चुनावमा राजनीतिक प्रतिस्पर्धा, त्यसपछि एक दृष्टिले विकासमा काम गर्ने संस्कार आवश्यक - वडाध्यक्ष, संगत 

काठमाडौँ । ‘चुनावका समयमा हुने राजनीतिक प्रतिस्पर्धा चुनावपछि पनि कायम रहँदा आफ्नै आँगन, आफ्नै चोक, आफू हिँड्ने सडक निर्माणमा अवरोध भयो । आफैँले पाउने सुविधा पाउन कठिन भयो । यसकारण विकासमा सबैको साझा दृष्टि आवश्यक छ ।’ काठमाडौँ महानगरपालिकाका वडा नम्बर ८ का अध्यक्ष आशामान संगतले भन्नुभयो, ‘विरोध, उजुरी र मुद्दाका कारण सार्वजनिक हितका कतिपय काम रोकिएका छन् । कतिपय काम निर्माण सम्पन्न हुने ठाउँमा पुगेर रोकिएका छन् । कतिपय काम थालनी गर्नै पाइएन ।’ वडाले शुक्रबार आयोजना गरेको सार्वजनिक सुनुवाई कार्यक्रममा बोल्दै वडाध्यक्ष संगतले, निर्वाचित भइसकेपछि सम्पन्न भएका काम र चालु आर्थिक वर्षमा सम्पन्न कामको विवरण प्रस्तुत गर्दै विकास निर्माण चुनौतीका कुरा गर्दै यस्तो बताउनुभएको हो । 

‘महानगरपालिकाको वर्गीकरणमा मझौला वडामा परेको वडाले वडाभित्रका सबै ठाउँ, बस्ती र समुदायलाई समान दृष्टि दिएर पूर्वाधार निर्माण, सामाजिक विकास, स्थानीय आर्थिक उपार्जन, सांस्कृतिक रीतिथितीको निरन्तरता र प्रवर्धन, मूर्त अमूर्त सम्पदाको संरक्षणलाई समान दृष्टि राखेर कार्यान्वयनमा लगिएको उहाँको भनाइ थियो । शासन र सेवा प्रवाहका लागि वडाको नयाँ प्रशाशकीय भवन निर्माण सम्पन्न गरेर सञ्चालनमा ल्याउनु हामीले गरेका महत्वपूर्ण काममध्येको एउटा हो ।’ संगतले धारणा राख्नुभयो ।

चालु आर्थिक वर्षका लागि स्वीकृत कार्यक्रममध्ये पूर्वाधारतर्फ १३ वटा निर्माण सम्पन्न भइसकेका छन् । कार्यान्वयन चरणमा रहेका योजनाहरुको विवरण आर्थिक वर्षको अन्त्यमा सार्वजनिक गरिने वडाको योजना छ ।   गएको वर्ष (आ. व. २०८०/०८१) मा ४९ वटा योजना सम्पन्न गरिएका थिए । निर्वाचित भएको पहिलो वर्ष (आ. व. २०७९/०८० को जेठ १७ गते पदवहाली गरेपछि) मा ३६ वटा योजना सम्पन्न गरिएका थिए । 

वडाले जयबागेश्वरीदेखि पशुपतिसम्म पुग्ने गल्ली, सेतो ढोकादेखि जयबागेश्वरी पुग्ने गल्लीमा ढुङ्गा विछ्याउने काम सकेको छ । ६ वटा फल्चा पुनःनिर्माण गरेको छ । एक ठाउँमा सार्वजनिक शौचालय बनाएको छ । विभिन्न ५ ठाउँमा पार्क निर्माण र खुला व्यायामशाला बनाएको छ । महामृत्युञ्जय, स्वर्ण गणेश, इना गणेशको मन्दिर पुनःनिर्माण सम्पन्न गरेको छ । पिंगलास्थान र तिलगंगामा परम्परागत द्वार निर्माण गरेको छ । ३ वटा डवली पुनःस्थापना गरेको छ । २ वटा इनार उत्खनन गरेर पुनःस्थापना गराएको छ । एउटा ढुङ्गेधारा पुनःनिर्माण सम्पन्न गरेको छ । एउटा पुनःनिर्माण सुरु गर्दैछ । व्रह्मा मन्दिर र सेतो ढोका पुनःनिर्माणको चरणमा छन् । इटापाखालाई मौलिक स्वरुपमा बनाइँदैछ । वडा इन्द्रजात्राका क्रियाकलाप सञ्चालन गर्न रथ बनाउने काम चलिरहेको छ । 

खेलकुदतर्फ फुटसल, कराँतेलगायत आउटडोर र इनडोरका विभिन्न प्रतियोगिता गराएको छ । स्वास्थ्य सेवाको पहुँच बढाउन विहान ८ बजेदेखि नै रामघाट प्राथमिक स्वास्थ्य केन्द्र सञ्चालनमा ल्याइएको छ । 

पिंगलास्थानमा खानेपानीको समस्या समाधान गर्न गौशालादेखि पानीको छुट्टै पाइपलाइन विछ्याइएको छ । यस्तै, पञ्चकन्या टोलमा खानेपानीको समस्या समाधान गर्न मित्रपार्कदेखि लाइन विछ्याइएको छ ।  

