वडा र समुदायका कार्यक्रम चलाउन बाहिरबाट मान्छे खोज्नु नपरोस् - वडाध्यक्ष कार्की

काठमाडौँ । वडाले कुनै कार्यक्रम सञ्चालन गर्नु पर्दा उद्घोषण गर्ने मान्छे खोजेर ल्याउनु नपरोस् । कार्यक्रम बनाउन सोधीखोजी गर्नु नपरोस् । वडा नम्बर ३० का अध्यक्ष दलबहादुर कार्की भन्नुहुन्छ, ‘यसका लागि हामीले कर्मचारी र समुदायका प्रतिनिधिहरुलाई आधारभूत उद्घोषण तालिम प्रदान गरेका छौँ ।’ ७ दिने आधारभूत उद्घोषण तालिमको समापन अवसरमा प्रशिक्षार्थीहरुलाई प्रमाण पत्र प्रदान गर्दै उहाँले यस्तो बताउनुभएको हो । वडाले इन्टिच्युट फर सोसल ट्रान्सफरमेसनसँगको सहकार्यमा जेठ १३ गतेदेखि थालेको तालिम १९ गते समापन भएको थियो । तालिममा १५ जनालाई सहभागी गराइएको थियो । 

समापन कार्यक्रम प्रशिक्षार्थीले नै सञ्चालन गर्नुभएको थियो । 

तालिममा उद्घोषण र भाषण कलाको सैद्धान्तिक पक्ष, व्यवहारिक ज्ञान, विषय बस्तुको ज्ञान, आमन्त्रित व्यक्तित्वको परिचय लिएर कार्यक्रमको ढाँचा तयार पार्ने, कार्यक्रमअनुरुपका पोशाक र सजावट गरेर कार्यक्रममा उपस्थित हुने जस्ता पूर्व तयारी, माइक समाउने तरिका, मर्यादा क्रम मिलाउने, शुद्ध बोल्ने, आकस्मिक आउने विषयलाई सहज ग्रहण गरेर सहजीकरण गर्ने जस्ता क्षमताको अभ्यास गराइएको थियो । 

वडाले सञ्चालन गरेका तालिममध्ये उद्घोषण तालिमबाट तत्काल नतिजा देखिएको वडा सदस्य इन्दिरा श्रेष्ठको भनाइ थियो । तालिमपछि प्रशिक्षार्थीहरुको व्यक्तित्वमा परिवर्तन आएको देखियो । समापन अवसरमा वडा सचिव देवराज जोशीले नतिजा सुनाउनुभयो । त्यस क्रममा प्रशिक्षार्थीकातर्फबाट धारणा राख्दै बीना हमालले, प्रशिक्षणले जनसम्पर्कका लागि आत्मविश्वाश बढेको धारणा राख्नुभयो । 

समापन कार्यक्रम वडा कार्यालयका प्रशिक्षार्थी आशा खड्काले नै सञ्चालन गर्नुभएको थियो ।