वडाध्यक्ष कप फुटसलको उपाधि अर्चना गुरुमार्गलाई

काठमाडौँ । काठमाडौँ महानगरपालिका वडा नं. ८ को आयोजनामा सम्पन्न दोस्रो वडा अध्यक्ष कप फुटसल प्रतियोगिताको उपाधि अर्चना गुरुमार्गले जितेको छ । फाइनल खेलमा अर्चना गुरुमार्गले सन्ध्या पुस्तकालयलाई १-० गोल अन्तरले पराजित गर्दै उपाधि हात पारेको हो ।

उपाधिसँगै अर्चना गुरुमार्गले ट्रफीसहित नगद ५० हजार रुपियाँ प्राप्त गरेको छ भने उपविजेता सन्ध्या पुस्तकालयले २५ हजार रुपियाँ प्राप्त गरेको छ । 

फाइनल खेलको ‘म्यान अफ द म्याच’ अर्चना गुरुमार्गका महेश सेढाइँ घोषित हुनुभयो । प्रतियोगिताको ‘म्यान अफ द टुर्नामेन्ट’ अर्चना गुरुमार्गकै पार्थराज भण्डारी र ‘बेस्ट गोलकिपर’ सञ्जीव तामाङले प्राप्त गर्र्नुभयो । यस्तै सन्ध्या पुस्तकालयका प्रणय थापा ‘हाइ स्कोरर’ बन्नुभयो । प्रतियोगिताको ‘बेस्ट टिम’ को उपाधि गौरीशंकर युवा क्लबले हात पारेको छ । 

प्रतियोगितामा अर्चना गुरुमार्ग, सन्ध्या पुस्तकालय, गौरीशंकर युवा क्लब, नव अमरकान्तेश्वर युवा क्लब, जय वागेश्वरी युवा क्लब र सिर्जनशील युवा क्लब गरी वडाभित्रका ६ टोलीको सहभागिता रहेको थियो । वैशाख १५ गते सुरु भएको प्रतियोगिता २३ गते सकिएको हो । 

प्रतियोगिता समापन अवसरमा विजेता समूह र खेलाडीलाई शिल्ड, प्रमाण पत्र तथा नगद पुरस्कार प्रदान गर्दै महानगरपालिकाको सम्पदा तथा पर्यटन समितिका संयोजक एवं वडा ८ का अध्यक्ष आशामान संगतले, प्रतियोगिताबाट सामाजिक सम्बन्ध थप मजवुत भएको आफूलाई महसुस भएको उल्लेख गर्नुभयो । हामीले उमेर समूह अनुसारका खेलकुदका कार्यक्रमलाई निरन्तरता दिएका छौँ । उहाँको भनाइ थियो ।

युवालाई खेलकुदतर्फ आकर्षित गर्ने, स्वास्थ्य तथा शारीरिक तन्दुरुस्ती प्रवर्धन गर्ने, स्थानीय प्रतिभा पहिचान तथा विकास गर्ने, आपसी सद्भाव र खेल भावना अभिवृद्धि गर्ने उद्देश्यले प्रतियोगिता आयोजना गरिएको थियो ।