वडाका शिफारिस अनलाइनबाट : ‘पेपरलेस’ हुँदै ‘फेसलेस’ सेवा प्रवाहतर्फ काम गरिरहेका छौँ - प्रवक्ता, मानन्धर

काठमाडौँ । एकीकृत विद्युतीय सेवा प्रणालीमा काठमाडौँ महानगरपालिकाको संस्थागत क्षमता विकास र सेवाग्राहीलाई सेवा लिन अभ्यस्त गराउँदै फेसलेस गभर्नान्सका लागि काम भइरहेको प्रवक्ता नविन मानन्धरले बताउनुभएको छ । इशिफारिस कार्यान्वयनका लागि वडाध्यक्ष र वडा सचिवका लागि आयोजना गरिएको अभिमुखीकरण कार्यक्रममा उहाँले भन्नुभयो, ‘कानुन र प्रक्रिया हेर्ने सचिव र व्यवहारिकता हेर्ने वडाध्यक्षका बिचमा शिफारिस दिने प्रणाली सञ्चालन सम्बन्धी बुझाइ एउटै हुनुपर्छ ।’  

त्यस क्रममा सुशासन समितिका संयोजक ख्यामराज तिवारीले भन्नुभयो ‘स्वचालित प्रणालीमा पुग्नुपर्छ । सामान्य शिफारिस लिन कार्यालयमा पुग्नु पर्ने, लाइन बसेर कर्मचारीको टेवुलमा पुग्नु पर्ने अवस्थालाई पूर्ण अन्त्य गर्नुपर्छ । 

अभिमुखीकरण कार्यक्रममा वडाध्यक्षहरुले नागरिकको आवश्यकता पूरा गर्न प्रणालीलाई अद्यावधिक गराउँदै लैजानु पर्नेमा जोड दिनुभयो । 

वडाहरुमा प्रणालीलाई अनिवार्य गराउन सूचना प्रविधि विभागले प्राविधिक सहायताका लागि कर्मचारी खटाएको छ । विभागका प्रमुख अनिरुद्र नेपाल भन्नुहुन्छ, ‘परामर्श दिने कर्मचारी र कार्यालयमै बसेर सहयोग गर्ने कर्मचारी खटाएका छौँ । प्रणाली स्वतः सञ्चालनमा नआउञ्जेलसम्म वडाहरुलाई यो सहायता प्रदान भइरहनेछ ।’

कतिपय शिफारिसहरु निःशुल्क छन् । कतिपय शुल्क तिर्नु पर्ने खालका छन् । कतिपय शिफारिसहरु भौतिक उपस्थितिमा मात्र प्रदान गर्न सकिन्छ । सेवाका यस्ता प्रकृतिसँगै, अनिवार्य गरिएका कागजपत्र सम्लग्न गराउने, सम्लग्न भएका कागजपत्रको विश्वसनीयता, भुक्तानी प्रक्रियालगायत विषय अभिमुखीकरणमा समावेश गरिएका थिए । 

महानगरपालिकाका सेवालाई विद्युतीय प्रणालीमा आवद्ध गराएर अटोमेसनमा लैजान नीति कार्यान्वयनमा लैजान सुशासन समिति र सूचना प्रविधि समितिले सूचना प्रविधि विभागलाई निर्देशन दिएका छन् । यसको कार्यान्वयन गर्दै विभागले वडा तहबाट प्रदान गरिने शिफारिसलाई अनलाइन प्रणालीमा  आवद्ध गराउन https://esifarish.kathmandu.gov.np/ विकास गरेको छ । यस प्रणालीमा दर्ता हुन नाम थर, इमेल ठेगाना, मोवाइल नम्बर, नागरिकता नम्बर, नागरिकता जारी मिति, नागरिक प्राप्त गरेको जिल्लाको ठेगाना, युजर नेम र पासवर्ड राख्नुपर्छ । 

यसबाट प्राप्त हुने युजर नेम र पासवर्डको प्रयोग गरेर प्रणालीमा आफूलाई चाहिने शिफारिसको प्रक्रिया अगाडि बढाउन सकिन्छ ।