वडा नं. २६ ले जिल्लाव्यापी वृहत खेलकुद प्रतियोगिता आयोजना गर्दै : आइतबार उद्घाटन

काठमाडौँ । काठमाडौँ महानगरपालिकाको वडा नम्बर २६ ले जिल्लाव्यापी वृहत खेलकुद कार्यक्रम आयोजना गर्ने भएको छ । असार १ गते सुरु हुने खेल असार ८ गते सकिनेछन् । आज वडामा पत्रकार भेटघाट कार्यक्रम आयोजना गरेर वडाध्यक्ष ख्यामराज तिवारीले खेल कार्यक्रमका विषयमा जानकारी गराउनुभयो । प्रतियोगितामा फुटसल, टेवुलटेनिस, तेक्वान्दो र कराँतेका २ विधा गरी ५ विधामा प्रतिस्पर्धा हुनेछ । खेलमा महानगरपालिकाका सबै वडासहित जिल्लाका सबै स्थानीय तहबाट खेलाडीले भाग लिन पाउनेछन् । 

‘खेलमार्फत सहरी जीवन पद्धतिमा सुधारको सन्देश दिन खोजेका छौँ ।’ वडाध्यक्ष तिवारीले भन्नुभयो, ‘विकास भन्नेवित्तिकै पूर्वाधार निर्माणको चित्र आउँछ । पूर्वाधार निर्माण विकासको एउटा पाटो हो । यससँगै आर्थिक, सामाजिक, सांस्कृतिक, खेलकुदलगायतका पक्षको विकास अपरिहार्य हुन्छ । यी सवै पक्षको सन्तुलनले मात्र समृद्ध समाज निर्माण हुन्छ । यसकारण हामीले खेल क्षेत्रमा लगानी गरेका छौँ ।’ उहाँले थप्दै भन्नुभयो, ‘वडाभित्र फुटसल, टेबुलटेनिस, बास्केटबल लगायत खेलका लागि पूर्वाधार उपलब्ध छ । खेलका विविध क्रियाकलापमार्फत पूर्वाधारको उपयोगका लागि हामीले यस वर्ष ३५ लाख रुपैयाँ विनियोजन गरेका थियौँ । त्यो योजना अहिले कार्यान्वयनमा ल्याएका हौँ ।

प्रतियोगिताअन्तर्गत फुटसल विधामा पुरुषहरुका बिच प्रतिस्पर्धा गराइनेछ । नकआउटका आधारमा खेलाइने खेलमा प्रथम हुने टोलीलाई १ लाख ५० हजार रुपैयाँ, उपविजेता टीमलाई ७५ हजार रुपैयाँ नगदसहित पुरस्कार, ट्रफी र प्रमाण पत्र प्रदान गरिने प्रतियोगिताका संयोजक एवम् वडा सदस्य प्रवेश श्रेष्ठले जानकारी दिनुभयो । उहाँका अनुसार उत्कृष्ट खेलाडी, सर्वाधिक गोलकर्ता र उत्कृष्ट गोलरक्षक १० हजार रुपैयाँका दरले पुरस्कृत गरिनेछ । 

तेक्वान्दो प्रतियोगिताको पहिलो, दोस्रो र तेस्रो टीमलाई क्रमशः ७५ हजार, ५० हजार र २५ हजार रुपैयाँसहित पुरस्कृत गरिनेछ । उत्कृष्ट खेलाडीलाई १० हजार प्रदान गरिनेछ । महिला तथा पुरुष टेबुल टेनिसतर्फ पहिलो, दोस्रो र तेस्रो स्थान हासिल गर्नेलाई क्रमशः २० हजार, १० हजार र ५ हजार रुपैयाँसहित पुरस्कार प्रदान गरिनेछ । 

यस्तै, फुल कन्ट्याक्ट क्योकुसिन कराँते (आइ. के. यु) तौल समूहमा खेलाइनेछ । यो पुरुषहरुका बिच प्रतिस्पर्धा हुनेछ । यसमा पहिलो, दोस्रो र तेस्रो हुने टीमलाई क्रमशः १० हजार, ८ हजार, ६ हजार रुपैयाँसहित पुरस्कृत गरिनेछ । सान्त्वाना पुरस्कारमा ५ हजार रुपैयाँ नगदसहित पुरस्कृत गरिनेछ । 

डब्लु. के. एफ. कराँते प्रतियोगिता महिला खेलाडीहरुका बिचमा हुनेछ । यसमा एकल प्रतियोगितामा पहिलो, दोस्रो र तेस्रो हुनेलाई क्रमशः ३० हजार रुपैयाँ, १५ हजार रुपैयाँ र १० हजार रुपैयाँ नगदसहित पुरस्कार प्रदान गरिनेछ । यस्तै टीम विजेता पहिलो दोस्रो र तेस्रोलाई क्रमशः ५० हजार, २५ हजार र २० हजार रुपैयाँ नगदसहित पुरस्कृत गरिनेछ ।