वडाको व्यानर सगरमाथामा फहराउने शेर्पालाई सम्मान 

काठमाडौँ । काठमाडौँ महानगरपालिकाको वडा नं. ४ ले वडाको नाम अङ्कित व्यानर सगरमाथामा फहराउने छेपा शेर्पालाई सम्मान गरेको छ । शेर्पाले २०८१ जेठ ८ गते वडाको फ्लेक्स व्यानर सगरमाथामा फहराउनुभएको थियो । उहाँ वडा नं. ४ को स्थायी बासिन्दा हुनुहुन्छ । 

वडास्तरीय दौड प्रतियोगिताको समापन अवसरमा शेर्पालाई सम्मान गरिएको हो । सम्मानका बारेमा जानकारी दिँदै वडाध्यक्ष दिनेश महर्जनले भन्नुभयो, ‘सर्वोच्च शिखरमा वडाको नाम फहराएर शेर्पाले, वडाबासीको पहिचान उच्च बनाउनुभएको छ । यसप्रकारको पहिचान प्रवर्धन गर्ने अवसर थोरैलाई मात्र प्राप्त हुन्छ ।’

‘स्वस्थ्य जीवनका लागि दौड’ नारा राखेर वडास्तरीय दौड प्रतियोगिता सम्पन्न गरेको छ । दौडमा विद्यालयका छात्रछात्रा, खुला महिला पुरुष र भेट्रान समूह बनाइएको थियो । दौडमा विद्यालयका छात्रछात्राका लागि र ५५ वर्ष उमेर समूह माथिका भेट्रान समूहका लागि ३ किलोमिटर र खुला महिला पुरुषका लागि ५ किलोमिटर दुरी राखिएको वडा सचिव श्याम पाण्डेले जानकारी दिनुभयो । 

प्रतियोगितामा विद्यालयका १२० जना छात्रछात्रा सहभागी हुनुभएको थियो । वडामा सामुदायिक र संस्थागत गरी ३१ वटा विद्यालय छन् । यीमध्ये सामुदायिक ४ वटा विद्यालय छन् । यस्तै खुला महिला पुरुष गरी ९६ र भेट्रान ६८ जनाले भाग लिनुभएको थियो ।

प्रतियोगितामा प्रथम हुनेलाई ५ हजार रुपैयाँ, दोस्रो हुनेलाई ३ हजार रुपैयाँ र तेस्रो हुनेलाई २ हजार रुपैयाँ नगदसहित मेडल र प्रमाण पत्र प्रदान गरिएको थियो ।