बुक फ्रि फ्राइडेका कार्यक्रमले विद्यार्थीमा ज्ञानको दायरा बढेको छ — उपप्रमुख डंगोल

काठमाडौँ । काठमाडौँ महानगरपालिकाकी उपप्रमुख सुनिता डंगोलले बुक फ्रि फ्राइडेका कार्यक्रमले विद्यार्थीहरुमा ज्ञानको दायरा बढेको बताउनुभएको छ । आज बालुवाटारमा रहेको महेन्द्र राष्ट्रिय माध्यमिक विद्यालयमा पुस्तकविहिन शुक्रबार कार्यक्रमका क्रियाकलापको निरीक्षण अवलोकनका क्रममा उहाँले यस्तो प्रतिक्रिया दिनुभएको हो । 

निरीक्षणका क्रममा उहाँले विद्यार्थीहरुसँग कुराकानी गर्दै यस अघि सिकेका सिप र विद्यार्थीहरुको वुझाइका बारेमा जानकारी लिनुभएको थियो । सिपमा शिक्षा कार्यक्रमअन्तर्गत प्लम्बिङ्को ९० घण्टे तालिम पूरा गरेका विद्यार्थीलाई प्रश्न गर्दै उहाँले भन्नुभयो, ‘घरमा विग्रिएका धाराको मर्मत गर्नुभएको छ त?’ उत्तरमा विद्यार्थीहरुले, निर्माण भइरहेको नयाँ भवन देख्दा त्यसको प्लम्बिङ्को काम आफैँ गर्न सक्ने महसुस हुन थालेको प्रतिक्रिया दिए । यो सुनेपछि उपप्रमुख डंगोलले भन्नुभयो, ‘हामीले शिक्षामा सिप कार्यक्रमबाट अपेक्षा गरेको नतिजा यस्तै हो । यो एउटा विधाको कुरा भयो, अन्य विधामा विद्यार्थीहरुको आत्मविश्वाश बढ््यो भने विद्यार्थीहरुले माध्यमिक तहको शिक्षा पूरा गरेपछि आफूलाई उद्यमशीलताका लागि योग्य भएको महसुस गर्नेछन् । शिक्षाको गुणात्मक सुधार यही कार्यक्रमबाट प्राप्त हुनेछ ।’

‘बालबालिकाहरुसँग कुराकानी गर्दा उनीहरुले मनमा लागेको कुरा निर्धक्क र स्पष्ट सुनाए । विद्यार्थीहरुमा आएको यो आत्मविश्वाश नै हामीले चाहेको नतिजा हो ।’ उहाँले अपेक्षित नतिजाका विषयमा स्पष्ट पार्नुभयो । 

उपप्रमुखसँग वडाध्यक्ष दिनेश महर्जन, शिक्षा अधिकारी सीताराम कोइराला निरीक्षणमा सहभागी हुनुहुन्थ्यो । निरीक्षण टोली विद्यालयमा पुग्दा विद्यार्थीहरु नृत्य, चित्रकला, पाक कलालगायतका क्रियाकलापमा व्यस्त थिए । विद्यालयको कम्प्युटर ल्यावमा जुृनियर विद्यार्थीहरु बाल कथामा आधारित चलचित्र हेरिरहेका थिए । सभा कक्षमा सिनियर कक्षाका विद्यार्थीहरु नेपालको राजनीतिक पृष्ठभूमिमा निर्माण भएको चलचित्र सेतो बाघ हेरिरहेका थिए । 

उपप्रमुख कक्षामा पुगेपछि विद्यार्थीहरु खुशी प्रकट गरेका थिए । उनीहरुले उपप्रमुखसँग दोहोरो संवाद गर्दै, स्थानीय टोल तथा सार्वजनिक महत्वका ठाउँहरु घुम्न गएको, हाजिरी जवाफलगायत क्रियाकलाप गरेको सुनाए । 

विद्यार्थीहरु व्यवहारिक सिकाइप्रति उत्साहित छन् । विद्यार्थीहरुमा देखिएको यो उत्साह समुदायमा पुृ¥याउन सके स्थानीय बालबालिकालाई फाइदा हुने थियो । निरीक्षणका क्रममा वडाध्यक्ष दिनेश महर्जनले धारणा राख्नुभयो ।   

विद्यालयले सिपमा शिक्षा कार्यक्रम अन्तर्गत प्लम्बिङ्को ९० घण्टे तालिम पूरा गरेको छ । शिक्षा अधिकारी कोइरालाका अनुसार ९० घण्टे तालिमको पहिलो चरणमा ८० समूहलाई तालिम दिइसकिएको छ । यसपछि कार्यक्रमलाई निरन्तरता दिँदै जानेछौँ । 

विद्यालयका प्रधानाध्यापक देवराज गुरुङ्का अनुसार विद्यालयले गएको एसईई परीक्षामा काठमाडौँ जिल्लाभरिमा सामुदायिक विद्यालयहरुमा नवौँ स्थान हासिल गरेको छ । जिल्ला विकास समन्वय एकाईको तथ्याङ्क उधृत गर्दै उहाँले भन्नुभयो, ‘महानगरपालिका भित्रका सामुदायिक विद्यालयमा तेस्रो र प्राविधिक धारका विषय अध्यापन गर्ने महानगरभित्रका सामुदायिक विद्यालयमा पहिलो स्थान हासिल गर्ने विद्यालय हो ।’

विद्यालयले ७ सय जना विद्यार्थी अध्यापन गराउने क्षमता राख्छ । अहिले ५५० जना विद्यार्थी अध्ययनरत छन् । विद्यालयमा गागलफेदी, सुन्दरीजल, कलंकीलगायत टाढा टाढा ठाउँबाट विद्यार्थीहरु अध्ययनका लागि आउने गरेका छन् । विद्यालयका प्रधानाध्यापकले यस विषयमा जानकारी गराएपछि उपप्रमुख डंगोलले, स्थानीयबासीलाई विद्यालयमा विद्यार्थी पढाउन प्रोत्साहन गर्ने कार्यक्रम अघि बढाउन आग्रह गर्नुभयो ।