आज विहान ८ बजेदेखि काठमाडौँ महानगरको मत गणना गर्ने तयारी 

काठमाडौँ । काठमाडौँ महानगरको मत गणना अहिले विहान ०८ बजेबाट गर्ने तयारी भएको छ । गए राती १२ बजेपछि बसेको सर्वपक्षीय बैठकले यस्तो निर्णय गरेको मुख्य निर्वाचन अधिकृतको कार्यालयका सहायक निर्वाचन अधिकृत प्रेमप्रसाद पौडेलले जानकारी दिनुभयो । 

मत गणना गर्दा वडा १ बाट माथि र ३२ बाट तल हुने गरी थालनी गर्ने सहमति भएको छ । पौडेल भन्नुहुन्छ, ‘एक पटकमा ५ वटा वडाबाट गणना थालिनेछ ।’ गणना स्थलमा उम्मेदवारका प्रतिनिधि रहने व्यवस्थाका विषयमा उहाँ भन्नुहुन्छ, ‘आयोगले दलबाट एक जना र स्वतन्त्रबाट प्रतिनिधिमुलक प्रतिनिधित्व गराउन भनेको छ । यसैअनुसार व्यवस्था मिलाइनेछ ।’

हिजो मतदान सकिएपछि साढ ५ बजेबाट मतपेटिका सभा गृह ल्याउन थालिएको थियो । मुख्य निर्वाचन अधिकृतको कार्यालयले ६ वटा काउन्टर राखेर पेटिका बुझेको थियो । यो क्रम करिब साढे ११ बजेसम्म चलेको थियो । त्यसपछिको आधा घण्टामा सर्वदलीय बैठक बसेको थियो ।