काठमाडौँको महावौद्ध र असनमा आज पञ्चदान र दिपंकर तथागत वुद्धको शोभायात्रा र पूजा

काठमाडौँ । आज काठमाडौँको महावौद्धमा रहेको महावुद्ध महाविहार र असनमा पञ्चदान सम्पन्न भएको छ । हरेक १२ वर्षमा हुनु पर्ने तर वितेका २४ वर्षसम्म पनि हुन नसकेको सम्यक महादानको स्मरण गराउन दिपंकर तथागत वुद्धको शोभायात्रा र पञ्चदान कार्यक्रम भएको हो । 

शोभा यात्रा तथा पञ्चदान कार्यक्रममा पुगेर काठमाडौँ महानगरपालिकाका कार्यवाहक प्रमुख सुनिता डंगोलले, सम्यक दान तथा पञ्चदानको सांस्कृतिक र सामाजिक सम्बन्धका विषयमा जानकारी लिनुभएको थियो । यस क्रममा काठमाडौँ महानगरपालिकाभित्रका अमूर्त सम्पदा, जनश्रुति तथा कथनमा आधारित सम्पदाको संरक्षणमा काठमाडौँ महानगरपालिकाले कसरी काम गर्नु पर्छ? भन्ने विषयमा पृष्ठपोषण लिनुभएको थियो । 

‘हामी आवश्यकता र तथ्यमा आधारित कार्यक्रम कार्यान्वयन गर्न चाहन्छौँ । यसका लागि तपाईँहरुका मनमा लागेका कुरा निर्धक्क भन्नुहोला ।’ श्रद्धालुलाई अभिव्यक्तिका लागि प्रोत्साहित गर्दै उहाँले, अमूर्त सम्पदा जोगाउने काममा महानगरपालिका सँधै साथमा रहेको बताउनुभयो ।  

सामाजिक सद्भावका लागि काठमाडौँमा भएका जात्रा पर्व जत्तिका वैज्ञानिक संस्कार शायदै अन्त होलान् । कार्यक्रमका बारेमा वडा २७ का अध्यक्ष योगेशकुमार खड्गीले प्रतिक्रिया दिनुभयो । 

शोभा यात्रामा काठमाडौँका विभिन्न स्थानमा रहेका महाविहार, बहाः बहीः मा रहनुभएका ८५ जना शाक्य स्थवीर, थायपा, दिपङ्कर तथागत बुद्धहरु र जीवित देवताहरु श्रीगणेश र श्रीभैरवलाई विराजमान गराइएको थियो । 

पञ्चदान तथा दिपङ्कर शोभा यात्रा विहान ७ बजे दिपङ्कर वुद्धहरुको आसन ग्रहणबाट सुरु भएको थियो । विहान ९ बजेदेखि ११ बजेसम्म पञ्चदान प्रदान भएको थियो । 

पञ्चदानमा चामल, धान, नुन, दाल र दक्षिणा गरी पाँच प्रकारका आवश्यक बस्तु दान गर्नाले पुण्य प्राप्त हुने विश्वाश छ । यो नेवार समुदायका बौद्धमार्गीमा प्रचलित धार्मिक तथा सांस्कृतिक परम्परा हो । 

अपरान्ह साढे १२ बजे दिपङ्कर बुद्धलाई महाबौद्ध, असन, त्योड, इनबहाल, कमिलाक्षी, भोटाहिटी हुँदै असनको डवलीसम्मको शोभा यात्रा गराइएको थियो । त्यसपछि असनमा पूजा प्रारम्भ भएको थियो । 

सम्यक महादान स्वयम्भूमा हुने गर्छ । पछिल्लो समय २०६० साल महादान भएको थियो । त्यसपछि भएको छैन ।