सामाजिक क्षेत्रका कार्यक्रमअन्तर्गत ज्येष्ठ नागरिकहरुलाई तीर्थाटन गराएर आपसी भेट र सामाजिक संवादको वातावरण बनाइएको छ । सिपमूलक र व्यावसायिक तालिमतर्फ एक वडा एक नमूना कार्यक्रमअन्तर्गत रुद्राक्षको ढाकी बनाउने तालिम सञ्चालन गरेर व्यावसायिक क्रियाकलाप सञ्चालन भएका छन् । यस्तै, साबुन बनाउने, वेकरी बनाउने, धूप बनाउने, फूलको बुके बनाउने, नेल आर्ट, अचार बनाउने लगायत तालिम सञ्चालन गरिएका छन् । यस्तै परम्परागत बादन, गायन तथा नृत्य संरक्षण प्रवर्धन गर्न धिमे, धाः, नायखिँ, बाँसुरी बादनको प्रशिक्षण सम्पन्न भएको छ । परम्परागत संस्कार र संस्कृति सञ्चालन गर्ने गुथि गहनाहरुलाई सहयोग उपलब्ध गराएर स्थानीय जात्रा पर्वको सञ्चालन निरन्तरतामा सहयोग गरेको छ । 

करिब ५३ हजार जनसंख्या भएको वडामा करिब २२ सय घरधुरी छन् । वडाको पूर्वमा कागेश्वरी मनोहरा नगरपालिकाको वडा नम्बर ८ पर्छ । पश्चिममा महानगरपालिकाकै वडा नम्बर ७, उत्तरमा वडा नम्बर ६ र दक्षिणमा वडा नम्बर ९ पर्छ । 

कार्यक्रममा स्थानीयबासीले, क्षेत्राधिकारभित्र परे पनि नपरे पनि स्थानीयबासीका समस्या वडाले नै समाधान गरिदिनु पर्ने माग राख्नुभयो । कसैले रोक्न खोजे पनि तपाईँहरु रोकिनु हुँदैन । अहिलेका सरकारमध्ये स्थानीय सरकारले नागरिकको सबैभन्दा नजिकको सरकार हो । सबैभन्दा शक्तिशाली हो । यसलाई मनन गर्नु, उहाँहरुको सुझाव थियो । आगामी वर्षको बजेट माग गर्दै उहाँहरुले भन्नुभयो, ‘हामीले मागेका कुरा तपाईँहरुको क्षेत्राधिकार भित्र पर्छन् कि पर्दैनन् । परे पनि नपरे पनि हामीले माग गर्ने तपाईँहरुसँगै हो ।’

सिमाना जोडिएका ठाउँको विकासमा दुवैतर्फबाट योजना नपर्ने नहोस्, पशुपति क्षेत्रमा लास ल्याउने र अन्तिम संस्कार गर्ने प्रक्रिया सहज बनाउनु पर्‍यो । बाटो छेकेर फूल बेच्ने क्रियाकलाप बन्द गराइदिनु पर्‍यो । माग्नेहरुको संख्या घटाउनु पर्‍यो । सार्वजनिक शौचालय थप गरिदिनुपर्‍यो। पञ्चदेवलमा भएको वृद्धाश्रम जोखिमपूर्ण छ । यसलाई पुनःनिर्माण गराइदिनुपर्‍यो । विश्वरुप पारी धूवस्थली चढ्ने गल्ली नाजुक छ । पुनःनिर्माण गराइदिनुपर्‍यो। सूर्यघाटबाट आर्यघाट जोड्न आकाशे पुल बनाएर जोरपाटीतर्फबाट आउने लासलाई त्यो मार्ग उपलब्ध गराउनु प¥यो । शान्ति तीर्थमन र किराँतेश्वरलाई झोलुङ्गे पुलले जोडेर आकर्षक पर्यटकीय स्थल बनाउनु पर्‍यो । पार्कहरुमा भक्ष र अभक्ष, कृत्य र कुकृत्य क्रियाकलाप हुने देखियो । सीसीटिभी क्यामरा जडान गरेर नियन्त्रण गरिदिनु पर्‍यो । 

यस्तै विभिन्न स्थानमा चौतारा बनाइदिनुपर्‍यो। सडक पार गर्न अण्डरपाससहितका संरचना बनाइदिनुपर्‍यो। फल्चामा उक्लिन र ओर्लिन सजिलो हुने गरी ठाउँ बनाइदिनुपर्‍यो। स्थानीयबासीहरुले यससँगै समुदायको विकासका कार्यक्रम, सडक, ढल निकास, खानेपानीको समस्या समाधान, महिला, बालबालिका र ज्येष्ठ नागरिकका लागि कार्यक्रम, खेलकुदका कार्यक्रमको माग गर्नुभएको छ । सुनुवाई तथा योजना माग गर्ने क्रममा २६ जना स्थानीयबासीले प्रश्न सोध्ने राख्दै तथा सुझाव दिनुभएको थियो । 

कार्यक्रममा वडाले तयार पारेको जात्रा पर्वसँग सम्बन्धित श्रव्यदृश्यमध्ये पाहाँचह्रे जात्राका विषयमा तयार पारिएको सामग्रीको संक्षिप्त प्रस्तुति सार्वजनिक गरिएको थियो । 

पशुपतिनाथ, गुह्येश्वरी, गौशाला, जयबागेश्वरी, वनकाली, नवाली टोल, खरीबोट, पञ्चकन्या, तिलगंगा, पिंगलास्थान, इटापाखा यस वडाका नाम चलेका ठाउँहरु हुन् । 

प्राचीन समयमा यो क्षेत्र छुट्टै देशका रुपमा कायम थियो । यसकारण यस क्षेत्रलाई ग्वलःदे अर्थात ग्वल देशका रुपमा मानिन्छ ।