोजना गरेर उहाँहरुलाई सल ओढाएर सम्मान गरिएको हो भने साडी उपहार दिइएको छ । 

कार्यक्रममा वडाध्यक्ष कुश ढकालले भन्नुभयो, ‘समाज निर्माणमा सबैको योगदानप्रति हामी आदर गर्न चाहन्छौँ ।’ उहाँले सामाजिक कुरीतिका विषयमा कुरा गर्दै उहाँले भन्नुभयो, ‘परम्परागत गलत धारणालाई रुपान्तरण गर्नुपर्छ । हामी एकल महिलाहरुले समाजको विकासमा गर्नुभएको योगदानको निरन्तरता उहाँहरुको आत्मसम्मानका लागि निरन्तर काम गर्नेछौँ ।’

वडा सदस्य एवं कार्यक्रमका संयोजक रेनु श्रेष्ठले भन्नुभयो, ‘हाम्रो तथ्याङ्कमा वडाभित्र करिब २ सय जना एकल महिला हुनुहुन्छ । उहाँहरुमध्ये करिब १४५ जना सम्मान कार्यक्रममा सहभागी हुनुभयो । कति जना त इच्छा भएर पनि अझै आउन सक्नुभएन । उहाँहरुलाई सामाजिक रुपमा एकल महिलाका रुपमा खुल्न अझै पनि संकोच र डर छ ।’

श्रेष्ठका अनुसार ६० वर्ष पूरा भएका अविवाहिता र जुनसुकै उमेरका भए पनि श्रीमान्को मृत्यु दर्ता गरेका एकल महिलाहरुलाई सम्मान गरिएको हो । 

सम्मान कार्यक्रममा सहभागीहरुले वडाले गरेको सम्मानबाट आफूले आफ्ना लागि पनि कोही रहेछन् भन्ने महसुस भएको प्रतिक्रिया दिनुभयो । हामीले के पायौँ त्यो ठुलो कुरा होइन । वडाले सम्झना गरेर बोलायो । यो चाहिँ आफ्ना लागि ठुलो कुरा हो । उहाँहरुको प्रतिक्रिया छ ।