फालिएका बस्तुबाट कलाकृति र सिर्जनात्मक कलाको प्रतियोगितात्मक प्रदर्शनी 

काठमाडौँ । काठमाडौँ महानगरपालिकाभित्रका सामुदायिक विद्यालयका विद्यार्थीहरुले फालिएका बस्तु संकलन गरेर कलाकृति र सिर्जनात्मक नमूनाहरु बनाएका छन् । विश्व वातावरण दिवसको अवसर पारेर महानगरपालिकाको वातावरण व्यवस्थापन विभागले शिक्षा विभाग र पार्टनरसिप फर हेल्दी सिटीज परियोजनासँगको सहकार्यमा ‘वन्डर अफ वेस्ट’ शीर्षकमा प्रतियोगिता आयोजना गरेको हो । कार्यक्रममा ५९ वटा विद्यालयका विद्यार्थीहरुले घरमा फालिएका, विद्यालयमा फालिएका पुनःप्रयोगीय वस्तु संकलन गरेर कलाकृति बनाएका हुन् । जसमध्ये ५६ वटा विद्यालयले अन्तिम प्रतियोगितामा सहभागिता जनाएका थिए । 

७ अवधि चलेको सामग्री बनाउने अवधिमा विद्यालय स्तरमा भएको प्रतिस्पर्धाका बिजेता २ जनालाई एउटा समूह बनाएर विद्यालयहरुले अन्तिम प्रतिस्पर्धामा पठाएका थिए । 

उनीहरुले कागज, प्लाष्टिक, कार्ड बोर्ड, फुटेका कप, प्लेट, विजुलीका बल्बजस्ता सामान भेला गरेर बिज्ञानका मोडल, सहरी व्यवस्थापनको मोडल, फोहर व्यवस्थापनका राम्रा र गलत अभ्यासको तुलना, सजावटका सामान, धरहरा, पृथ्वी जस्ता संरचना तयार पारेका हुन् । यसरी तयार पारिएका सामग्री बुधबार राष्ट्रिय सभा गृहमा प्रदर्शनी गरिएको थियो । प्रदर्शनीमा राखिएका बस्तु तथा सामग्रीहरुलाई वातावरण, पर्यावरण र कलाका कोणबाट मूल्याङ्कन गरिएको थियो । 

यसबाट पद्मकन्या विद्याश्रम माध्यमिक विद्यालयले प्रथम स्थान हासिल ग¥यो । यस्तै शान्ति शिक्षा मन्दिरले दोस्रो र केन्द्रीय बहिरा विद्यालयले तेस्रो स्थान हासिल गरे । प्रथम, दोस्रो र तेस्रो हुने समूहलाई क्रमशः २५ हजार, १५ हजार र १० हजार रुपैयाँ नगदसहित प्रमाण पत्र प्रदान गरिएको थियो । 

कार्यक्रममा सहरी योजना आयोगका उपाध्यक्ष डा. सुमननरसिंह राजभण्डारीले विजेता विद्यार्थीहरुलाई पुरस्कृत गर्नुभएको थियो । 

कार्यक्रममा बोल्दै वातावरण व्यवस्थापन विभागका प्रमुख सरिता राईले, वातावरणीय स्वच्छता कायम गर्न सरकारसँगै आम नागरिक र सरोकारवालाले समान रुपमा दायित्व पूरा गर्नु पर्ने धारणा राख्नुभयो । 

‘सप्ताहव्यापी कार्यक्रमबाट विद्यार्थीहरुमा नवप्रवर्ततमा आधारित सोचप्रति उत्साहित गरेको छ । फालिएका बस्तुबाट सिर्जनात्मक वस्तु तथा सामग्री उत्पादन गर्न सकिने सन्देश दिएको छ ।’ राईले यो देखेपछि कार्यक्रमको उद्देश्य पूरा भएको महसुस गरेको अनुभूति सुनाउनुभयो ।

कार्यक्रममा राष्ट्रिय युवा गैरसरकारी संस्था महासंघका अध्यक्ष शशी शर्मा मजगैयाँले, एकजनाले फोहर मानेर फालेको बस्तु अर्को जनाका लागि काममा आउन सक्छ । वस्तुको एउटा प्रयोजन सकिए पनि उपभोगका अवसरहरु बाँकी नै रहन्छन् । यसकारण बस्तुलाई फोहर मानेन भने फोहर नै नहुने धारणा राख्दै विद्यालयहरुमा यही चेतना प्रवाहका लागि कार्यक्रम आयोजना गरिएको धारणा राख्नुभयो । 

पार्टनरसिप फर हेल्दी परियोजना काठमाडौँका परियोजना प्रमुख सञ्जीव पाण्डेले, यस वर्ष वातावरण दिवसका अवसरमा सञ्चालन गरिएको प्लाष्टिक उपयोग न्यूनीकरण गर्ने विश्वव्यापी अभियानमा यसले योगदान दिएको उल्लेख गर्नुभयो ।