वडावासीको मानमर्यादा र पहिचान स्थापित गराउन सम्मान कार्यक्रम हुने : कागजपत्र पेश गर्न आग्रह 

काठमाडौँ । काठमाडौ महानगरपालिकाको वडा नं. १२ ले स्नातक तह उत्तीर्ण पेशाकर्मी र स्नातकोत्तर तह उत्तीर्ण सबैलाई सम्मान गर्ने भएको छ । आज वडामा पत्रकारहरुसँग कुराकानी गर्दै वडाध्यक्ष एवं महानगरपालिकाको वातारण समितिका संयोजक वालकृष्ण महर्जनले, व्यक्तित्व र पेशा पहिचान तथा युवाहरुलाई भविष्यप्रति सकारात्मक बनाउन विगत वर्षदेखि नै सम्मान कार्यक्रम आयोजना भइरहेको बताउनुभयो । 

वडाका स्थायीवासीलाई प्रदान गरिने यो सम्मानका लागि जेठ ११ गतेभित्र शैक्षिक योग्यता तथा पेशाकर्मीका लागि नवीकरण भएका प्रमाण पत्रको प्रतिलिपि बुझाउन वडाले आग्रह गरेको छ । यससँगै मतदाता परिचय पत्र वा बसाईँ सराई आएको प्रमाण पत्रसहित वैयक्तिक फाराम भरेर २ प्रति पासपोर्ट साइजको फोटो दिनुपर्नेछ । 

वडाले २०८१ सालमा ६७ जना विद्वत व्यक्तित्व, चक्रेश्वर, गुरु, नायः, कजि गरी ३४ जनालाई सम्मान गरेको थियो । २०८२ सालमा १६३ जना व्यक्तित्वलाई सम्मान प्रदान गरिएको थियो । यस पटक विद्वत वर्गमा इञ्जिनियर, एमबीबीएस डाक्टर, चार्टर अकाउन्टेन, रजिष्ट्रर्ड अडिटर, पाइलट, विद्यालय–क्याम्पसका प्रधानाध्यापकहरु, राष्ट्रिय अन्तरराष्ट्रिय खेल प्रतियोगिताका पदक विजेतासहितलाई सम्मान गर्ने योजना छ । 

‘दिनहुँ यान्त्रिक जीवनतिर लम्किरहेका वडावासी सम्मानका दिन एक ठाउँमा भेला हुनेछन् । एक अर्काको पेशाप्रति परिचित हुनेछन् । आफूलाई आवश्यक परेको पेशासँग सम्बन्धित सेवा वडाबासीबाट सजिलै लिने वातावरण बनाउनेछन् ।’ अपेक्षित नतिजाका बारेमा वडाध्यक्ष महर्जनले स्पष्ट पार्नुभयो । 

सम्मानका लागि प्राप्त भएका कागजपत्रको रुजु गरेर वडालाई बुझाउन ज्ञानीबाबु सिंहको संयोजकत्वमा प्रचण्डमान बज्राचार्य, राजा डंगोल, तीर्थनारायण महर्जन र हरिगोविन्द रञ्जितकार सदस्य रहेको छनोट समिति बनाइएको छ । समितिका संयोजक सिंहले, काम थालनी गरिसकिएको जानकारी दिनुभएको छ ।