काठमाडौँ महानगरका प्रमुख र उपप्रमुखका प्रत्याशीबाट मतदान 

काठमाडौँ । काठमाडौँ महानगरमा प्रमुख र उपप्रमुखका प्रत्याशीहरुले मतदान गर्नुभएको छ । स्थानीय तह सदस्य निर्वाचन २०७९ का कार्यक्रमअन्तर्गत उहाँहरुले आफू मतदाता रहेको वडाका मतदान स्थलमा गएर मतदान गर्नुभएको हो । 

यस क्रममा नेपाल कम्युनिष्ट पार्टी (एमाले) का उम्मेद्वार केशव स्थापितले बागबजारस्थित पद्मकन्या क्याम्पसमा गएर विहान सवा ७ बजे नै मतदान गर्नुभयो । यसैगरी नेपाली कांग्रेसकी प्रत्याशी (सत्तारुढ गठबन्धनका उम्मेदवार) सिर्जना सिंहले वडा नंं १६ मा रहेको नेपाल युवक माध्यमिक विद्यालय, साउनेपाटी, क्षेत्रपाटीमा गएर मतदान गर्नुभयो । यसैगरी विवेकशील साझा पार्टी प्रमुख समीक्षा बास्कोटाले वडा ३१ को भ्याली भ्यु मतदान स्थलमा र स्वतन्त्र उम्मेदवार बालेन्द्र शाह (बालेन) ले वडा ९ को अन्नपूर्ण बोर्डिङ् स्कूल, गैरीगाउँ मतदान स्थलबाट मतदान गर्नुभयो । 

यसैगरी उपप्रमुखका उम्मेदारहरुमा नेपाल कम्युनिष्ट पार्टी (एमाले) की प्रत्याशी सुनिता डंगोलले, वडा २१ को फसिंगा लगनटोलमा र सत्ता गठबन्धन नेपाल कम्युनिष्ट पार्टी (एकीकृत समाजवादी) का उम्मेदवार रामेश्वर श्रेष्ठले वडा १२ स्थित नेशनल टे«डिङ् कम्पनी लिमिटेडमा रहेको मतदान स्थलमा गएर मतदान गर्नुभयो । 

अहिले काठमाडौँमा निर्वाध निर्वाचन सञ्चालन भइरहेको छ । जिल्ला निर्वाचन अधिकारी ठाकुरप्रसाद भट्टराईकाअनुसार दिउँसो १ बजेसम्ममा काठमाडौँ महानगरमा करीव ३८ प्रतिशत मतदाताले मत खसालेका छन् ।   

महानगरमा ३ लाख २४२ जना मतदाता र ८२६ जना प्रत्याशी छन् । १५६ मतदान स्थल र ३६३ केन्द्रबाट मतदान भइरहेको छ । काठमाडौँ जिल्लामा ३२० मतदान स्थल र ७५९ मतदान केन्द्र छन् ।