वडा नंं ३० को पुँजीगत खर्चमा ५७.७१% वित्तीय र ७९.६५% भौतिक प्रगति  

काठमाडौँ । काठमाडौँ महानगरपालिकाको वडा नं. ३० ले आर्थिक वर्ष २०८०/८१ मा पुँजीगत खर्चतर्फ ५७.७१ प्रतिशत वित्तीय र ७९.६५ प्रतिशत भौतिक प्रगति हासिल गरेको छ । आज आयोजना गरिएको सार्वजनिक सुनुवाई कार्यक्रममा सम्पन्न आर्थिक वर्षको प्रगति प्रस्तुत गर्दै सम्पन्न योजनाहरुका विषयमा जानकारी दिइएको थियो । 

कार्यक्रममा बोल्दै वडाध्यक्ष दलबहादुक कार्कीले, नागरिकले अपेक्षा गरेका योजना छनोट गरेर निर्धारित समयभित्र सम्पन्न गर्ने अठोटका साथ काम गरिरहेको उल्लेख गर्नुभयो । वडाको आफ्नै प्रशासनिक भवन नहुँदा सेवा प्रवाहमा असहज थियो । यसलाई समाधान नजिक लगिएको छ । सहरी सुरक्षा र व्यवस्थापनमा जनप्रतिनिधिको अटुट निगरानी छ । कर्मचारी संयन्त्रले कार्यान्वयन गरिरहेको छ । कार्कीको भनाइ थियो । 

वडाले गएको वर्ष पूर्वाधारतर्फ सडक कालोपत्रे गर्ने, ढलान गर्ने, ब्लक विछ्याउने, ढल निर्माण गर्ने, सडक वत्ती जडान गर्ने, पार्क निर्माण गर्ने, सम्पदा संरक्षणका कार्यसहित योजना कार्यान्वयन गरेको थियो । वडाको बजेट १२ करोड ४१ लाख ८८ हजार रुपैयाँ थियो । 

वडा सचिव देवराज जोशीकाअनुसार त्यस वर्ष स्वीकृत भएका ६३ वटा योजनामध्ये ५० वटा सम्पन्न भएका छन् । २ वटा क्रमागत रुपमा चलिरहेका छन् ।  

सामाजिक क्षेत्रका कार्यक्रमअन्तर्गत करदाता सम्मान, सुस्त श्रवण शक्ति भएका व्यक्तिहरुका लागि ३ महिने साङ्केतिक भाषा तालिम, अपाङ्गता भएका ह्विलचेयर महिला वास्केट बल प्रतियोगिता, हुलाप्याखाँ र धिमेबाजा नृत्य प्रशिक्षण लगायत कार्यक्रम सम्पन्न भएका छन् ।  

वडाले १६ करोड ५६ लाख रुपैयाँ राजस्व संकलन गरेको थियो । 

सुनुवाइ कार्यक्रममा प्रश्नकर्ताहरुले पूर्वाधारतर्फ सडक व्यवस्थापनमा जोड दिए । सडक किनारामा बनाइने संरचनाका कारण पैदल यात्रामा अवरोध नहोस् भन्नेतर्फ सोच्नु पर्ने देखिन्छ । घर पालुवा कुकुरलाई सडकमा दिशा पिसाव गराउन ल्याउनु वडाको अर्को समस्या हो । उहाँहरुले सडकको सतह नमिलेका कारण आवतजावत कठिन भएको अनुभूति सुनाउनुभयो । मादक पदार्थ सेवन गरेर रातको समयमा सडकमा अश्लील शव्द बोल्दै हिँड्ने समूहलाई तत्काल नियन्त्रण गर्नु पर्छ । यसले अशान्ति र असुरक्षा हुन थालेको छ । उहाँहरुको भनाइ थियो । 

चारखाललाई पार्कमा रुपान्तरण गर्न पाए पर्खालभित्रको सार्वजनिक सम्पत्तिमा समुदायको पहुँच पुग्थ्यो । उहाँहरुले धारणा राख्नुभयो । 

२१ हजार ५६३ जनसंख्या भएको वडामा ६ हजार १ सय २९ घर संख्या छ । ९४.५९ वर्गमिटर (१८ सय ५६ रोपनी) क्षेत्रफल भएको वडाभित्र करिब ३० किलोमिटर सडक सञ्जाल छ । ७५ वर्ष उमेर पूरा हुनुभएको ज्येष्ठ नागरिक (महिला÷पुरुष) को संख्या ३९० जना छ । ज्येष्ठ नागरिक भत्ता प्राप्त गर्ने ८८० जना हुनुहुन्छ । यस्तै एकल महिला भत्ता पाउने ११८ जना, एकल महिला (विधवा) भत्ता पाउने १४६ जना, पूर्ण अपाङ्ग १९ जना, आंशिक अपाङ्ग २४ जना र दलित ज्येष्ठ नागरिक ५ जना हुनुहुन्छ । 

वडामा स्वास्थ्य बिमा कार्यक्रम कार्यान्वयनमा आइसकेको छ । यसका लागि पहिलो सम्पर्क विन्दु स्वास्थ्य प्रवर्धन केन्द्र हो । वडामा ५८६ परिवारका १ हजार ४५६ जना बिमित हुनुहुन्छ ।