Logo
  • वि.सं.: २०८३, मंसिर ४ शुक्रबार​

  • इ.स.: 2026 November 20, FRIDAY

  • वि.सं.: २०८३, मंसिर ४ शुक्रबार​

  • ‘विकासले विनाश गरिएका सांस्कृतिक सम्पदा पुनरुत्थान गर्दैछौँ’ – संयोजक, संगत

    वडा नं. ८ ले १५ लाख रुपियाँ लागतमा भुवनेश्वरी गणेश फल्चा पुनरुत्थान गर्ने : आज शिलान्यास

    काठमाडौँ । पशुपति क्षेत्र विकास कोषले विकासका लागि समय समयमा गरेका पूर्वाधार निर्माणले नासिएका प्राचीन स्मारक, संरचना तथा कलाकृतिलाई पुनरुत्थानका लागि काम गरिरहेको बताउँदै काठमाडौँ महानगरपालिकाको सम्पदा तथा पर्यटन समितिका संयोजक एवं वडा नं. ८ का अध्यक्ष आशामान संगतले, यस्ता सम्पत्तिको पुनरुत्थानका लागि निकायगत कार्यालयबाट पर्याप्त सहयोग प्राप्त हुन नसकेको अनुभव सुनाउनुभएको छ । आज वडा नं. ८ भुवनेश्वरी भकुंटोलमा रहेको भुवनेश्वरी गणेश फल्चाको पुनरुत्थानका लागि शिलान्यास गर्दै उहाँले यस्तो बताउनुभएको हो । 

    ‘काठमाडौँ नगर पञ्चायतले २०३९ सालमा बनाएको इन्भेन्ट्रीमा यसको निर्माण मिति १९९३ भएको देखिन्छ । इन्भेन्ट्री बनाउँदा देवपतनमा रहेको फल्चाको भौतिक अवस्था नराम्रो भनेर उल्लेख गरिएको छ । यस्तो नराम्रो अवस्थामा रहेको फल्चा निर्माण गर्नुको साटो पशुपति क्षेत्रको विकास गर्ने बेला नामनिशान मेटाइयो । भौतिक स्वरुपबाट पूर्ण हटाइएको फल्चालाई पुरानो दस्तावेजका आधारमा हामीले पुनरुत्थान थालेका हौँ ।’ यही वडाका अध्यक्ष समेत रहनुभएका संगतले थप्दै भन्नुभयो, ‘फल्चा मासेर सटरयुक्त संरचना बनाइएका र व्यापारिक प्रयोजनमा उपयोग भइरहेका ठाउँ खाली गरेर अबको १५ दिनभित्रमा अरु फल्चाको पनि शिलान्यास गर्ने तयारीमा छौँ ।’ 

    इन्भेन्ट्रीमा भनिएको छ, ‘झिँगटीको छाना हाली प्राचीन शैलीमा निर्माण गरिएको यस पाटीको वर्तमान अवस्थाले यथाशीघ्र जीर्णोद्धार कार्य थालनी गर्नुपर्ने संकेत गरेको छ । पश्चिम मोहडाको यस पाटीको पूर्वमा घर, पश्चिममा पशुपति जाने बाटो, उत्तरमा घर र दक्षिणमा गोरेटो बाटो पर्दछ । हाल यस सत्तलमा घरबारबिहीन एक परिवारले बसोबास गरेको छ ।’

    यो फल्चाको लम्बाइ १२ फिट ३ इञ्च र चौडाइ ६ फिटको छ । 

    आज शिलान्यास गरिएको फल्चाको पश्चिममा भूःबहाल (बालकुमारी रोड), उत्तरमा भुवनेश्वरी मन्दिर र नासः ननी र दक्षिणमा गौशालातर्फ जाने सडक छ । यो फल्चा वरिपरिका विभिन्न स्थानको चौबाटोमा छ । 

    फल्चा निर्माण गर्दा पुरातत्व विभागका सहमति लिएर पुरानै शैली र स्वरुप तथा परम्परागत निर्माण सामग्रीको प्रयोग गरेर बनाइँदैछ ।  

  • प्रकाशित मिति बिहीबार ३ मंसिर २०८३ ०७:२७ PM