बालाजु पौडी पोखरी सञ्चालनमा : पहिलो दिन २०५ जनालाई सेवा 

काठमाडौँ । बालाजु पौडी पोखरी सञ्चालन भएको पहिलो दिन २ सय ५ जनाले सेवा लिँदा ४० हजार १ सय रुपैयाँ शुल्क संकलन भएको छ । जसमा १३२ जना पूरा शुल्क तिर्ने हुनुहुन्थ्यो भने विद्यार्थी छुट लिने ७३ जना हुनुहुन्थ्यो । विद्यार्थी छुट शुल्क १५० रुपैयाँ हो । उहाँहरुमध्ये ५५ जनाले लकर सुविधा लिनुभयो । बालाजु वाइसधारा उद्यान कार्यालयका प्रमुख निरञ्जनविक्रम बस्नेतका अनुसार यो तथ्याङ्क दिउँसो ३ बजेसम्मको हो । 

आज विहान वडा नम्बर १६ का अध्यक्ष रोजिना श्रेष्ठले नरिवल फोडेर पोखरी सञ्चालनको शुभारम्भ गर्नुभएको हो । त्यस क्रममा उहाँले भन्नुभयो, ‘पोखरीमा स्थानीयहरुले सहुलियत पाउनु पर्नेसहित माग राख्नुभएको छ । अहिले, आर्थिक वर्ष २०८१÷०८२ का लागि महानगरपालिकाले जारी गरेको आर्थिक ऐन अनुसारको शुल्क लिइएको हो । पौडी पोखरी सञ्चालनका लागि मस्यौदा कार्यविधि तयार भइसकेको छ । यो कार्यविधि र आर्थिक वर्ष २०८२/०८३ को लागि जारी गरिने आर्थिक ऐनबाट स्थानीयका माग सम्बोधन गर्नेछौँ ।’

वडा सचिव प्रकाश खड्का भन्नुहुन्छ, ‘खुला र सार्वजनिक स्थानको व्यवस्थापन गरेर स्थानीय पहुँचलाई बढाउँदै लगिएको छ ।’

१८ लाख लिटर पानी भएको पोखरीको लम्बाइ ५० मिटर र चौडाइ १८ मिटर छ । गहिराइ ३ फिटदेखि १० फिटसम्म छ । पोखरीको पानी शुद्ध बनाउन पानी प्रशोधन प्लान्ट छ । पानीको पिएच भ्यालु र क्लोरिन भ्यालुको सन्तुलन गर्न स्वचालित डिजिटल प्रणाली छ । स्नान घर, शौचालय र लकर सुविधा उपलब्ध गराइएको छ । पोखरीको छेउमा १५० जना दर्शक बस्ने क्षमताको ठाउँ छ ।  

पोखरीमा जीवन रक्षाका लागि नेपाल पौडी संघसँगको सहकार्यमा १ जना वरिष्ठ जीवन रक्षक, १ जना महिला अनिवार्यसहित ३ जना जीवन रक्षक, १ जना पानी प्रशोधन प्राविधिकसहित ५ जना जनशक्ति परिचालन गरिएको छ ।

बालाजु बाइसधारा उद्यान १५८ रोपनी क्षेत्रफलमा फैलिएको छ । तत्कालीन राजा जयप्रकाश मल्लको पालामा एक्काइसवटा धारा निर्माण भएका थिए । पछि रणबहादुर शाहले बिचको एउटा ठूलो धारा निर्माण गराएपछि यसको नाम बाइस धारा रहन गएको हो । वि.सं. २०१८ सालमा राजा महेन्द्रको पालामा बालाजु बाइसधारा उद्यान निर्माण भएको हो । सर्वसाधारणका लागि २०२१ सालदेखि खुला भएको हो । 

पौडी पोखरी पुनःनिर्माण 
२०७२ सालको भूकम्पको कम्पनले पोखरीको संरचना चर्किएपछि पानी चुहिन थालेको थियो । त्यसपछि पोखरी पुनःनिर्माण थालिएको थियो । ७ करोड ८५ लाख रुपैयाँ लागत अनुमान गरिएको पुनःनिर्माण गर्न पशुपतिनाथ कन्स्ट्रक्सनले ७ करोड ४३ लाख रुपैयाँमा निर्माण कबोल गरेको थियो । निर्माणको खर्च रकम ७ करोड ४३ लाख ३१ हजार १९७ रुपैयाँ हो । कामका लागि २०७९ असोज ५ गते कार्यादेश दिइएको थियो । २०८० चैत १९ गते निर्माण सम्पन्न भएको हो ।